Mansi Um SAC Ralkap Byuhakone Sakhaan 3 KIA Nih An Lak.Mansi SAC ralkap byuhakone sakhaan 3 cu KIA le PDF phufonh nih an kah i an lak beh tiah KIA lei nih Mizzima ah an chim.March 1 thawk in KIA hruai mi dothlennak phu pawl nih Tamaw khua um Maji Gung sakhaan 3 cu hmakhat te ah an kah i March 3 zaanlei ah tlamtling tein an lak khawh dih hi a si.
Cu byuha sakhaan ah LIB 102, LIB 250 le IB 427 hna fonh in hmunhma an khuarnak a si.Kahdohnak chung ah KIA ralkap 1 a nunnak a liam i KPDF chungtel 5 nak tlawm lo zong an i hliam tiah theih a si.Shan ram chaklei he aa pehnak Mansi peng ah January thla thawk in KIA le AA phu hna nih sakhaan lak kahdohnak an tuah thluahmah i Kai Htik sakhaan, Balawng Dingsa, Sikham sakhaan le Manwigyi hmunhma um palek sakhaan, ralkap sakhaan kone le ramri gate hna an lak khawh cang.
Good News :Dawei Um Ralkap Sakhaan Pakhat Dothlennak Phu Pawl Nih An Lak.Tanintaryi ramṭhen, Dawei peng, Yaung-maw khuate pawng um SAC ralkap sakhaan pakhat cu dothlennak phu pawl nih an kah i SAC ralkap a thi mi an tam, hriam tampi zong an lak khawh tiah thlanglei kahdohnak hmunhma nih thawng an thanh.
SAC ralkap 12 le pyusawhti pawl nih hmunhma an khuarnak sakhaan cu No. 34 Tactical Operator Captain Siwan hruainak in Tanintharyi PDF B01 (T1), Tanintharyi PDF B02 (T5 SOF) le PDO hna nih March 2 ah an lak khawh hi a si.Kahdohnak a chuah hnu ah SAC ralkap Mi-2 phun Helicopter nih voi 3 tiang bom a rak thlak tiah cathanh ah an langhter.Kahdohnak chung ah Tanintharyi PDF B01 in hriamtlai 1 a nunnak a liam tiah thawng theih a si.
Rak Rel Chih HrimHrim :Kalay Kahdohnak Ruang Ah A Zaam Mi Cheukhat Ruah Khamnak le Eidin An Har.Sagaing ramṭhen, Kalaymyo kahdohnak ruang ah ramlak ah a zaam mi Kalay khuami 500 hrawng nih ruah khamnak le eidin lei bawmhnak an herh hringhran cang tiah a zaam mi le ralzaam bawmhnak a pe mi hna nih March 4 ah RFA ah an chim.
Kalaymyo, Tahan, Hmunlai, Kyo-tung-bin, Tayarkone ah khua a sa mi le Kalaymyo he aa a tlaihnak Chin ramkulh, Tedim peng, Khaikam khuami hna in a zaam mi pawl cu an si.February 21 thawk in kahdoh aa thawk i SAC ralkap lei nih Kalaymyo khuachung sang pawl ah hriamngan an kah lengmang caah khuami hna an kir ngam rih lo tiah an chim.
Kalay pengkomh PDF nih Kalay khuachung ah kahdohnak kan ṭhawnter cang lai caah a rannak in zaam u tiah February 26 ah an rak thanh.February 21 in March 1 tiang Kalay peng chung kahdohnak ah sualnak ngei lo mipi 14 nak tlawm lo an thi cang i minung 20 leng an i hliam tiah khuami hna nih RFA sin ah an chim.Kahdohnak ruang ah a zaam mi hi 5,000 leng hrawng an si tiah an chim fawn.Credit : The Chinland Post