SAC Le Chaklei Hriamtlai Phu 3 Tonbiaruahnak Cu A Ni A Tlin Hlan Ah An Ngol
============
China tawlrelnak in Shan ramkulh Mongla ah tuahmi SAC le chaklei hriamtlai phu 3 hna, MNDAA, AA le TNLA tonnak cu a ni a tlin hlan ah an ngol tiah theih a si. Tutan tonnak hi June 1-3 tiang tuah ding a si nain SAC nih biatung an chuahpi mi hna cu chaklei hriamtlai phu palai hna nih a ngaih lawng an ngaih i an ruahnak le hmuhning zeihmanh an chimrel duh lo caah a nihnihnak June 2 ah an ngol nak a si tiah TNLA in palai pakhat nih RFA ah a chim.
AA in chimnak nawlngeitu U Khine Thu Kha nih “SAC nih an chuahpi mi biatung hna he pehtlai in zeihmanh kan chimrel lai lo” tiah June 1 ah khan a chim cang. Tutan tonbiaruahnak SAC lei nih zaukphung le federal kong, rampi daihnak le ṭhanchonak kong, khatlei le khatlei i zumhngamnak kong biapi in an chimrel nain cu kongah chaklei hriamtlai phu 3 a si mi AA, MNDAA le TNLA palai hna nih zeihmanh an chimrel duh lo.
Chakeli hriamtlai phu 3 palai hna nih cun SAC nih an tlaihmi vialte thlah ding, phungninglo bu cazin in hlonh ding le Rakhine ramkulh i Mocha thlichia a tuar mi mipi hna nih a rannak in bawmhnak an hmuh khawh nakding kong lawng an chim tiah theih a si.
SAC lei nih biapi ngai in biatung an chuahpi i an chimrel len lioah chaklei hriamtlai phu hna nih zeihmanh an chim duh lo mi le a ni a tlin hlan ah tonnak an ngol mi nih chaklei hriamtlai phu unau pathum hna tiah theihmi AA, MNDAA le TNLA nih SAC zei an rel lonak a langhter ngai tiah ramkhel thiamsang hna nih an chim.
Karen National Union (KNU) Brigade-5 humhaknak hmun a luancia 2023, May thla (thla khat) chung lawng kahdohnak ah SAC ralhrang le an kuttang hriamtlai Border Guard Forces (BGF) Commander le Deputy Commander hna telh in 122 an thi, tiah KNU nih cathanh an chuah. May 1 in 31 tiang ah KNU Brigade-5 humhaknak Mutraw pengkomh hmunram chung ah SAC ral hrang, an kuttang hriamtlai BGF ralhrang pawl le KNU Brigade -5 karlak ah kahdohnak a chuak, tiah theih a si.
Hi thlakhat chung ah kahdohnak voi 200 tiang a chuak i SAC le BGF ralhrang pawl 122 an thi pin ah hliam a pumi 48 hrawng an si. Mah a thimi ralhrang chung ah Commander le Deputy Commander 7 an i tel, tiah theih a si.
Cu pinah SAC ralhrang hriamthil le ei-din a chantu motor 6 kan hrawh khawh chih pin ah rang, khacer 6 zong kan thahpiak hna. Tualchung hriamtlai in minung 2 nih ram le miphun caah an nunnak a pek i, 10 nih hliamhma an tuar, tiah cathanh an chuahmi ah an langhter.
Hi thlakhat chung ah SAC le BGF ralhrang fonh nih mipi hna umnak hmun le rian an ṭuannak hmun cu tinh chih te in hriamngan kuan lung 59 in an kah hna caah mipi 1 a nunnak liam i 2 nih hliamhma an tuar, tiah theih a si.
SAC ralhrang nih mipi tangka (Thailand tangka in) sing 280,000 le (Myanmar tangka) sing 100,000, phone 3, icom 1, vainam 3 hna zong an firpiak hna, tiah Karen National Union (KNU) nih cathanh an chuahmi ah an langhter chih.