Good News; Bochan tuk mi Chin mi kan pa le tonbiaruahnak an ngei hna!!

Consultative Workshop On Endangered Minority Languages Ngeih A Si!!
==========================
Consultative Workshop On Endangered Minority Languages cu Lawngtlai DC Conference hall ah 2022 Tho 24 zing suimilaam 10:30am ah thawk a si. Hi ahhin Lalchuanlian, Convener ( SLM) nih caan a tlaih i, caanzarh ah, Rev. Dr. Hla Aung nih a hman. Rev. Dr. Hla Aung nih cun ” Caholh le nunphung hi Pathian nih a kan pekmi a si, Laimi zong hi kan holh aa dawhtuk, Pathian thangthatnak zongah Kawlholh nak in Laiholh in thangthat ahhin a sunglawi deuh i lung a hmui deuh hrim ko.

Laitlang ah mission a donghnakbik tuanmi Rev. Johnson he ca kan i kuat tik ah a donghnak ah a tial tawnmi cu ” Marki Pa ” tiah a tial tawn, mirang nih an cakuat donghnak ah hi bantukin an tuah bal lo i an ngei fawn lo, hrinmi fa min in auh cu a sunglawi tuk. American an phanh hnu kum 20 hnu zongah kan Lai sining te hi an philh lo. Laimi kan holh zong hi a dawhtuk Pathian nih a kan pekmi a si , Mirang hmanh nih an philh lo mi kan nunphung a si” tiah a chim hnuah thlacamnak a ngeih

Cu hnuah Pu James Miahlung Adviser nih ” tutan tuahmi hi Mizoram ahcun a voikhatnak a si a zumhnak kong le, a rak i tel khomi bukip cung zongah lawmhbia a chim fawn. Cun holh hi Pathian nih a kan pekmi a si. Kanmah duh te’n kan sermi a si lo, Pathian nih kan miphun a kan pekmi holh a si” a tiah a chim.

Cu hnuah cathluan chuahmi chim fiannak a si i, cathluan chuahpi mi hna cu Mara Literature Committee, Pang Literature Club, Bawm Students’ Association, Tlangau Language Development Committee, Zyphe Central Literature Committee , Laiholh sining le dirhmun Salai R. Lahnim Adviser (LSM) nih hna cathluan chuahmi chimhnak an ngeih.

Cun khuallian ah sawmmi Pu BN. Thangpui Executive member, i/c Art & Culture LADC nih ” Kan nunphung karhlannak ahhin holh hi a biapi ngaimi a si, kan holh nih hmailei kar kan hlannak ah a kan hruaitu ding a si, kan holh a tlau ahcun kan nunphung cu a tlau hrim ko lai.

Pathian nih miphun ah a kan ser caah holh a kan pek, vulei thil pek a si lo. Holh cu Pathian nih a kan pekmi a si caah humhak a biapi, minung kan sinak diktak a langhter tu cu kan holh hi a si” tiah a chim.

Cu hnuah biahalnak le bialehnak ngeih a si hnuah Vote of thanks: Lalchuanlian, Convener nih a ngeih hnuah khuallian Pu BN Thangpui biachimnak in caan dihter a si.

Hi Consultative Workshop On Endangered Minority Languages cu Save Laiholh Movement nih tuahmi a si i, hi ahhin International Chin Forum , Lai Upa Pawl, CYLA, Lai Phuntungtu, Mara Literature Committee, Pang Literature Club, Bawm Students’ Association, Tlangau Language Development Committee, Zyphe Central Literature Committee hna le Laiholh Palek tulio MDC simi Pu K. Hre Kung hna an i tel. Crd-The Lairam Times

KIA Hmunhma Vanlawng Kah Ruang Ah Hliamhma Tuarmi 100 Renglo Si I Thlop Kholo Ding In SAC Ralkap Nih An Kham, Hpakan peng KIA brigade 9 hmunhma bom thlak hnawh an ton ruangah hliamhma tuarmi mipi 100 renglo cu si i thlop kho lo dingin SAC ralkap nih Ginsi khua chuahnak gate in an kham hna leng ah a thimi hna an ruak zong phurhnak nawl an pe hna lo tiah theih a si.

