Good News: EAOs -3 dah ti lo EAOs cu NUG he rian tuan tti dingah “hnatlaknak” an ngei cang!

“Dothlennak Thawngpang”
=========
EAOs -3 dah ti lo EAOs cu NUG he rian tuan tti dingah “hnatlaknak” an ngei cang. Kawl rawn ah khuapi kahdohnak a chuak kho timi kha atak a si, tiah Mandalay i ka hawipa pakhat mipi ralbawi nih a luancia thla ah a rak ka chimh.

Nizan nai i, Mandalay i a cangmi cycle cung i, rammi ralkap pahnih bom nih a puah sualmi zong kha khuapi cawlcanghnak he aa pehtlai lai tiah ruah si. Kan hnu kum kumdongh lei ah, khuapi cawlcanghnak cu rak thawk hnik a si cang nain, Yangon ah ZYT te pawl an tlaih hna ruang ah, mission tampi hnu ah a hung kir. Atu zong hi Yangon cu thanhca in “mipi ralrin ding” ti a si. Voihnihnak mission a si, kan ti ko lai.

Ramchung le ramleng ah MOD nih hin “rammi ralkap ca ah thlakhat $100” timi member luhnak form an lak. Thlakhat a tling rih lo nain, a lutmi cu an tam kho taktak. Cu ahcun, Singapore khuasa Myanmar mi an tambik. Dothlennak ca ah phaisa a pemi pawl cu ngunkuai a pek tiah cohlannak ca zong Minister TTN te nih an hung chuahpiak cio hna. Bond le adangdang fund zong vun thawk a si cang bang in phaisa zong ahung lut ngaingai. Afoinak in NUG cu mipi nih datsi kan rawnmi cycle a si, kan ti ko lai. Cucu mipi dothlennak kan timi cu a si ko.

Dothlenak ah a biapi bik cu “Mipi zeizah an i tel timi le zei can an tuah khawh timi cung ah aa hngat” tiah ramkhel thiamsang nih an chim. Nihin Myanmar ram ah uknak laknak ah hlawknak a hmubik cu Shan ram an si, an ti. Dai te in an um nain, an ram cu self-determination in an kal len cang tiah Asia Times nih a tial. Arakan ralkap AA zong ralkap 80,000 kan ngei an hung ti.

Chin rammi ralkap zong Chin milu i 20% a si, an ti. Ka hawipa ralbawi pakhat nih Hakha ah raltho ding tiah mi i khawmh usihlaw, 3,000 cu foi te in an hung chuah lai, a ti. Hakha cu kan kulh ko cang, a ti. Tlangkom in kan chim ahcun, i hrim caan le thuat caan kha raltuknak lawng si lo in boxing i thongh caan hmanh ah a um tawnmi a si. Yangon, NPT te cu Myanmar ram i, a thin le a lung a si ca ah cawlcangh hi aharmi a si. Cucaah, a daimi a hun lo ko lai.

Nain, tutan dothlennak cu “top-down” si lo in “bottom-up” in a hung hrangmi a si. Abiapi ngaimi bal cu, NUG cozah he kal tti khawh kha herh ngaingai. NUG, CRPH le NUCC hruainak in “Caan karlak uknak ” tete zong ser cuahmah a hung si cang. Hitin thabaa lo te in kan kal peng ko ahcun teinak cu vancung in a tlami ruah tidor te nih vawlei a khen bang, kan ca ah “sol lo” a si te ko lai. Lungdongh lo te in, i zuam rialmal rih ko hna usih!

“Phaisa Pekning Ruah Aherh Ko Cang”; Naihrawng hi NUG, Chinland le adang miphun hna nih thinphan ciomi an ngei hna. Cucu hriamtlai buainak a chuak kho timi hi a si. Cucaah, hriamtlai hna i an phaisa hmuhnak “resource” hi zeitin kan phih lai. Siloah, resource hi a kua le akaa te ah zeitin kan fun lai ti hi an hung ruah ngaingai. Aruang cu atanglei bantuk in ka hun chim lai.

