Paungde Peng Ah Tithan A Kal Mi SAC Ralhrang Bomb Puahhnawhnak In 3 An Thi; 2 Hliam Tuar
=========
Bago ramthen Paungde peng, Tein-kon khua pawngah ti than ah a kal mi SAC ralhrang hna cu PPDF nih Bomb an puah hnawh hna caah ralhrang 3 an thi i 2 hliam an tuar tiah tuanvo ngeitu pakhat nih a chim. May 15 zanlei suimilam 4 tluk ah Tein-kon khua phungki sianginn ah umhmunkhuar mi SAC ralhrang 5 hna cu ti than ding an kal lio ah Bom puahhnawh an ton hi a si.
“Paungde khua ah rallam sial in umhmun an kuarnak an sau ngai cang, an kir pah an ra pah tiin an um tawn.” tiah Bago ramthen PDF tuanvo ngeitu pakhat nih a chim. Bomb puahhnawh nak in ralhrang 3 an thih caah hriamngan zong an duhpoh in a tu le tu an kah, a thi mi 3 hna cu umhmun an khuarnak lei ah an kal pi hna. “Aluan cia May 13 lio zongah rallamsial mi SAC ralhrang hna le PDF kar ah kahdohnak a chuak i ralhrang 2 an thih pin ah 5 hliam an tuar” tiah Bago Region PDF nih an langhter.
Kani Peng Ah Kahdohnak A Chuak, SAC Ralhrang Bawi Telh In 8 An Thi; Sagaing ramṭhen, Kani peng, Min-mah(မင်းမ) khua pawng ah kahdohnak a chuak i SAC ralhrang bawi (Captain) pakhat telh in 8 an thi, tiah tualchung hriamtlai in chimphuannak nawlngeitu Ko Pyi Aung nih a chim.
May 14 le 15 ah rallam sialmi SAC ralhrang thazaang 200 tluk cu Minmah khua pawng an phak ah mipi hriamtlai ṭangṭi phufonh nih an kah hna. Cu kahdohnak ah SAC ralhrang bawi (Captain) pakhat telh in 8 an thi i May 15 thlichia a daih hnu zanlei sang ah an ruak mei in an khangh hna, tiah theih a si.
“Nihnih chung kahdohnak a chuak i, SAC lei a thimi ruak pawl cu May 15 zanlei sang ah an khangh hna. a luancia thla 3 lio khan luhhnawh dingin timhlamh a si hnu ah kan luhhnawh hna hi a si” tiah SAC thawngthanghnak nih a langhter.
May 11 lio khan Yinmarpin peng le Kani peng chung ah rallam a sialmi SAC ralhrang pawl cu kahdoh an si cang. Cu ninga chung kahdohnak ah SAC 80 leng an thi cang i, Mipi hriamtlai 3 nih ram le miphun caah an nunnak an pek, tiah Kywatlonegyi (KLG) Battalion hruaitu nih Khit Thit ah a chim.
Wetlet Peng Pah-kah-phah Lutlai Meithal In A Kap Tu Tiah Ruahmi PDF Minung 2 NUG Nih Kum 10 Thong An Thlak Hna; Sagaing ramthen Wetlet peng Sa-taungkyi khua Pah-kah-phah lutlai Mung San cu meithal in a kaptu tiah ruah mi GZ Special Task Force minung 2 hna cu Sihni hlan nak nawl pek duh lo in NUG nih kum 10 veve thongthlak ding in bia an ceih piak hna tiah chungkhar neihniam nih an chim.
Kum 10 thongthlak a tong mi GZ Special Task Force minung 2 hna cu Pho Ni Toe (kum 27) le Ei Toe (kum 18) an si. “Meithal in a kap tu tiah ruah mi minung 2 hna cu kum 10 veve thongthlak ding in bia an ceih piak hna. An mah cu sihni hlan nak nawl zong an pe hna lo, Pho Ni Toe a nupi zong a vapa thilri na kuat tiin khua chung in an chuah. Mah hna pahnih cu NUG tang Tit-shing palik sakhan ah an chiah hna” tiah Pho Ni Toe chungkhar pakhat nih a chim.
Pho Ni Toe le Ei Toe cu dothlennak thok ka in a cawlcang mi an si i GZ Special Task Force ah chungtel zong an si. GZ Special Task Force cu SAC ralhrang he zong kahdohnak a tuah zungzal tu an si. NUG cozah nih GZ Special Task Force lutlai a si mi Ko GZ zong tlaih dingin Warrant an chuah tiah kan theih. Credite; Lungmili Post