SAC Ralkap Nupi Nih Hriamngan A Kah Lioah A Puah Hnawh Hna I Hliam A Tuarmi Le A Thimi 40 Hrawng An Si
==================
Bago ramṭhen Htantapin peng Zayetgyi khua hrambunh ke-ralkap (khah-lah-yiah) 73 sakhan ah SAC ralkap an nupi le hna cu raldoh an cawng i a tak in hriamngan kah an timh lioah a puak. Hriamngan a kaptu SAC ralkap nupi Tin Tin Maw telh in ralbawi le ralkap sawhsawh tam ngai an thi tiah Khit Thit Media nih a ṭial.
SAC ralkap nupi hna cu meithal kah le hriamngan kah tiangin an chimh hna i a herhning in kahdohnak le hmun dangdang ah an hman hna tiah theih a si. Bago ramṭhen Htantapin peng Zayetgyi hrambunh ke-ralkap 73 sakhan ah SAC ralkap nupi pawl raldoh an cawnpiak hna i a tak in hriamngan kah hmuhsaknak dingah PDF an um lai ti an zumhnak khuate hna cu an kah hna, culioah hriamngan hi a puakmi a si.
Hliam a tuarmi le a thimi 40 hrawng an si tiah theih a si. Hi thil hi June 8 ah a cangmi a si i SAC nih a lengah chuahter hrimhrim lo dingin an kham caah ni 4 a rauh hnu lawngah Media nih an theih. Hmanthlak: Hriamngan puaknak in a thimi SAC ralkap nupi Tin Tin Maw.
NUG nih No. 1 ralram hmun tiah an sak mi Sagaing ramṭhen, Magway ramṭhen, Mandalay ramṭhen le Shan ramkulh chaklei ah May thla chung lawng ah kahdohnak voi 500 a chuak i, SAC ralkap 449 an thi, tiah NUG runvennak zung nih an thanh.
Cu kahdohnak ah cun SAC ralkap 681 hliamhma an pu i PDF in ralkap 41 nunnak a liam pinah 113 hliamhma an pu ve, tiah NUG runvennak zung nih June 12 ah an langhter i PDF lei nih SAC ralkap hriamnam phunphun zun 24 telh in zen-kuan tam ngai an chuh hna, tiah an langhter chih.
May thla chung kahdohnak cu No. 1 Military Region Commander kuttang um PDF, mipi vengtu(Pah Kah Phah) le EROs hna i bawm in SAC ralkap pawl cu an kah hna, tiah NUG runvennak zung nih cun an thanh. Taninthary Peng, Thidae khua ah a um mi SAC ralkap sakhaan ah hriam le riahcaw chanh ding in a kal mi SAC ralkap pawl kahdohnak ah SAC ralkap 6 nak tlawm lo an thi tiah Myaing peng PDF B02 sin in thawng theih a si.
June 12 zinglei sml 11:00am hrawng ah Taninthary peng, Thidae khua ah a um mi SAC ralkap sakhaan ah eidin le hriam chanh ding in a kal mi SAC ralkap Infantry 561 pawl cu KyuiHtingkone le Taungbing khua karlak ah PDF chungtel pawl nih an kah hna tiah theih a si.
Kahdohnak chung ah SAC ralkap pawl bomrap lung 2 in an puah hnawh hna caah SAC ralkap 6 an thi, kahdohnak sml 1 hrawng a rau, SAC ralkap hi 60 hrawng an si lai tiah Myaing PDF nih an langhter. Myaing pengkomh PDF B02 le Taninthary pengkomh PDF hna bawm in kahdohnak an tuah hi a si tiah theih a si.