Good News; Mipi kan theih duh bik mi kahdohnak thawngpang tha kho taktak bak a si ko hih!!

February 2, 2023February 2, 2023 Cherry News

Kahdohnak Thawngpang Tha
=============
Tanintharyi ramṭhen, Kawthaung peng Khamaukkyi peng ṭhen ah pyusawhti hruaitu chang “San Tin” cu, kan fimhlawm i a meithal M16 A1 zun 2 le zen-kuan tampi kan chuh, tiah Kawthaung peng PDF in ṭuanvo ngeitu pakhat nih a chim.

Febuary 1 zinglei sml 6:20AM hrawng ah Khamaukkyi peng ṭhen, Mayan khuami pyusawhti hruaitu chang “San Tin” cu a inn ah Kawthaung PDF nih an thah i M16 A1 zun 2, kuanbawm pakhat, kuan 28 le nam pathum an chuh, tiah theih a si.

Pyusawhti “San Tin” ruak char ding in SAC ralkap 60 hrawng cu motor 2 in Khamaukkyi khua in Mayan khua lei an kal lioah Chanthar le Seikphu khua kar ah bomb in puahhnawh an tong i SAC ralkap 8 an thi, 6 hliamhma an pu, tiah kan theih.

Cu kahdohnak ah Kawthaung peng PDF nih kahdohnak kan tuahmi a si i, Kawthaung peng tualchung mi he pehtlaihnak a ngei lo, tiah an langhter.

Sentari cawnghnak lei ah a kalmi SAC ralkap pakhat cu, kan kahthah i a meithal MA-1 zun khat zong kan chuh, tiah Kyaukhtu PDF in ṭuanvo ngeitu pakhat nih a chim. January 30 zanlei sml 6:15PM hrawng ah Khah Lah Yah 274 Battalion in rallam a sialmi SAC ralkap chung in ralkap pakhat cu, Gangaw pengkomh Battalion 8 nih sentari an cawnghnak lei a kal caah an kahthah, tiah theih a si.

“Zeiruang ah dah sentari kan cawnghnak lei ah a rat ti cu kan hngal lo. Zu a ri tukmi mui cu a lo ko. A meithal he a rat caah kan kah thah,” tiah Kyaukhtu PDF(YRPA)in ṭuanvo ngeitu pakhat nih cun a chim.

A luancia January thla zong ah Saw peng ah rallam a sialmi SAC ralkap pawl cu, Gangaw pengkomh Battalion 8/9, Saw PDF Battalion 2 le Pah Kah Phah hna i bawm in an kah hna, tiah theih a si. Nithum chung kahdohnak ah SAC ralkap 9 an thi i, 2 hliamhma fak ngai an pu, tiah YRPA nih an langhter.

Mandalay ramṭhen, PyinOoLwin pengkomh Tapaikkyin(သပိတ်ကျင်း) peng Zayetaing(ဇရက်အိုင်) khua ah Pyusawhti pakhat cu, January 31 ah kan rak thah. A ruak rak char ding in a kalmi SAC ralkap pawl cu bomb in kan puahhnawh hna caah ralkap 3 an thi, tiah “Lieutenant Lin Yone” nih a chim.

“Pyusawhti pa a ruak a char te lai ti kan hngalh cia caah bomb kan hmanh. Motor 2 nih an ra i bomb kan hmanhmi pawng an phak ah kan puahhnawh hna i SAC ralkap 3 an thi,” tiah a chim chap.

Cu pin ah Mandalay ramṭhen, Matayar peng ah rallam a sialmi SAC ralkap 80 hrawng cu, Febuary ni 1 chun ah sniper in kan kah hna caah SAC ralkap pakhat a thi, tiah “Lieutenant Tey” nih a chim.

Sniper in kah an ton hnuah SAC ralkap pawl cu Zikone khua chung ah an lut i umhmun an khuar. SAC ralkap pawl cu Matayar peng chungah rallam hmun 4 in an sial, tiah theih a si.

Cu ṭhiamṭhiam in Patheinkyi peng Kyuaiyekone khuami SAC ralkap thawng petu Phyu Sin Thant (kum 20) cu January ni 31 zing sml 11:00AM hrawng ah kan kahthah, tiah Red Dragon-Matayar phu in ṭuanvo ngeitu pakhat nih a chim.

SAC ralkap thawngpetu Phyu Sin Thant cu, SAC ralkap he vote cazin le chungkhar cazin an laak pin ah PDF ralkap cheukhat zong SAC ralkap a tlaihter hna. Annih chungkhar hi SAC ralkap kuttang an si i, an hman ngaingaimi an si, tiah theih a si.