Hliamhma tuarmi hna cu Hpakan le Myitkyina sizung ngan ah thlop kan duhko hna na in, chuahnak nawl an kan pe lo. A thimi hna ruak zong an ruak vutcaam lawng laknak nawl an kan pek tiah si lei thlopnak tawlreltu pakhat nih a chim. “Khuapi lei kal khawh dingah KBC hruaitu hna nih chawnh biaknak an tuah lio a si, kal khawh a si an ti cun timhcia kan si ko” tiah Hpakan khuami pakhat nih a chim.

KIA brigade 9 hmunhma vanlawng in bomb thlak an tonnak ah KIO/ KIA chungtel lawng siloin tualchung mi hna le Kachin hlasakthiam hna tampi nunnak a liam i, minung 100 leng nih hliamhma an tuar tiah theih a si.

Ralhrang rual nih Hpakant bomh an thlaknak ah minung 80 hrawng an ruak an char cang hna, KIO kum(62) tlinnak puai an tuahnak hmun Hpakant ah zahan zaan sml 8:40 ah ralhrang rual nih vanlawng in bomb an thlak caah a tutiang ah miruk 80 hrawng an char cang i hliam a tuarmi zong an tam tiah theih a si.

A thi mi chung ah Kachin hlasakthiam hna, ringawn tumthiam hna, mino hna le mipi hna zong an i tel tiah theih a si.
“Mithi ruak hi 80 nak tam an si cang. Hma a tuarmi hna sii thlopnak kan tawlrel cuahmah lio a si” tiah Kachin Media pakhat nih a chim.

Oct 23 zaan sml 8:40 ah ralhrang hna nih ral tuknak Vanlawng pathum in KIO kum (62) tlin philhlonak Show an tuah lio ah an cung in bomb an thlak hi a si i hlasak thiam hna, ringawn tumthiam hna le mipi hna zong an i tel lio ah a si tiah theih a si.

Vanlawng In Kah Ruang Ah Hma pumi Minung 100 Renglo Cu Sii I Thlop Kho Lo Ding In SAC Ralhrang Nih An Kham Hna, Hpakant i KIA battalion 9 hmunhma ah raltuknak vanlawng pa 3 in kah ruang ah hma pumi mipi 100 renglo cu sii i thlop kho lo ding in Ginsi khua chuahnak gate in SAC ralhrang nih an kham hna tiah theih a si.

Hpakant le Myitkyina khuapi hna ah hma a pumi sii i thlop ding in kalpi kan duh hna nain ralhrang nih khua luh-chuahnak gate in an kham caah kan kal pi kho hna lo tiah mibawmchantu phu nih an chim.

Kanchin Mipi Hna A Bu In Thah Ton Ni Ngaihchiatnak Langh Ternak Caah KIO Nih Kachin Thantar Cu A Lai Tiang Lawng Thlai Ding In An Thanh! October 24 ni cu Kachin miphun hna a bu in thah ton ni a si ti tiah ngaihchiatnak langhternak caah KIO hmunhma um zung le sianginn hna ah Kachin thantar cu a lai tiang lawng thlai ding in KIO nih an thanh.

Yangon Ramṭhen, Shwepyita Peng Ah Khuabawi Hna Nupa Meithal In An Kah Hna Caah Anupi A Thi, Yangon ramthen, Shwepyita peng Pyidawta sang khuabawi hna nupa cu meithal kah an ton caah a nupi a thi tiah tualchung hriamtlai pah-kah-phah nih an chim.

October 24, chunhnu suimilam 3:45 ah Pyidawta sang khuabawi zung ah khuabawi Myo Min Tan le a nupi Mala Maw le zung riantuantu pakhat tiin minung pathum an um lio ah chaklei pengkomh tualchung hriamtlai phu le Yangon Urban Guerrilla Army(YUGA MO 7 Egale) phufonh nih an kah hna i Daw Mala Maw cu hmakhat te ah a thi tiah theih a si.

Cu khuabawi zung nih cun zung ah theihpinak ca a la mi hna le khualtlung cazin min petu hna cu bo ngai in an chawnhbiak hna leng ah phaisa kholhnak zong an tuah tiah tualchung mi pakhat nih a chim.

Tualchungmi Khua An Kir Khawhnak Hnga Hmunhma Thianhnak An Tuah Lio Ah Bomb Lamh Sualnak In PDF Pakhat Nunnak A Liam, Karenni ramkulh Demoso peng kahdohnak a rakchuahnak hmun pakhat simi khuate pakhat cu tualchungmi pawl himte in khua an kir khawh nak hnga thianhhlimh nak an tuah lio ah PDF pakhat cu bomb lamh sualnak in a nunnak liam tiah DMO Local PDF sin in theih a si.

