Kalaywa Peng Ah Hmunkhat Ah Rallam A Sialmi SAC Ralkap Le Palik An Kah Hna I 41 An Thi, 40 Renglo An Tlau
====================
Sagaing ramthen Kalaywa peng ah hmunkhat ah rallam a sialmi SAC ralkap le palik hna cu mipi vengtu ralkap nih an kah hna i SAC ralkap/palik 41 an thi i 40 renglo an tlau tiah NUG nih an thanh. June 16 zinglei suimilam 8 hrawngah Taungoo hrambunh No.11 palik sakhan in palik mawtaw 4 le SAC ralkap le palik 158 hna cu hmunhma an i thial i Kalaywa peng Sakhangyi khua pawng an phak ah mipi vengtu ralkap hna nih an kah hna hi a si. Hriamnam tam ngai zong an lak khawh tiah theih a si.
SAC ralkap le palik nih an i citmi Faw mawtaw 2 cu mei in an khangh. MA-11 pahnih, G-3 pahnih, MA-11 kuanbawm pathum, G-3 kuanbawm paruk, MG-3 pakhat, MA-7 60MM miakpi pakhat, 60MM kuanpi hna, RPG kuanpi pa-nga, kutcheh bomb pa-nga, 38 Webly Wesson meithal ngan pakhat, Jammer pakhat, M-14 bomb pahnih, kuangfang le a dangdang hna zong an lak khawh tiah NUG nih an thanh.
Karenni le Thai ramri ah SAC ralkap le KNLA phufonh hna karlak ah June 13 thawk in June 16 tiang kahdohnak a chuak i SAC ralkap sakhaan 3 le Mese palek sakhaan hna KNLA phufonh nih an lak i Mese sakhaan ah KNLA phufonh pawl nih hmunhma an khuar khawh cang tiah Karenni kahdohnak lei rianngeitu nih Mizzima ah a chim.
“Mese sakhaan ah kan ralkap pawl an lut cang. Sakhaan 2 cu a tang rih. 14 sakhaan (BP-14 sakhaan, Metanwe sakhaan le Taunghla sakhaan hna cu kan lak khawh cang. Cun Mese sakhaan zong an thianh cang” tiah Karenni kahdohnak thawngzamh phu biachimnak nawl a ngeitu Khu Nge nih Mizzima ah a chim.
Kahdohnak pawl chung ah, June 14 ah SAC ralkap 7 cu Thai ram lei ah hriam he an zaam tiah kahdohnak chung i Commander pakhat sin in thawng kan theih tiah a chim. Kahdohnak ruang ah Thai ram lei a zaam mi SAC kuttang cozah rianṭuantu pawl, palek chungkhar pawl zong an i tel tiah theih a si.
“7 hi cu a fiang. Kahdohnak a chuah hnu an sakhaan kan va kai tik ah an luat ti lai lo ti aa thei mi pawl an si lai. Khoika dah an um cang ti zong kan thei ti hna lo. Thai lei an phan tiah thawngpang cu kan theih. Cuka hmunhma hrawng khuami hna cu Thai ram lei an zaam dih cang. Palek chungkhar zong an i tel. Mese G.M zong aa tel” tiah a chim.
Kahdohnak chung ah SAC Metanwe sakhaan in 120MM 2, Taunghla sakhaan in 60MM 2, Type 81 meithal zuun 1, a sau mi 1 le kuan pawl an lak khawh tiah Karenni kahdohnak lei thawngzamh phu biachimnak nawl a ngeitu nih Mizzima ah a chim.
Kahdohnak chung in SAC ralkap a nung in an tlaih mi hna an um bantuk in a thi mi zong a um nain cazin a fiang in theih a si rih lo tiah a chim.
“Metanwe sakhaan ah hriamngan 2 a um. A pahnih ning tein kan lak khawh. Cun Taunghla sakhaan in 60MM 2 le 81 a tawi mi 1 le a sau mi 1 kan ngah. Kuan cu tam lak kan lak khawh. SAC ralkap a nung in kan tlaih mi hna zong an um. A cheukhat an thi. A fiang in kan thei rih lo” tiah a chim. Kahdohnak aa thawk ni June 13 in June 15 tiang chun ah SAC nih vanlawng in a rak hlat i kahdohnak zong a tuah tiah theih a si.