Myingyan-Natogyi Lam Kahdohnak Ah SAC Ralkap 6 An Thi
====================
Mandalay ramṭhen, Myingyan pengkomh Taungthar peng Myingyan le Natogyi lam cung um Yadana khua ah ah aa dinmi SAC ralkap hna cu drone in bomb kan thlakhnawh hna i ralkap 4 an thi, tiah Myingyan District Drone Strike in ṭuanvo ngeitu pakhat nih Khit Thit Media ah a chim.
May 8 ah Yadanapung khua ah a ummi SAC ralkap cu Myingyan District Drone Strike nih bomb lung 1 an thlakhnawh hna i ralkap 4 an thih pinah 5 hliamhma an pu. Hliamhma pumi hna cu mizaw phorhnak motor nih a rak laak hna, tiah Khit Thit Media nih a ṭial. “May 9 ah Thinpwint khua lamṭhen ah chekhlatnak a tuahtu SAC ralkap zong kan kah ṭhan hna i ralkap 2 an thih pinah, hliamhma pumi zong an tam. An motor hna zong a rawk,” tiah Myingyan District Drone Strike in ṭuanvo ngeitu nih cun a chim chap.
Magway Ramṭhen, Aunglan Khua Ah Thlichia Hrang i Inn 34 An Rawk! Magway ramṭhen, Aunglan khua myopaw sang cheukhat le khuate ah May 9 zanlei suimilam 5:00 in thlichia a hrang i, thingkung le meitung an kiah ruangah inn tam ngai an rawk, tiah theih a si. “Atu lio thlichia(cyclone) an timi hi si loin thlichia sawhsawh a si. A voikhatnak a hran lio ah a hmual a faak ngai nain minung a thimi le aa hliammi cu kan um hraw lo,” tiah tualchung mi pakhat nih a chim.
Thlichia a hran ruangah Aunglan khua um Zekone sang, Yepin, Yehai, Shwetuhtey, Sitaung le Uyin khua in inn 34 le phungki sianginn an rawk, tiah theih a si. Thlichia nih a hrawhmi inn le lo cu meithattu, mi bawmchantu le tualchung mi hna i bawm in an thianhhlimh. Thlichia nih inn a hrawhmi inn ngeitu hna zong hmundang ah zam loin an inn tu an remh cio hna i, khua an sa ko hna, tiah theih a si.
Rakhine Ram Ummi Minung 300 Leng Cu Thlichia Le Tilet A Tho Kho Ding Mi Hrial In An I Ṭhial; Rakhine ramkulh, Paukdaw peng Ngabi tikulh hruang ummi minung 300 leng cu Kyingkhuaimaw khua ah thlichia le tilet a chuak kho mi hrial ding in an i ṭhial, tiah theih a si. Ngabi tikulh cu Sittwe khua le Paukdaw peng karah a ummi a si i Kaladan tiva ah a ummi tikulh a si. SAC kuttang khua caan tahnak zung nih May 10 in 18 tiang Bangladesh rili lei in thlichia le tilet a tho kho i cu nih cun Rakhine ramkulh zong a hnorsuan khawh, tiah cathanh an chuah.
Thilchia le tilet a tho khomi a si ruangah a hlankan in timhtuahnak ngeih cio dingin Rakhine rammi hna cu AA nih ralrin an pek hna, tiah theih a si. Thlichia thawh lai nak kong he pehtlai in Chin ramkulh khuapi Hakha Khrihfabu Biakinn cheukhat zong ah mizapi ralring tein um cio dingin thawng an thanh, tiah theih a si.
Sagaing Peng Um Palik, Pyusawhti Sakhan Le Myaing Peng Rallam A Sialmi Ralkap Kahdohnak Ah 4 An Thi; Sagaing ramṭhen, Nyaungpinwin palik sakhan le Malaydaw khua um pyusawhti sakhan cu drone in bomb kan thlakhnawh caah SAC ralkap lei in 2 an thi, tiah YOUNG WOLF L.P.D.F in ṭuanvo ngeitu pakhat nih a chim. May 1 chun suimilam 12:50 hrawng ah Nyaungpinwin palik sakhan cu drone in bomb an thlak pin ah hriamngan in an kah caah ralkap 5 hliamhma an pu, tiah theih a si.
May 3 zanlei suimilam 5:00 hrawng ah Malaydaw khua um pyusawhti sakhan zong drone in PDF nih bomb an thlakhnawh caah ralkap 2 an thi, tiah theih a si. “Nyaungpinwin sakhan kahdohnak ah ralkap 5 hliamhma an pu. Malaydaw pyusawhti sakhan kahdohnak ah ralkap 2 an thi,” tiah YOUNG WOLF L.P.D.F in ṭuanvo ngeitu nih cun a chim. Cu kahdohnak ah YOUNG WOLF L.P.D.F၊ Sadaung Revolution Army၊ Kyaukse pengkomh Pah Kah Phah le Phoenix (SGG) hna i bawm in an kah hna, tiah theih a si.
Cu pin ah Magway ramṭhen, Myaing peng ah rallam a sialmi SAC ralkap cu bomb in kan puahhnawh hna caah palik sergeant 1 le pyusawhti 1 an thi, tiah Myaing Pah Kah Phah in ṭuanvo ngeitu pakhat nih a chim. May 2 zing suimilam 6:00 hrawngah Tayetkan khua le Sukantaik khua karah pyusawhti cu rallam an sial lio tiin thawng an kan pek caah bomb in an va puahhnawh hna i, palik sergeant 1 le pyusawhti 1 an thih pin ah 1 hliam fak ngai a tuar, tiah theih a si. Cu kahdohnak ah Myaing PDF Battalion 1, Company 1 le 2(Kanung). TYK Guerrilla le Pyituh Aman phu hna i bawm in an kah hna, tiah theih a si.Credite; The Chin Post