President U Win Myint Thong An Thlaknak Thonginn Ah Kahdohnak A Chuak I Minung 10 An Zaam
=================
President U Win Myint an hrennak Taungngu thonginn ah kahdohnak a chuak i ramkhel kong ah thongtla mi minung 10 hna cu an zaam, tiah theih a si. May 18 zaanlei suimilam 2:55 ah Taungngu thonginn chung i thongtla pawl biaceih zung kalpi an timh hna lio ah thongtla pahra nih palek bawi Aye Thaw pistol le palek Aung Thu Win G3 meithal cu an chuh hna i kahdohnak a chuak.
Thonginn chung an i kahnak ah SAC ralkap a thi. A thimi pa SAC ralkap pa meithal telh in meithal zuun li cu an laak i an zaam, tiah Khit Thit Media nih a ṭial. Hi a zaam mi hna hi minung pahra an si i ram a buai hnu ah ramkhel kong he pehtlai in thong thlakmi an si. Taungngu thonginn hi ralkap an i tingzo lo caah Pyosawhti le Pyituhsit nih an cawngh, tiah theih a si.
Matupi Peng Ah Thlichia Nih A Hrawh Mi Pawl Inn Remh Ṭhannak Ah Harnak An Tong; Chinram thlanglei Matupi peng ah Mocha thlichia nih a hrawhmi inn pawl remh ṭhan nakding bawmhnak a um lo lawng si loin SAC ralkap nih khua luhnak lampi an phih dih caah inn a rawkmi remh ṭhan ding ah harnak an tong, tiah theih a si.
Khuami pakhat nih cun, “Kan inn a rawk mi hi a bik in a cungcih an si. Hi a cungcih pawl hi kan herh bik. Cun, atu hi Matupi khuapi chung zong SAC nih luhchuah khawh loin an phih. Khua luhchuah an phih tikah thilri zong kan zaal kho lo,” tiah The Chin Post ah a chim.
May 14 ahkhan suimilam pakhat ah meng 50-70 tiang a hrangmi Mocha thlichia cu Chinram chung ah a phan i Matupi peng chung in inn 850 leng a hrawh, tiah theih a si. May 14 ah a hrang mi Mocha thlichia nih hin Chinram ah inn 1774 a hrawh, tiah Interim Chin National Consultative Council(ICNCC) nih cathanh a chuah.
Mizoram, Serchhip Khua Pawng Ah Lainawngtu Ah Lunghrinhmi Pa Pakhat cu Palik Nih An Tlaih; May 16 zing ah Mizoram ramkulh, Serchhip Bukpui le Chhiahtlang chim veng karlak ah a ruakin hmuh mi Lalsangzuala(kum-31), Mission veng, Aizawl khuapi i khuasa mi thattu ah zumhmi pakhat cu Palik nih nizan May 17 ah an tlaih. Hi lainawnnak kongkau ah ṭuanvo latu ding i rian khinh mi Special Investigation Team(SIT) nih ṭha tein hlathlainak an tuah hnu ah lainawngtu ah ruah mi Laldinthara(kum-42), Khuaruhlian khua mi cu an tlaih.
Laldinthara cu Serchhip palik station ah ap a si. Hi kongkau ah hin midang tlai mi an um rih lo, tiah theih a si. Lainawngtu ah ruahmi Laldinthara nih cun May 16 zinglei ah khan Maxi cab(Sumo) in Aizawl lei a rak panh i Laldinthara a cawlcangning cu palik nih an lunghrinh caah an dawi i, Aizawl palik hna he an tlaih hnu ah lainawngtu a si kong zong amah tein aa phuang cang, tiah an chim.
May 16 zinglei ah khan Lalsangzuala cu Serchhip Bukpui le Chhiahtlang karlak lamthlang ah a ruak in hmuh a si i, a ruak an hmuhnak lampi ah thisen tam ngai zong hmuh a si. Lalsangzuala nih cun a fa sem kum tling lo pakhat le a nupi a kaltak hna, tiah Mizo thawngzamhtu hna nih an ṭial
Chinram Ah Thlichia Nih Inn 1774 A Hrawh – ICNCC; May 14 ah a hraangmi Mocha cyclone thlichia nih Chinram ah inn 1774 le biaknak lei inn 29 a hrawh, tiah Interim Chin National Consultative Council(ICNCC) nih an thanh.
Thlichia nih inn a hrawh mi lak ah Matupi peng cu inn tam bik a hrawhnak hmun a si i, inn 887 a hrawh. Kanpetlet peng ah inn 112, Mindat peng ah inn 364, Paletwa peng ah inn 220, Thantlang peng ah inn 27, Tedim peng ah inn 5, Falam peng ah inn 74, Hakha peng ah inn 85 an rawk, tiah ICNCC nih cun a langhter.
Cupinah Biakinn le biaknak lei inn 29, ngandamnak lei inn 5, sianginn 30, rawlbuk 19 zong thlichia nih a hrawh, tiah interim Chin National Consultative Council (ICNCC) nih cun an Facebook page ah an taar. Credite; The Chin Post