October ni 20 zaanlei suimilam 5 hrawngah tualchungmi hna cu khualei kir dingin an i timh caah himtein an kir khawh nak hnga ti in hmunhma thianhhlimhnak an tuah i cu lio ah cun SAC leinih an hmanh ta mi bomb ai lamh hi a si tiah theih a si.

A hlan ah thianhhlimhnak cu kan rak tuah bal cang ko nain bomb kawlnak seh kan ngeih lo caah kan mit in kan kawl i ka hmuhthlu lo mi a rak um ruang ah a tu ban tuk in ruahlo pi in kan ton hi a si tiah DMO Local PDF in ṭuanvongeitu pakhat nih a chim.

Cu puahlehnak ruangah cun DMI PDF Battalion-G in tat-suh-hmu U Josep kum 41 cu a hmunah a ke pahnih ning in a bul i a nunnak liam i October ni 21 zing ah an vui tiah theih a si. Demoso PDF chungah a tubantuk in bomb thianhhlimhnak ruangah minung 13 nih hliamhma an tuar i a nunnak liam mi he cun 20 hrawng an si cang tiah theih a si.

Kanbalu Peng Zawchaung Khua Cu SAC Ralkap Nih A Voi 5 Nak An Khangh Ţhan, Sagaing ramṭhen, Kanbulu peng chaklei Zawchaung khua cu SAC ralkap nih October 24, zinglei ah a voi 5 nak an khangh ţhan tiah Kyunhla khua cawl canghnak a tuahtu phu nih cathanh an chuah tiah theih a si.

Kotaungbo(ကိုးတောင်ဘို) hrambunh khah-mah-yiah 363 in SAC ralkap nih cu ka khua cu mei khangh in an hrawh caah, tualchung mipi umnak inn 8 le Shwe Bune Daw Toe(ရွှေဘုန်းတော်တိုး) mi bawmchantu phu inn le motor pakhat an hrawh tiah theih a si. Zawchaung khua cu SAC ralkap nih voi 5 tiang mei khangh in an hrawh caah mipi umnak inn 147 tiang a kaang cang tiah theih a si.

Rakhine Ah Cyclone Thlichia A Hran Caah Poaktaw Peng Inn Cheukhat An Rawk, Minung 1000 Hrawng Har An Tong, Rakhine ramkulh Poaktaw peng Sintatmaw khua ah October 24 ah cyclone thlichia “SITRAN” a hran caah inn cheukhat an rawk tiah theih a si. Sintatmaw khua cu tiva kam ah a ummi khua a si caah ti lianh le thlichia hran tibantuk an tong tawn, inn cheukhat an rawh caah khuami cheukhat cu hmun dang ah an i thial tiah Sintatmaw khua mi pakhat nih a chim.

“Ruahsur in ti a lianh caan ah tiva ti cu a kai tuk caah ti khamnak an cim i, tiva kam ummi inn hna cu an rawk, thli faktuk in a sur caah inn rawk zong an um” tiah Sintatmaw khua mi pakhat nih a chim.

“A thli hran ning cu a fak taktak, thli hran ruang ah inn 7 hrawng a rawk, tilawng 2 a pil, minung i khawndennak cu a umlo, inn dang zong an rawk than lai ti cu phan a um, tiva kam khuasa mi cu thial an si cang hna, minung 1000 leng har tongmi an um” tiah tual chungmi pakhat nih a chim.

Kamargyi No.2 Hlei Cung In Nu Pakhat A Zuang , North dagon le Tinkankyun(သင်္ဃန်းကျွန်း) i pehtlaihnak Kamargyi(ကမာကြည်) No.2 hlei cungin October 24 zinglei ah nu pakhat a zuang, tiah theih a si.

Kum 20 hrawng asimi nu pakhat cu Kamargyi No.2 hlei cungin a zuang tiah thawng a kan thanh i kan va kawl, tiah Tinkankyun (B) sang ummi mi bawmchantu phu nih an chim. Hlei cung in a zuangmi nu nih, platform cungah bag a nakmi pakhat, tangka, address card, phone le Naciat a chiahtak, tiah theih a si.