Sagaing ramṭhen, Wetlet peng khuate a khangtu SAC ralkap pawl cu Febuary 1 zing sml 9:00AM ah kah an ton caah 6 an thi tiah theih a si. Makyitone(မကျီးတုံ) khua a khangtu SAC ralkap 50 hrawng nih, tualchung mi an thilri mansung an firpiak hna i, Pinzin khua lei an kal lioah PDF phu 2 nih lamhruang in kan kah hna, tiah People’s Serveant Revolution-Wetlet in ṭuanvo ngeitu pakhat nih a chim.

“Minutes 30 leng kahdohnak a chuak i SAC ralkap 6 hrawng an thi. Drone in ngiatthlainak kan tuah hna tikah SAC ralkap ruak zong hmuh khawh a si. Kan Drone tu cu SAC ralkap nih an kan kah thlakpiak,” tiah a chim chap.

Cu kahdohnak ah Wetlet peng PDF le People’s Serveant Revolution-Wetlet phu hna i bawm in an kah hna i anmah lei in a thimi le aa hliammi an um lo, tiah theih a si.

Nihin February 1, chun suimilam 11 hrawng ah SAC ralkap nih raltuknak Jet Fighter pahnih le raltuknak MI – 35 Helicopter pakhat in Thantlang khua ummi Chin ralkap pawl a kah hna, tiah kan theih.

Raltuknak vanlawng nih cun bomb voi 6 hrawng a thlak i MI-35 Helicopter nih Machine gun in a kan kah len, bomb a thlaknak hmun hi TBC Biakinn hrawng ah a si, tiah a hmunhma ummi pakhat nih The Chin Post a kan chimh.

Chin nuhrin covo a kelvengtu phu Chin Human Right Organisation(CHRO) nih an langhter ning ah, SAC ralkap nih uknak an laak hnu kumhnih chung ah Chin ramchung milu hmunli ṭhen hmunkhat cu mahle umnak hmun chuahtak in an i ṭhialkam i, inn 2100 hrawh a si tiah an langhter.

Kumhnih chung ah hin minung 421 leng nunnak a liam i, cu chung ah tualchung mi(civilian) 285 an thi. Cu lak ah cun nu 72 le ngakchia 25 an i tel. Cu pin ah tlaihkhih a tong mi 1431 an um, tiah an langhter. CHRO langhter ning ah uknak laak hnu in Chin ramchung ah inn 2100 cu a rawkral.

Inn tam deuh hi SAC nih a khangh in an khangh. Innlo a rawkralmi lak ah hin Thantlang cu innlo a rawk tam biknak a si. Mipi umnak inn pinah Biakinn 50 zong an rawkral.

SAC ralkap cawlcanghnak ruangah ramchung mi tampi nih mahle umnak hmun an chuaktak i, atu dirhmun ah ramleng chuaktak in ralzam dirhmun a phan mi minung 50,000 an phan. Hi pin ah ramchung ah innlo chuaktak in aa ṭhialkam(ralhrial) mi 70,000 an um i an dihlak in Chin ramchung minung hmunli ṭhen hmunkhat cu an i ṭhialkam tiah CHRO nih an langhter.

Mindat peng Ung khua chungah SAC ralkap nih hriamngan an kah caah khuami 4 hliamhma an pu, tiah theih a si. January 31 zanlei sml 3:30 hrawngah Khah Lah Yah 274 Battalion ralkap hna nih, hriamngan duh poh in an kah caah Ung khua chung ah hriamngan kuan a tla, tiah tualchung mi pakhat nih a chim.

“Zanlei ah SAC ralkap nih hriamngan an kahmi thawng kan theih i hriamngan kuan cu Ung khua ah a tlak caah minung 4 hliamhma an pu i, motor pakhat le inn zong an rawk,” tiah The Mindat Post ah a chim. SAC ralkap nih duh poh in hriamngan an kah caah Ung khuami kum 40 nu pakhat le kum 15-20 kar nu 3 hliamhma an pu i an hliamhma a faak ngaimi zong an um, tiah theih a si.

SAC ralkap nih January thla chungah Mindat peng ah vanlawng in voi 10 hrawng kahdohnak an tuah pinah hriamngan zong duh paoh in an thlah, tiah theih a si.

January thla chungah SAC ralkap nih Mindat peng ah hriamngan duh poh in an kah ruangah tualchung mi 9 hliamhma an pu i inn le biakinn 10 nak tlawm lo a rawh pinah motor 2 zong a rawk, tiah theih a si.

Hakha peng CDF nih kum hnih chung ah kahdohnak voi 166 kan tuah i cu kahdohnak ah SAC ralkap 510 an thi, 222 hliamhma an pu. Hakha CDF lei in ralkap 19 nih ram le miphun ca ah an nunnak an pek i, 41 hliamhma an pu, tiah nihin Febuary 1 ah cathanh an chuah.

