SAC Ralhrang Pawl Inn An Khangh Hnu Tiva An Tanlio Ah Ralhrang 6 Ti Tlaknak In An Thi
=========
Mandalay ramthen, Mata-ya peng ah SAC ralhrang pawng cu Nyaung (ညောင်) tiva an tan lio ah an i cit mi Lawng aa let i 6 an thi tiah khua mi nih an chim. “May 7 zinglei ah suimilam 2 tluk ah a si, hi ralhrang pawl cu Kyat-to-shwe khua an khangh hnu, Nyaung tiva an tan lio ah an Lawng cit mi aa let caah 6 an thi, anung dam mi ralhrang pawl zong khuachung thilri an lak mi pawl cu Lawng cungin tlang ah an thiar len ko, ralhrang pawl cu Zuu an ri ngai hna.”tiah khua mi pakhat nih a chim.
Ti chung ah a tla mi SAC ralhrang 6 ruak cu a pawngkam um mi khua hna auh in an kawl ter hna i ruak 3 lawng an hmuh rih tiah kan theih. Bilin Peng Palik Sakhan 2 An Kah Hna Caah SAC Ralhrang 3 An Thi; 3 Hliam An Tuar; Mon ramkulh, Bilin peng Win-ka palik sakhan le Taung-son palik sakhan cu May 6 ni ah PDF tangti phu nih luh hnawh in an kah hna caah SAC ralhrang 3 an thi i 3 hliam an tuar tiah kan theih.
Hi kahdohnak cu PPDF-KD, PDF, KRF, TPDF, Kyaikto Pah-kah-phah le Bilin Pah-kah-phah hna i bawm in an kah hna hi a si. Kahdoh nak a thi mi chung in SAC ralhrang 1, Palik 2 an si i 3 hliam an tuar tiah thanhca an chuah mi ah an langh ter.
Hi kahdohnak ah PDF tangti phu cu him tein hnu an pil than. Pa-O People’s Defence Force-Kham Dom (PPDF-KD) cu tlang cung hriamtlai phu cheukhat le tualchung hriamtlai PDF he i bawm in SAC ralhrang kahdohnak an tuah lengmang tiah kan theih.
Khin-U Peng SAC Rallam Sial Ruangah Khuami 7,000 Tluk An Zam; Sagaing ramthen, Khin-U peng ah SAC ralhrang hna cu phu hnih ah i then in rallam an sial caah pawngkam khua mi 7,000 tluk cu him nak duh ah an zam hna tiah kan theih.nMay 8 zinglei ah Khin-U peng Ka-Boh khua le Ku-tat khua hna ah SAC thazaang 200 tluk cu rallam sial pah in hraimngan zong khuachung ah an kah len caah a tu bantuk in khua mi an zam hna hi a si.
Atu lio ah Khin-U peng nichuah le nitlak lei in mipi a zam mi 7,000 tluk an si i caan karlak an ei din tirawl bawmh an herh tiah PDF Information lei nih an langh ter. Aluan cio May 6 ni zong ah Mandalay in a ra mi SAC ralhrang hna nih Sinh-ku peng khuate khua hnih inn le lo an khangh piak hna. Mah hna pawl cu May 7 ni ah Ayerawaddy tiva ral ah pat in Khin-U lei ah an ra hna i pawngkam khua hna cu hriamngan he hriamfa he an kah pin ah inn zong an duah pah. Mah ni SAC rallam sial ralhrang pawl le tualchung PDF kar ah kahdohnak a chuak i PDF in minung 1 a nunnak a liam i 1 hliam a tuar tiah kan theih.
Htilin Peng Inn 200 Leng Umnak Khua SAC Ralhrang Nih An Khangh, Miruak 3 Hmuh A Si; Magway ramṭhen, Htilin peng, Ahkyiban (အကြည်ဘန်း) khua cu SAC ralhrang thazaang 150 hrawng nih May 6 zing ah an khangh i, miruak 3 zong hmuh an si, tiah tualchung mipi nih an chim.
Htilin khuapi le Kyaukhtu khuapi in rallam a rak sialmi SAC ralhrang cu May ni ah Ahkyiban khua lut in zan an riak hnu, May ni 6 zing ah atu bantuk in khua an khanghpiak hna hi a si. “SAC ralhrang nih inn 200 leng a umnak Ahkyiban khia an khangh caah a ciam dih nawn i, inn 10 hrawng lawng a taang. Kahdohnak zong a umlo, khua an luhhnawh i mipi inn an khanghpiak hna pin ah mipi tlaihkhih in an thah hna hnu ah mei in an khangh chih hna” tiah tualchungmi pakhat nih Khit Thit Ah a chim.
SAC ralhrang pawl cu May ni 7 ah khan Ahkyiban khua pawng Ahnyarban (အညာဘန်း) khua an luhhnawh ṭhan i, Ahkyiban khua zong ah a zam manh lo mi mipi hna an tlaihkhih hna, tiah theih a si. Ahkyiban khua pawng tualchung hriamtlai phu hna nih checkhlatnak le thianhhlimhnak an va tuah i, SAC ralhrang nih mipi an khanghmi hna ruak 3 an hmuh. SAC ralhrang nih hriamngan in an kah hna caah hnulei an tolh ṭhan, tiah theih a si. Credite; Lungmili Post.