Hlei cung in a zuangmi nu cu an kawl cuahmah lio a si i an hmu rih lo. A luancia September 14 lio zong ah Tinkankyun peng le Tharketa peng i pehtlaihnak Kamargyi hlei cung in pa pakhat a rak zuan caah a nunnak a liam bal cang tiah theih a si.

Yephyo Peng Ah Sianglairun Sianginn Uktu Nu Le Tualchung Mi 4 Meithal Kah An Tong, 4 An Nunnak Liam, Tanintharyi ramṭhen, Yephyo peng Gyiakha Tarpin In(ကျခတ္တာပင်အင်း) khua ah October 23 zinglei ah sianglairun sianginn uktu nu pakhat telh in minung 5 cu meithal in an kah hna caah 4 an thi tiah theih a si.

Sianglairun uktu nu Aye Moe Shwe inn le a pawngkam inn pakhat ah hriamtlai phu khat nih atubantuk in an kah hna hi a si, tiah tualchung mi pakhat nih a chim. “Zanṭim ah hriamtlai phu khat nih meithal in an kah hna. An fanu le cu an tlaih hna i, an hrem hna. A thimi nu hi Non CDM a si i, a vapa cu sianginn cachim rian in pension a la cangmi a si. An fanu le zong siang cachimtu an si,” tiah a chim chap.

A thimi hna cu Aye Moe Shwe(kum 44), a vapa Pho Khine(kum 43), Win Thein(kum 54) le a nupi Aung San Me(Kum 54) hna an si. Win Oo(kum 56) cu a ke a bul, tiah theih a si.

Kayin Hriamtlai Phu I Fonh Ding In Kawthoolei Army Nih Thanhca Chuah, Kayin ramkulh chung ummi hriamtlai phu dihlak ifonh lawng ah SAC ralkap hi ṭha tein kan dohkhawh hna lai caah, hmunkhat ah ifonh cio ding in Kawthoolei ralkap hruaitu Saw Nay Daa Miah nih cathanh an chuah tiah theih a si.

Kawthoolei ralkap nih khuapi laknak ding a hram thawk a si cang caah Kayin hriamtlai phu dihlak ifuntom caan a si cang tiah a chim. Tulio ramkhel sining ah SAC ralkap hna nih mizapi cungah phungninglo in an tuahmi vialte cu khuapi chung lawng silo in khuate lei tiang an tuah caah mizapi cu ṭih launak an tong, cucaah hmunkhat ah ifuntom in ralkap uknak a hramchanh a herh tiah an thanhmi ah cun an langhter chih.

A luancia 2022, January thla in Bochoh Saw Nay Daa Miah cu KNO Commander in Chief ṭuanvo in KNU nih a dinhter hnu ah July 16 in Kawthoolay ralkap a dirh i, cu a dirhmi cu kan theipilo tiah KNU nih an rak thanh ve.

Loikaw Peng Konethar Ralhrial Camp Cu SAC Ralkap Nih Hriamngan In An Kah Caah Ralhrial Pakhat A Nunnak A Liam, Loikaw peng Konethar ralhrial camp cu, SAC ralkap nih hriamngan in an kah caah ralhrial pakhat a nunnak a liam i, hliamhma pumi an tam, tiah ralhrial zohkhenhtu hna nih nihin October 24 ah cathanh an chuah tiah theih a si.

Nizan October 23 zing sml 9:00 hrawngah Mobae hrambunh SAC ralkap 422 Battalion nih, ralhrial camp cu timh ciammam tein an kah caah kum 35 tluk pa pakhat a nunnak a liam i, a nupi zong hliamhma fak ngai a pu. “Kan va phak ahcun pa cu a nunnak a rak liam cang nain a nupi cu a lu ah hliamhma he a rak ril ko. Kum 8 tluk ngakchia pakhat zong a phei ah hliamhma a pu,” tiah mi ralhrial zohkhenhtu in ṭuanvo ngeitu nih a chim.

October thla chung Karenni ramkulh ah SAC ralkap nih hriamngan kah nakin tualchung mi 1 a thih pinah 5 hliamhma an pu cang. SAC ralkap nih nawlngeihnak an lak hnu in Karenni ramkulh chung, ralhrial nak ah a nunnak a liammi tualchung mi 65 an phan cang, tiah PKPDF nih October thla thawk ah cathanh an rak chuah.

