Good News; Min Aung nih mipi sinah thawngpang tha taktak thanhnak a tuah mi cu!!

Ramdang mi telh in thongtla 6,000 deng an luat
==========================
Tuni (National Day) ah thongtla 6,000 deng an luat tiah SAC nih a thanh. Cu chung ah ramdang mi 4, Article 505 in sualphawtnak hnawh piak mi lemcang 11, biakamnak he thlah mi 2 an i tel tiah a thanh. SAC cu a hlan hramhram uktu pawl bantuk in ni sunglawi caan hna ah ramdang hneknak a um lio ah ramkhel buainak ruang ah a tlaih mi pawl hna kha a thlah ṭhan hna.

Asinain Min Aung Hliang hruai mi SAC nih ramkhel buainak ruang ah a tlaih mi U Kyaw Min Yu, U Phyo Zeya Thaw le adang mipi 2 kha a thah hna caah a hlan hramhram uktu pawl nak in a hrang deuh mi a si kha a langhter. Mipi nih kan thim mi cozah thlak in hramhram in uknak a lak caan hi kum 2 a rau deng cang i duhlonak a langhter mi pawl hmanh kha meithal in a kaptu SAC cu ram tampi nih an doh.

SAC nih vanlei in kahdohnak a tuah ruang ah hngakchia tampi zong an nunnak a liam. AAPP nih November 16 ah a thanh mi cazin ning ah SAC nih a tlaih mi 13,000 leng an um i a thah mi 2,500 deng an um cang.

88 Siangngakchia hruaitu Mya Aye, NLD hruaitu Dr. Myo Ngunt le catial thiam Maung Thar Cho hna cu SAC ralkap nih thonginn In an chuah cang hna tiah theih a si. 88 Siangakchia Hruaitu Mya Aye, Thonginn In A Chuak Lai Tiah Thawng A Leng Ko Nain An Inn A Phan Rih Lo
88 siangakchia hruaitu Mya Aye cu nihin November 17 ah thonginn in a chuak cang lai tiin thawngpang a leng, tiah theih a si.

88 siangakchia hruaitu Mya Aye fanu nih, “Ka pa cu thonginn in a chuak cang lai, tiah kan theih nain atu tiang cu kan inn a rak phan kho rih lo. Rian dang a tam caah zaanlei lawng ah a chuak kho lai tiin an chim than,” tiah amah pumpak social media ah a tar. Dam tein ka pa kan inn a phanh hnu lawngah zaangdam tein kan thaw kan chuah kho lai. Ka pa ca le kan chungkhar ca ah thlaza a kan campiaktu nan dihlak cungah lunglawmhnak tampi kan ngei, tiah amah pumpak social media ahcun a tar langhchih tiah theih a si.

88 siangakchia hruaitu Mya Aye cu SAC nih nawlngeinak an lak 2021 Febuary 1 zaan ah a inn ah SAC ralkap nih an rak tlaih i, section 505(c) in SAC nih taza an cuai hnuah Insein biaceih zung nih kum 2 thong thlak ding in bia khiahnak an rak tuah piak. SAC nih nihin November 17 ah thongtla pa minung 5,098 le nu 676 an dihlak 5,774 kan luatter hna lai, tiah an thanh tiah theih a si.

Nihin ah Thongtla tampi an chuak ko, lawmh awk ngai a si, Sihmanh sehlaw dai tein zalam cung ah sandah piah mi mibu an rak kan thah mi hna vialte, hramhram sualpuhnak in tlaih a tong mi pawl an hrem hna lio ah a thi mi vialte, tuksapur in thah a rak tong mi, tisa toih le mei kanghnak in thah a tong mi sualnak ngei lo kan pasal nusaltha hna vialte, Raldohnak vanlawng in Bomb thlak hnawh ruang ah sualnak ngei lo mipi a thi mi liangluang hna vialte teh an nungthan in an dam tha kho ti maw?

Thongtla chuah ter le luat ternak men nih sualnak kha a chilh kho lai lo, aa silhnalh kho lai lo, cu bantuk in Thongtla zeimawzat chuah an si nak men ruang ah kan dothlennak hnu a tolh hlei lai lo.Sual biaceihnak, a sualnak ruang ah dantatnak, Hrithlai in thahnak a ton ve i kan duh mi uknak phung kan hmuh hlan chung hnu tolh lo tein,,Hi thongtla chuahter, luat ter nak in silhnalh aa timh zong ah, dehkhat te hmanh ram mipi hnu kan tolh awk a si lo.