Ram le miphun luat nakding ‘Pau dohthlennak’ ah i tel ve cio dingin le khuapi chungah kahdohnak tuah cang dingin an langhter.

Dohthlennak ah hnahnok mi tuahsernak poh kan doh lai i SAC nih thimnak tuah an timh mi ah teltumnak a ngei mi le thimnak hlawh a tlin nakding ah bawmchantu poh fak piin dan kan in tat hna lai, tiah cathanh an chuah.

SAC nih nawlngeihnak an lak hnu in a lam kip in Hakha peng chungah SAC ralkap uknak duhlonak langhternak ah minung 5,000 leng, CDMer 4,000 leng le hriamtlai 3,000 leng nih ram le miphun luatnak ding caah ralkap kan doh cuahmah, tiah an langhter.

Nihin Feb 1, Bangkok Ah SAC Ralkap Uk Duhlonak An Langhter, SAC nih nawlngeihnak an lak kum 2 tlin ni, nihin Febuary 1 ah Thailand ram um Myanmar rammi hna nih Bangkok khua, Embassy of Myanmar zung hmai ah SAC ralkap uk duhlonak an langhter.

Ralkap uk duhlonak a langhtertu hna nih mizapi sinah nawlngeihnak pek ṭhan ding, hramhram uknak a hram in bongh ding le phung lut loin tuah timhmi thimnak hrawh ding in an au, tiah theih a si.

Aung San Suh Kyi le President Win Myint zuk i put in lam an zawh i NUG cohlannak angki an i hruk pinah puan sen zong an lu ah an ṭem, tiah theih a si. Bangkok ah lam a zawhtu hna hi Thailand ram ummi Myanmar rammi 500 hrawng an si, tiah theih a si.

Mindat Peng Ah SAC Ralkap Nih Hriamngan An Kah Caah Ung Khuami Nu Pali Hliamhma An Pu, Mindat peng Ung khua chungah SAC ralkap nih hriamngan an kah caah khuami 4 hliamhma an pu, tiah theih a si. January 31 zanlei sml 3:30 hrawngah Khah Lah Yah 274 Battalion ralkap hna nih, hriamngan duh poh in an kah caah Ung khua chung ah hriamngan kuan a tla, tiah tualchung mi pakhat nih a chim.

SAC ralkap nih duh poh in hriamngan an kah caah Ung khuami kum 40 nu pakhat le kum 15-20 kar nu 3 hliamhma an pu i an hliamhma a faak ngaimi zong an um, tiah theih a si. SAC ralkap nih January thla chungah Mindat peng ah vanlawng in voi 10 hrawng kahdohnak an tuah pinah hriamngan zong duh paoh in an thlah, tiah theih a si.

Yangon Le Mandalay Ah Silent Strike An Tuah, Yangon khuapi ah SAC ralkap uk duhlonak langhternak can ah mizapi cu dai tein kan um i zalam cungah motor le minung zong kan chuak lo, tiah tualchung mi hna nih an chim. Nifatin in mi chawkvai an tam biknak Yuzana Plaza hmaiah zing sml 9:50 in mizeihmanh an um ti lo i, motor zong a lutchuak an um ti lo, tiah theih a si.

Cu ṭhiamṭhiam in nihin Febuary 1 silent strike tuah caan, zing sml 10:00 a tlin hlan in Mandalay khuapi zalam thluan ah minung, cycle le motor zong aa chawkmi an um ti lo, tiah tualchung mi hna nih an chim.

Zing sml 8:00 hrawng in zalam cungah mi zeihmanh an chuak ti lo. Dai tein anmah le inn cio ah an um i SAC a dirkamhtu sipin zung rianṭuantu hna lawng lam an zawh, tiah Mandalay khua ummi hna sinin theih a si.

SAC ralkap nih kum hnih chungah tlaihkhihnak le hriamngan kahnak an tuah ruangah tualchung mi 14 an nunnak a liam pinah 6 hliamhma an pu. Minung 374 tlaih an tong i inn 30 mei in an khangh, tiah an cathanh ahcun an langhter.
Ram le miphun luat nakding ‘Pau dohthlennak’ ah i tel ve cio dingin le khuapi chungah kahdohnak tuah cang dingin an langhter.

PDF, CDF le NUG Dirkamhnak le Dohthlennak Kum 2 Tlin Lamzawhnak Mizoram Ralzaam Camp ah an Tuah, Myanmar Dohthlennak kum 2 tlun camtuak nihin February 1 zinglei ah Mizoram, Lunglei khua, Thaizawl ralzam camp ah lamzawhnak an tuah hna, tiah thawng kan theih.

Lamzawhnak ah, “PDF, CDF le NUG dam tein um hram u,” timi thlacampiaknak catar an i thlir. Hi ralzaam camp ah a ummi ralzaam tam u hi Matupi peng chung mi an si hna.