Good News, Hakha Khuachung Kahdohnak Thawngpang Update!!!

Hakha Cawbuk Check Gate Hngaktu SAC Ralkap Le Palik Kah An Tong
=================
Chin ramkulh, Hakha Cawbuk sang SAC ralkap check gate cu Chin ralkap nih an va kah, tiah theih a si. Nihin Macrh ni 19 zing suimilam 6:00AM-7:00AM kar ah Cawbuk sang SAC ralkap check gate cu Chin ralkap nih an va kah i, ralkap le palik a thimi le aa hliammi an um le um lo cu theih a si rih lo, tiah tualchung mi pakhat nih a chim.

SAC check gate hngaktu ralkap le palik kah an ton caah rian herh ruah ah Hakha lei kal a duhmi hna zong an kal kho lo, tiah tualchung mi pakhat nih The Chin Post ah a chim.

Mizoram ramkulh, Champhai peng, Vaphai khua ah ralzaam in aa dormi Chinmi ngakchia hna hna cu CCBCUSA bawmhnak thawng in Laica le kawlca an cawng kho, tiah theih a si. Ralzaam Committee nih tawlrelnak in le khuabawi theihpinak in a luancia 2022 October thla thawk in Fiaratui Middle Sianginn ah ralzaam siangngakchia 60 cu Laica le Kawlca an cawng, tiah ralzaam committee sin in theih a si.

Siangngakchia cachimtu hna hi CDM saya/sayamah te an um lo caah degree a la cangmi saya/sayamah 3 nih ca an chimh hna. Cachimh man thlahlawh kong zong ah harnak kan ton caah CCBCUSA nih thla khat ah Rs 6000 in an kan pekpiak hna caah nihin ni tiang kan fale ca an cawng kho, tiah an chim.

Fiaratui Middle Sianginn ah ca a cawngmi a zohkhenhtu ralzaam committee cu hawikomhnak ṭha tein a ngeimi le committee ṭha tein a dirh i rian a ṭuanmi kan si, tiah ralzaam committee mino hruaitu pakhat nih The Chin Post ah a chim.

Vaphai khua ah aa dormi ralzaam siangngakchia hna cu a luancia 2022 October thla in cacawn hram an rak thawk i pehzulh in ca an cawng ko rih lai tiah a chim chap. Vaphai khua ah hin ralzaam in aa dormi chungkhar 73 um in milu 350 khua an saknak a si tiah theih a si.

Magway ramṭhen, Gangaw peng Semintaw khua kahdohnak ah SAC ralkap 4 an thi, Gangaw pengkomh battalion 17 in ṭatkhuaihmu Kyaw Min Lwin a nunnak a liam tiah Yaw Revolution Army-Htilin in Takhin Zaw nih a chim.

March ni 18, ah Htilin peng Semintaw khua ah zanriakmi SAC ralkap hna cu Gangaw lei an kal ah tualchung hriamtlai phu hna he kaphnih kar kahdohnak a chuak. SAC ralkap nih hriamngan an hman caah tualchung hriamtlai phu lei ṭatkhuaihmu Kyaw Min Lwin telh in minung 3 nih hliamhma an tuar, hliamhma tuarmi hna chung in ṭatkhuaihmu Kyaw Min Lwin cu a minung a vennak hna ah a nunnak a liam tiah theih a si.

SAC ralkap hna cu Gangaw pengkomh battalion 15, battalion 16, battalion 17(YRA-Htilin) nih an kahdoh hna. Tualchung hriamtlai phu lei ṭatkhuaihmu Kyaw Min Lwin a nunnak a liam pin ah AK meithal pakhat kan sung. Federal Democracy kan ngah khawhnak ding ah SAC ralkap a doh i ram le miphun caah a nunnak a petu ṭatkhuaihmu Kyaw Min Lwin cu Gangaw pengkomh battalion 15,16,17 ( YDF- Htilin) nih sian lo buin upatnak sang bik kan pek tiah Yaw Revolution Army-Htilin nih a thanh.

Magway ramṭhen, Gangaw peng Shautpin(ရှောက်ပင်) khua le Khauthku (ခေါက်ခူ) khua kar ah rallam sial ding in a chuakmi SAC ralkap le pyusawhti phufonh hna cu bomb puahhnawh in doh an ton caah SAC ralkap 3 an thi tiah Yaw tualchung hriamtlai YPDF in Yaw Lay nih a chim.

March ni 19, zinglei suimilam 11:00AM hrawng ah Htilin in a chuakmi SAC ralkap dong ding ah rallam sial pah in aa thawhmi SAC ralkap le pyusawhti tiin minung 50 hrawng cu leilawng 4 in an chuah ah tualchung hriamtlai phu nih timhcia tein hmanhmi bomb in an puahhnawh hna caah minung 20 hrawng cu an tlu i cu chung ah 3 cu hmakhatte ah an thi colh tiah theih a si.

SAC ralkap le pyusawhti phufonh cu bomb puahhnawh in doh an ton hnu ah an i hrocer i hmaifong ngam ti loin a thimi le hliamhma tuarmi hna cu leilawng cung an khin hna hnu ah Gangaw lei ah an kir ṭhan tiah theih a si.

Sagaing ramṭhen, Depeyin nitlaklei Kuattit sang a khangtu SAC ralkap hna cu kahdoh an ton caah minung 6 hrawng an thi tiah Freedom Revolution Force (FRF) nih a thanh.

March ni 17, zanlei suimilam 6:00PM hrawng ah Depeyin nitlaklei Kuattit a phanmi SAC ralkap hna cu Freedom Revolution Force (FRF), ṭatkhuai 1, ṭatkhuai 4 nih 40mm hriamngan hmang in an kahdoh hna. Cu kahdohnak ah cun SAC ralkap 6 hrawng an thi, fak ngaiin hliamh a tongmi SAC ralkap nih zan suimilam 12:00 hrawng ah Depeyin khuachung inn 13 an khangh tiah theih a si. Crd-The Chin Post