SAC Ralkap Le CDF CDM Siyin Kar Kahdohnak Ah SAC Ralkap 3 An Thi, A luancia October 13 ah Kalaymyo le Taingen khua karlak SAC ralkap sakhan, khur cawhmi hmun ah umhmun hmunhma kan la i zing sml 8:00 hrawngah SAC ralkap nih khualtlawng mi hna cu tangka hal ding an rak chuak, cu lioah pe 10 hlat in bomb in kan puahhnawh hna, tiah CDF CDM Siyin nih cathanh an chuah tiah theih a si.

Hmai a kalmi SAC ralkap pathum cu an titsa aa ṭhenṭhek dih. Cuka ahcun minutes 10 tluk hrawng kaphnih kar kahdohnak a chuak, CDF CDM Siyin lei in a thimi le aa hliammi an um lo, tiah theih a si. Cu hnuah Taingen khua um SAC ralkap sakhan in bawmh dingah a kalmi ralkap motor 3 cu Heinzing khua le Leisan Mual karah October 14 zing sml 4:48 ah minutes 8 tluk kan kah ṭhan hna, tiah CDF CDM Siyin nih an langhter.

Cu motor 1 chungah SAC ralkap 20 leng an i cit i, Taingen khua an phanh ahcun SAC ralkap 30 leng hrawng lawng an taang cang, tiah CDF CDM Siyin nih an langhter tiah theih a si.

Moemauk Peng Ah SAC Ralkap Jet Fighter Nih Bomb Thlak Aa Palh Caah Anmah Ralkap Lila A Thimi Le Aa Hliammi An Tam, Kachin ramkulh, Moemauk peng ah KIA, PDF le SAC ralkap kar kahdohnak a chuak i, SAC ralkap nih Jet Fighter in bomb an thlak caah anmah ralkap lila an umnak ah bomb a tla i, ralkap tam tuk hliamhma an pu, tiah theih a si.

Nizan October 23 ah Moemauk peng Wawan tlang nichuah lei ah SAC ralkap le KIA, PDF kar kahdohnak a zual ngai caah SAC ralkap nih Jet Fighter in bomb an thlak i, anmah lei ralkap lila pawng ah a tlak caah SAC ralkap tam tuk hliamhma an pu, tiah tualchung mi hna nih an chim.

“SAC Jet Fighter in bomb an thlak caah an mah lei ralkap lila tam tuk hliamhma an pu. Motor 4 in hliamhma pumi ralkap cu Moemauk sii-inn lei ah an kalpi hna. SAC ralkap nih timh ciammam tein Moemauk khua chungah bomb an thlak i, dum cheukhat a rawh pinah vok pakhat a thi,” tiah Kachin ram um SAC ralkap he naihniam in a ummi sinin theih a si. Kachin ramkulh ah SAC ralkap le KIA, PDF kar kahdohnak a zual tuk caah SAC ralkap a thimi le aa hliammi an tam, tiah theih a si.

Mahlaing Khua Ah Umhmun Khuarmi SAC Ralkap Cu Drone In Bomb Thlakhnawh An Ton Caah Pahnih An Thi Mandalay ramṭhen, Mahlaing peng Tayet Kaungpin(သရက်ကောင်းပင်) khua ah umhmun a khuarmi SAC ralkap pawl cu, drone in bomb kan thlakhnawh hna caah ralkap 2 an thi, tiah Myingyan No. 4 Battalion Natogyi People Defence Force(NPDF) ṭuanvo ngeitu nih a chim.

October 21 zanlei sml 4:00 hrawngah Mahlaing peng Tayet Kaungpin khua ah umhmun a khuarmi SAC ralkap cu, NPDF nih drone in bomb kan thlakhnawh hna caah SAC ralkap 2 cu a hmun ah an thi colh. Ralkap a thi chapmi le aa hliammi an um rih ko nain, fiang in kan thei kho rih lo, tiah Natogyi PDF in ṭuanvo ngeitu nih cun a chim tiah theih a si.

“Cheukhat ralkap cu an phei zong tan a haumi an um. SAC ralkap nih Tayet Kaungpin khua pawng ummi khuate cu khual cazin an check hna. Mithar nan hmuh hna ahcun nan kan chimh lai an ti hna pinah CDM a tuahtu le NLD party chungtel hna zong tangka an hal hna,” tiah a chim chap. Crd-The Chin Post