Malaysia ralzaam hna cu Cozah nih rian kawlpiak dingin timhlamhnak ngei
===========
Malaysia ah a ummi ralzaam dihlak cu Malaysia Home Ministry Department lei nih Cozah phung ning tein rian kan kawlpiak cang hna lai tiah Home minister Datuk Seri Saiffuddin Nasution Ismail nih May 12 ah a chim.
Hi kong he pehtlai in Malaysia UN zung le Alliance of Chin Refugee ah a tuanmi James Bik nih vun “Cozah programme hi a poi tawn mi cu Ralzaam programme an tuah paoh ah an thawk hlan ah Cozah an i thleng than manh peng. Mah lawng si loin tuah hrimhrim ding in lungthleknak an ngei bal lo. Atu zong cu Home Minister pa nih riantuannak nawl peknak kong ah cun anmah Home Ministry cazin ning in kal a hau a ti. A rauh hlan ah ralzaam cazin kan laak lai i anmah tein rian kawl si loin Cozah nih phung ning tein rian kan kawlpiak hna lai a ti. Hihi ruah ngai a hau mi a si,” tiah The Chin Post ah a chim.
Atu bantuk ralzaam programme ahhin a hlan zong ah rak tuah bal a si. A hlan ahcun Home ministry lei nih cazin laa loin MYRC (TRIS) tuanvo a pek i 30000 lawng a laak khawh tiah theih a si.
MYRC nih cazin a laak mi le UNHCR nih cazin a ngeih mi hi tam tuk aa thlau ca ah tu cu Home ministry KDN tuanvo an pek hna tiah theih a si.
Rian kawlpiak ding kong ah, “Keimah pumpak in cun rian kawlpiak cu ka duh lo. Aruang cu riantha cu an kan kawlpiak lai lo a fiang bakmi a si. Bianabia ah ek inn rawl hmunthur char le hlonh ti pawl khi a si ko lai dah. Atu cu kanmah tein kan kawl i kanmah thazaang le sining he aa khat mi rian kan tuan ca ah a nuam,” tiah Malaysia ummi pakhat nih a chim.
Mocha Thlichia Ruangah Hakha Khrihfabu Tam Deuh Hringtu Nu Ni Pumh An Leet; Mocha thlichia cu nihin May 14 ah Hakha a phan lai tiin zumh a si i, nihin deilei suimilam 4:30 tluk in 9:00 AM tiang ah thlihran a daih hlei lo pinah ruah siamsiam in a sur caah Hakha khua chung um Khrihfabu tam deuh cu lakhruak in Hringtu Nu Ni (mother’s day) zarhpi zing pumh cu an leet, tiah theih a si. Hi ca kan tial lioah Hakha khuachung um Khrihfabu pakhat hnih cu an leet lai maw leet lai lo a fiang rih lo.
US Hrambunh ‘Hope For Tomorrow’ Nih Zote Khua, Champhai Ah Sianginn An On; Mizoram chung i ralzaam tampi an umnak Zote, Champhai ah ralzaam ngakchia hna caah Hope For Tomorrow nih sianginn an on. Hi sianginn hi US hrambunh ‘Hope For Tomorrow’ thithruainak in dirh mi a si i hi sianginn a dir khawh nakding le sianginn he pehtlai in phaisa a dih mi vialte cu Pu Dawt Hnin Thang Khenglawt te chungkhar nih an liam lai tiah theih a si.
Hi caan hmannak ah hin ribbon tan nak an ngeih hnu ah Hope For Tomorrow CEO Justin Thang le President Claire (Indiana, USA) nih lunglawmh biachimnak an ngei i, Tv. S Ruatte nih hla a sak hnu ah Pu Dawt Hnin Thang Khenglawt te nupa, Chin State Chief Minister Pu Lian Luai, YMA Sub-Headquarters; Champhai President Pu Mamuana, YMA Sub-Headquarters; Champhai Refugee Sub-Committee hruaitu Pu Robert nih biatawi chimnak an ngei.
Cu hnuah Mai Ram Hril Mawi nih Pathian thangthatnak hla dawh a sak i ralzam aiawh in ralzam camp hruaitu Pu Thla Hre nih lunglawmh biatawi chimnak a ngei i, Hope For Tomorrow siangngakchia pawl nih laam hmuhsak nak caan an ngei fawn.
Hope For Tomorrow, Zote, Champhai ah hin siangngakchia 55 an um i subject 9 :- Myanmar, English, Mathematics, Science, Social Studies, Christian Studies, Physical Education & Health, Mizo, Hindi an cawng i, Cawnpiaktu 7, Program Director 1, Coordinator 1 tin minung 9 an zohkhenh hna. A herh ningin Chinca zong an cawnpiak pah lai. Credite; The Chin Post