Kalay Thlanglei Ah Mi Inn Boh In Thil A Fir Tawn Mi Pakhat An Tlaih.Sagaing ramṭhen Kalaymyo pawng Thayagone khua ah inn boh in mi thil a fir tawn mi pakhat cu Thayagone mino nih an tlaih, tiah theih a si.
Kalay thlanglei ah SAC ralkap le tualchung hriamtlai ṭangṭi phu kar kahdohnak a fah hnu ah Thayagone khua le khua chingchang khua in tualchung mi cu khua chuahtak in a himnak hmun ah ral an zaam hna hnu in caan ṭha i laak in, chuahtak mi inn pawl boh in innchung thilri a fir mi an karh i, nihin March 6 zong ah fir in a vak mi pakhat cu Thayagone khua mino nih an tlaih, tiah theih a si.
“Ral ruang ah khua chuahtak in inn hrenh ta mi inn pawl boh in thil fir ah a vak mi an karh ngai caah mino nih chunzan in khua an hngah i nihin ah mifir pakhat kan tlaih cang, ṭha tein khua hngah khawh peng kan hau ko,” tiah Thayagone khua mino upa pakhat nih The Chin Post ah a chim.
Thawngpang Dang Rak Rel Chih: A Luancia February Thla Chung Ah Nu 30 An Thi I Minung 17 Tlaih An Tong Tiah BWU Nih An Thanh.A luancia February thla khat chung ah Myanmar ram hmunkip ah SAC ralkap kut in nu 30 leng an thi i, minung 17 an tlaih hna, tiah Burmese Women’s Union (BWU) nih nihin March 6 ah an thanh.
A luancia February thla khat chung ah tlaih a tong mi nu hna cu Yangon, Mandalay, Tanintharyi le Shan ramkulh in an si i minung 17 an si, tiah BWU nih an chim.A thi mi nu pawl lak ah hriamngan ruang ah a thi mi 9, vanlawng kahdohnak ruang ah minung 7, meithal in kah mi 5, tlaih hnu ah thah mi 5, hremnak in a thi mi 3 le meikhangh in thah mi pakhat an si, tiah BWU nih cun an langhter.
Thah a tong mi nu hna lak ah Sagaing ramṭhen in 15 an i tel i a tam bik an si, Bago ramṭhen in minung 6 an i tel i a changtu an si. Sagaing ramṭhen, Kalay peng kahdohnak ah February thla chung SAC ralkap hriamngan kahnak in a thi mi zong an i tel.SAC ralkap nih hramhram in nawlngeihnak an laak ni 2021 February 1 in tukum February 28 ni tiang Myanmar ram hmunkip ah nu 806 an thi i nu 3,332 cu thong an thlak hna, tiah BWU nih an thanh mi ah an langhter.Credit : The Chin Post