Timit lei ralhrang hliamtuar 33 Hakha siizungpi ah an rak phorh hna
========================
July 10, Tawng neknawi , July 9 ah khan Timit lei ralhrang hliamtuar 33 Hakha siizungpi ah an rak phorh hna. Thantlang an hrawhmi siamremh tthan dingah ttuanvo pekmi Buchukkyi cu Rungtlang 266 tatzin chungah a um peng ko rih.
Hakha in Thantlang lei an kaltermi hna, atu Timit ah aa taap mi ralhrang hna hi battalion 5 an si tiah an mah ralhrang thanh ning a si i, battalion pakhat ah hraang 50 kuam lawng um dawh an si. Salai William Hlawnceu
Bago ramṭhen thlanglei ah July 5 thawk in ni 3 chung kahdohnak pehzulh in a chuak i SAC lei a tlawmbik 17 an thi tiah Bago ramṭhen PDF phu sin in thawng theih a si.
July 5 chun ah SAC ralkap le PDF phufonh hna cu Nanza khualu ah kahdohnak a chuak i SAC ralkap 15 an thi, 10 hrawng an i hliam caah hliam a tuar mi pawl cu Kyaukhtada sizung ah an i thlop hna tiah theih a si. July 6 zaanlei zong ah Nanza khua le Puakkone khua karlak hlei ah kahdohnak a chuak ṭhan i SAC chungtel 2 an thi, 4 an i hliam.
Tukar hrawng, Bago ramṭhen thlanglei ah SAC ralkap le PDF phufonh hna karlak ah nifatin in kahdohnak pehzulh in a chuak. Kahdohnak chung ah SAC ralkap a tlawmbik 17 an thi, 14 an i hliam i PDF phufonh lei in 1 a nunnak a liam tiah Bago ramṭhen thlanglei PDF phu nih cathanh an chuah.
Bago ramṭhen, Yedashe peng, July 3 thawk in kahdohnak pehzulh in a fak i SAC lei a tlawm bik 16 nak tlawm lo an thi tiah Yedashe peng PDF sin in thawng theih a si. July 3 chun sml 2:30pm hrawng ah Bago ramṭhen, Yedashe peng, Oomehtu khuate in a rak lut mi SAC ralkap 50 hrawng cu Shansu khua pawng ah Yedashe peng PDF nih bomrap an puah hnawh hna i meithal in an kah chih hna caah mins 30 tluk kahdohnak a rau i SAC ralkap 10 nak tlawm lo an thi, 16 an i hliam tiah theih a si.
Cun July 5 zaan sml 9:00pm hrawng ah Yedashe peng ah a rak lut mi SAC ralkap pawl cu Sipai khua le Michaung khua karlak ah PDF phufonh pawl nih an kah hmasa hna i mins 30 tluk kahdohnak chung ah SAC ralkap 6 hrawng an thi tiah theih a si.
Cubantuk in July 6 zaan sml 8 hrawng ah, Yedashe peng, Sipai khua ni chuahlei ah SAC ralkap pawl an rak phanh ṭhan caah PDF phufonh nih an kah ṭhan hna i a thi mi le hliam a tuar mi cazin a fiang in theih a si rih lo tiah Yedashe peng PDF phu sin in thawng theih a si.
Yangon ah SAC leiṭang mi Palai LyLy Naing Kyaw a thattu tiah puh mi Ko Kuang Zarni Hein (Kum 23) le Ko Kyaw Thu Ya (Kum30) hna cu July 6, 2023, Yangon North-Dagon peng zaan caan ah SAC nih meithal in an kahthah hna tiah theih a si. LyLy Naing Kyaw an thahnak ah hmun fainter khawhnak ding in an kal pi lio ah thongtla mino 2 cu an tli tiah puh in lam ah meithal in an kah thah hna.
Myanmar ram ah thongthlak a tong mi ramkhel minung, siangngakchia le PDF an dihlak in 20 hlei cu thonginn ṭhialding in a leng an chuahpi hna lio ah SAC ralkap nih lam ah an thah hna tiah thonginn he aa naihniam mi sin in thawng theih a si tiah Ramkhel ruang ah thongtla a bawm chantu phu sin in theih a si.
June 27 ni Daik-U ah thong a tla mi Ramkhel thongtla Ko Pyay Phyo Hein, Ko Aung Myo Thu, Ko Kyagyi, Ko Min Phone Mahar, Ko Pyay Pyo Aung, Ko Ze Laung, Bago District Bakatah Vice president Ko Khaing Lin Naing, Ko Bo Bo Win, telh in PDF chungtel 12 cu thongthial ding tiah a leng an chuak pi hna lio ah thongtla phortu motor aa let i thongtla pawl an tli tiah min bunh in lam pi ah an thah hna tiah chungkhar naihniam sin in theih a si.
Cun, Monywa thong tla chung in PDF chungtel 12 nak tlawmlo zong thong ṭhial ding tiah a leng chuah pi in lam pi ah a thah fawn hna. Chungkhar nih an thawng pang kan thei ti hna lo tiah an ti. June 6 zan ah Lyly Naing Kyaw a thattu tiah SAC lei nih puh mi Ko Kaung Zarni Hein & La pyay hrigtu a nu Daw Thae Ma La Win le a u nu Ma Saung Thazin Oo hna cu Yangon ramṭhen, Htantabin peng, Yokyi khua inn number No. 90 an inn ah Mahbatah timi Buddhist lei ṭang mi phu pakhat le Pyusawthi hna nih an inn ah an thah hna tiah theih a si.