Georgia State Secretary Nih Mee Thlaknak Kongah Thawngpang Thar A Chuah Than Cang

Georgia State Secretary nih Mee Thlaknak Organization pawl a Hlahlaiter hna. Georgia State Secretary Brad Raffensperger hi Republican lei a si ko nain 2020 election ah mee aa ningcang lomi A UM LO a ti lengmang tu a si. Trump lei nih minthut chek in mee relter than ding in an au hnawh lengmangmi zong a HNOLPIAK lengmang tu a si.
Sihmanhsehlaw senate thutnak pahnih te lawng a taangmi ca ah 2021,January 5 ah tuah dingmi thimnak ah mee thla ve ding in a thi cangmi a fapa sin ah organization pakhat nih ca pathum an rak kuatmi a hmuh tik ceo lawng ah a lung a fim. (A fapa Brenton J. Reffensperger hi 2018 ah a thi.)

Media nganpipi nih heh tiah an cawnglawmhmi New Georgia Project hi Stacey Abraham timi nu nih 2014 ah atu ah Georgia ramukbawi (governor) a tuan liomi Brain Kemp he an rak i cuh hlan te ah a rak dirhmi a si. Hi nu hi mee an rel lio ah “mee a tomtom in ruh caan” (ballot harvesting) timi biafang a chimtu a si. Atu cu hi project ngeitu Stacey le America Votes timi le Vote Forward timi organization pawl kha hlathlai ding in Brad Reffensperger nih nawl a chuah cang. Hitin a tuahtu cu thong kum (10) asiloah $ 100,000 dantat a si lai tiah ca a chuah.

Fulton county ah a ummi pakhat nih cun a thicangmi minung pakhat sin ah postcard (5) bak a phan a ti. Emory University i siangngakchiapa sin ah ca a phanmi le bang ah cun mee na thlak duh ahcun na address kan in thlenpiak lai i mee na thlak dih in ka dang state ah mee na thlak khawh than nakhnga kan in tuahpiak lai i in ca a ra an ti. New York ah a ummi nu zong nih a inn ah New Georgia Project sin in postcard a tomtom in a phan a ti ve a ti. A dang aa ningcang lomi tampi a um rih ko nain hi vial hin ka ngol rih lai.

Relchap ding thawngpang dang, US Thimnak Thawngpang; (1) Georgia; Nikhatni ah khan Georgia ah Biden nih teinak a hmuh tiah thawng an thanh. Sihmanhsehlaw Sidney Powell nih pine biaceihnak zung sangbik ah biaceihpiak tthan ing in ka nawl (appeal) than lai a ti. Micheu nih cun US ram biaceihnak zung sang bik (Supreme Court) ah a phak zokzok hi a tha deuh lai an ti.

(2) Pennsylvania; Tu zarh Nihnihni ah US ram biaceihnak zung sang bik (Supreme Court) nih bia a ceih lai. Cucaah Zarpini thawk in Dominion seh cu Trump legal team nih an chek cang. Kan liim manh ko lai an ti. Cun Supreme Court ah Trump lei in Ted Cruz nih bia a chim te lai. Amah hi Rafael Edward Cruz ti a si i 2013 in nihin tiang Texas aiawhtu US senate a si. 1992 ah Princeton University in upadi ah a thiambik (cum laude) timi minhatnak he degree a lami a si. Cu kum thiamthiam ah bia-al zuamnak pahnih ah aa zuam ve i a pahnih te ah pakhatnak a hmuh. Cu kum thiamthiam ah U.S. National Speaker of the Year timi laksawng a hmuh. Princeton in a dih hnu ah Harvard University ah upadi a cawn tthan i a thiambik (magna cum laude) timi min tthanak he Juris Doctor degree a hmuh. Juris Doctor timi hi doctor dawhsawh nakin a sang deuhmi a si.

TED Cruz hi 2016 thimnak zong ah president candidate tiang in an rak chuahpimi balmi a si. President George W. Bush zong nih updadi lei ruahnakpetu ah a hmanmi a si. 2000 kum thimnak ah Bush le Al Gore taza an i cawinak ah Bush ca ah Florida Supreme Court le US Supreme Court ah ahmuh a rak tuahpiaktu a si. Cu lio ah Tez Cruz nih cun a ttanpimi Bush cu teinak a hmuhpiak. Cu lio ah teinak an hmuhnak cu “US ram pumpi nih aa ruangmi mee rel phung an ngei lai” timi le Florida nih Article II, ยง 1, cl. 2 zulh lo in phung thar an i sernak ah hin a si.

2000 kum i Florida sining le atu 2020 i Pennsylvania sining hi aa khat. Atu ah cun cu aa khat bakmi thil kong kha Ted Cruz nih US Supreme Court ah a kalpi tthan lai. 2000 kum lio Bush ca ah teinak a hmuhpiak bantuk in Trump ca ah hin tah teinak a hmuhpiak than kho ti hnga maw? Supreme Court ah biaceihtu (6) cu Republican an si caah nang zeitin dah na ruah? Ted Cruz nih teinak a hmuh ahcun cakuatnak zung in November 3 hnu a phanmi mee paoh cu an rel ti hna lai lo caah Trump nih teinak a hmuh lai. (3) Arizona; Dominion seh audit an tuah lio a si. Credit: Rev. Biak Lian Vel