ASIAN le UN hmaiphiah khawhnak lam a kawl len zong ah a ngah lo, kan thisen man a tamtuk cang, nitin te nunnak a pe cang mi hna thisen a au peng. Crd-Cungdawt

Tuluk-Myanmar Ramri Ah Kahdohnak A Chuak I Motor Remhtu Ngakchia Pakhat A Nunnak A Liam, Pakhat Hliamhma A Pu, Tuluk-Myanmar ramri, Muse Cinsankyaw(ကျင်စန်းကျော့) ah SAC ralkap le a ho ti theih lomi hriamtlai phu karah nizan November 16 zaanlei sml 1:30 hrawngah kahdohnak a chuak i, motor remhtu ngakchia pakhat cu hriamngan kuan nih a khen caah a nunnak a liam, pakhat hliamhma a pu, tiah ramri um tualchung mi hna sinin theih a si.

“Motor remhnak dawr a tuahtu pa pakhat sinah motor remh rian a ṭuanmi ngakchia hna le Muse motor remhnak ah rian a ṭuantu ngakchia hna cu midang motor a rawkmi remhpiak dingin an kal, lam tanṭim ah a rawkmi motor an remh cuahmah lioah hriamngan kuan nih a tlak hna caah ngakchia pakhat a nunnak liam hi a si,” tiah tualchung mi pakhat nih a chim.

Ramri ah thil a phurmi pakhat nih, “Hpayarkone(ဘုရားကုန်း) ah kahdohnak a chuak i, hriamngan kuan nih motor a remhtu ngakchia pakhat a khen caah a nunnak a liam, pakhat hliamhma a pu,” tiah a chim. A nunnak a liammi ngakchia pakhat le hliamhma pumi hna hi kum 16 tluk ngakchia an si. Hriamngan kuan nih Tuluk motor pakhat le SAC ralkap motor pakhat a khen ve hna, tiah mithmutu motor khal pakhat nih a chim.

Kahdohnak a chuah lioah Tuluk le Myanmar ramri gate cu an kham hna nain, zaanlei in cun motor lutchuak hna cu an kalter ṭhan hna, tiah tualchung mi hna nih an chim. Cu kahdohnak hmunram cu Pyituhsit, KIA, TNLA, MNDAA, SSPP/SSA hna an cawlcanghnak hmunram a si, tiah tualchung mi hna nih an chim.

Mayangone No. 3 Sang Chung Inn Vialte Cu SAC Ralkap Nih Nithum Chungah An Ṭhialter Dih Hna, Yangon ramṭhen, Mayangone No. 3 sang chung, Kanthar Zeyung lam um inn 100 leng cu mah hmunhma a si lomi hmun ah sakmi a si tiin SAC ralkap, sipin le penguk zung hna nih an kan ti i nithum chungah ṭhial dih dingin nawl an kan pek, tiah sang chung a ummi pakhat nih a chim.

“Mah hmunhma a si lomi hmun ah sakmi inn an si hrimhrim lo. Cheukhat cu innhlang in a ummi zong an um i cheukhat cu an har caah inn a pawnmi zong an um. SAC ralkap nih minsen an kan thutter i zeiruang ah dah kan thut lai tiin kan hal hna zong ah an chim duh lo, a hro tuin a kan hrocer. A hnuah kan mah hmun a si lomi ah sakmi inn a si tiah tialmi catlap cungah minsen a kan thut termi cu an kan hmuhsak,” tiah a chim chap.

Nawl kan chuahmi nan zulh lo ahcun upadi ning in kan in tawlrel hna lai. Nithum chungah nan inn nan ṭheh hna lo ahcun kan hrawh dih lai an kan ti, tiah sang chung a ummi pakhat nih cun a chim. Mingalardone peng, No. 5 sang ah a um mi inn 10,000 tluk zong SAC ralkap nih a cozah hmunram a si tiin sangmi hna cu a tlai bik November 18 hlan ah nan ṭhial dih lai tiah SAC ralkap nih nawl an rak pek cang hna tiah theih a si.

Myanmar Ram In Aa Thawhmi Rohingya 100 Leng Indonesia Rili Ah Tlaih An Tong, Myanmar ram nitlaklei in tilawng in a kalmi Rohingya ngakchia 22, nu 36 le pa 61 cu Indonesia ram an phanh ah Indonesia nawlngeitu hna nih an tlaih hna i Bluka Teubai khuate ah an chiah hna, tiah theih a si.

Indonesia nawlngeitu hna nih, Rohingya miphun hna hi Myanmar ram in a rami an si ṭheu lai, tiah an zumh. A luancia March thla lio zong ah Rohingya 114 cu Aceh ramkulh Bireuen pengkomh pawngah an rak tlaih cang hna. A luancia 2017 August ah Myanmar ralkap nih rallam an ral sial caah Rohingya minung a sing in Bangladesh ram ah an rak zam. Cu ruangah Rohingya mi hna cu Muslim biaknak phung a biami ram hna ah harnak phunzakip tuar in pawcawmnak ruah ah a kalmi an si, tiah theih a si.