Terrorist Ziaza Ngei An hung Karh; Thailand ramri ah PDF an um, Nu zong an um ve. Nute cu NK timi nih a duh na lo in, a ihpi tawn ti, a si. Caan arauh tikah an upa hna nih an theih i, na thit lai an ti ca ah thit umnak tuahding a si. Nain, NK nih a duh ti lo. A si cun, an ti i a hla in um ding an ti hna (Dantatnak a um lo). Cu zong cu caan a rauh tikah NK nih a celh ti rua lo i, Nute cu a va lem i, an i um. An i um bak in NK nih cun nute cu a sersat lengmang ca ah Nute cu ramchung ah a tli than ti a si. Nute nih tlerh fakpi in a tonnak, dothlennak ca ah kan ti nain thongtla bang a umnak, a family tiang tlerh an tonnak” kha dothlennak family ah arak chim bal. Cu buu cu NUG nih dantatnak kan tuah lai an ti nain tutiang zei ngai an tuah kho rih lo. Cu PDF cu hriam an ngei, an bawi le dantat hi an duh rua lo. Phundang in NUG nih an chim kho ti hna lo.

UN nih hin dothlennak a tuahmi buu hi ri a chiahpiak hna. A foinak in, ngakchia kumtling lo ralkap ah hramhram in auh lo ding, Tlaihciami ral thah lo ding tbk a um. Hihi bantuk ri a lonh ahcun terrorist timi ralhrang an si ko cang. Mah ca ah KNU nih an bawi pakhat kha an rak hnonnak a si, an ti. Aruang cu KNU i, international a muihmai ca ah cutin an tuah cu a si ko. Ahlan deuh ah DKBA zong nih ngakchia kumtling lo hramhram in hriamtlai ah an luhter hna ti ruang ah UN nih a rak ngiat bal hna__ an rak phisin len. Cu bantuk in, nizan nai ah Kareni ram ah Kareni Gen Z timi hriamtlai buu nih “minung pathum kha dalan tiah an tuk velh hna”. Cucu kong cu KNPP nih faktuk in a mawhchiat hna. NUG zong nih an mawhchiat hna. Nain, Kareni Gen Z cu hriam an ngei ve i, chimh le dantat awk an ṭha ti lo.

Chin ram ahhin hriamtlai hi an karh tuk i, mipi humhimnak kilvengtu “defense force” cheukhat hi ho chimh kho lo in a ummi an tampi ve, ti a si. Case pakhat in kan chim ahcun, Pengtlang pakhat ah hriamtlai phu hnih an um. Ahlan ah phu khat an si nain, phu hnih an i then tikah an ngeihmi pistol le AK kha a peomi phu nih an i lak. Nain, a ngeiding a simi nih an rak hal tik hna ah an pe duh ti lo. An i kap deng. Aa kom ngaimi pahnih, pengtlang khat kha i nawn deng a si ko.

CNF nih a pehton hna nain an i kom kho ti lo. Phaisa an ngeih veve, hriam an ngei veve. Hmailei ah hmunhma i cuhnak menmen in i thuat khawh an si timi a lang. CNF kan tluk timi lungput a ngeimi defense force hrimhrim an tam cang ca ah CNF nih a chimh khawh lomi an tam tiah kan hawipa pakhat nih a kan chimh. Hi bantuk case tete hi a tampi rih. Atu ah kan Myanmar ram ahhin command and order a pe khotu buu ngaingai an um lo. Kachin cu KIO nih an hruai khawh ngai hna, tiah C3C a ummi kan hawipa nih a rak kan chimh bal.

NUG le PDF karlak thil umdan cu ngaih a chia ngai. Acheukhat donors pawl hrim nih NUG nakin PDF kha an support deuh hna tikah “NUG te hna cu zei an si lo” ti a si. Hitin kan kal cun zei a chuak lai kha an ruat kho hna lo. Anmah te in revolution kha military form le structure in an kalpi. Chin ram kan zoh ahcun CNF/A nakin adang CDF kha support a pemi an um len ve. CNF nih khua a ruah ngai rua tiah ka ruahmi cu “Chinland” ahmang deuhmi kha a hun support deuhmi hi a si. Aruang cu Chinland ah hmailei a chuak khomi buainak ralrin a duh ca ah a si lai tiah ka ruah.

Hi bantuk hriamtlai tampi a hung karhnak hi phaisa thawhmi in a si ko. Phundang in dothlennak ah buainak a chuahtertu cheukhat pawl hi donor pawl sin in indirect in a hung ra. Phaisa kha meithal aa can tikah ramchung ah command and order a um kho ti lo. Hi bantuk dirhmun a si ahcun MAH military pi va doh ding cu ahar ngai hnga. Cucaah, tulio ka ruah ngaimi cu phaisa petu hna nih phaisa pek tikah khuafak pi in ruah aherh cang timi hi a si. Cu lo in kan duhnak cio ah kan pek sawhsawh ahcun kan tuhmi thlaici nih kan ram ahrawh khawh. Lungrual te in hmunkhat ah tanti ding kha aherh ngaingai ko cang. Credit: The Chan