George Muller’s Testimony Hi Theih Phu Le Rel Phu Taktak A Si

George Muller’s Testimony
===========
Khrihfa Thlarau mi, Goerge Muller nunnak ahhin Hrinthan asi kum li hnuah chinchiah tlaak caan biapi khun (an epoch) a um. Cu caan cu Khrihfa nun diktak ah ka luhnak asi tiah a chim. Hrintthan hnuah a voi-2nak ithlennak (second conversion) kan ti hnga maw? Pathian pennak nun pemh ti maw si hnga? Pathian hmaiah nun bungh (total surrender) ngeih lo ahcun Khrihfa hlawhtling nun taktak phak a har. Unau, kik lo, lumlo nun, vawlei tlaihchan peng buin vanram le Pathian kong a caih sawsawh mi si hi nun sivaang men asi na ti ve maw? George Muller testimony hi rel ve hmanh. Pathian bia ah nun phum taktak a herh zia na hmuh lai.

A Testimony cu: Kum sawmkua atlin hnuah Pathian riantuantu (ministers and workers) hna hmai ah bia a cah hna i hitin bia a chim:- Kum 1825, November thla, kum kul ka si ah lungthlennak (Hrintthannak ) ka hmu. Sinain, ka hrintthannak kum 4 hnu 1829, July thla ceo ah ka thinlung umek Bawipa sinah ka bungh. Cu caan thok cun chawva duhnak ka ngei ti lo. Khua le ram ngaihnak zong a um ti lo. Dirhmun tha i umduhnak zong a tlau. Vawlei nuamhnak ka duh tawn mi le tlaihchannak vialte a cat dih. Pathian, Pathian, Pathian lawnglawng ka tumtah mi asi cang. Amah ahhin ka zeizongte ka hmuh. Amah hlei in thil dang zeihmanh ka duh lo. Pathian vel thawngin cucu kan nunnak ah a hmun i cu nihcun mi lunglawm ah a ka ser, Mi lunglawm taktak a ka siter i, Pathian thil kong lawng a ka tuaktaanter. Dawtmi unau hna, zawnruahnak nganpi he bia kan hal, na thinlung umek Pathian hmaiah na bung cang maw? Asilole, na tuaktaan mi thil le zeimaw ruangah Pathian kha zei pipa ah rel lemlo in na um sual maw?

Hlan ahcun Pathian Bia (Baibal) hi tlawmte lawng ka rel. Mi dang tialmi biaknak lei cauk pawl khi ka rel huam deuh. Pathian Thiangthlarau thawngin tialmi Baibal sunglawi zia hi ka rak hngal lo. Ka Khrihfa nun hmasa kum li chung kha cu Pathian nung nawlbia nih ciah lomi nun (Uninspired life) a si. Cu nihcun hngalhnak le Pathian vel kong ah bawhte a ka siter peng. Hngalhnak ka ti tikah a dikmi hngalhnak tak cu Thiangthlarau nih a phuan mi Pathian bia thawng lawng in a ra. Pathian Biatak thawng lawng in luatnak kan hmu. Pumsa thil hiarnak sal in luatnak a kan pek. Mitthit nak le uanthlarnak nun in luatnak kan hmu. Cucu Pathian Bia nih tehte a khan. Pathian mithiang hna nun zongah a lang. Keimah nunton (experience) zong nih tehte a khaan. Pathian Bia kha biapi cem ah ka chiah hnu in Pathian, Amah le mah ai phuannak cu hmurka in chimkawh lomi thluachuah nganpi a si. Ka thinlung takin hihi ka chim khawh: Pathian cu a dongkho lomi dawtnak nun a si. Unau, na nun chungril in Pathian cu donghnak ngeilo dawtnak nun a si na ti khawh hlan cu, na Khrifa nun kha i lung hmuih rih hlah!

Mi zeimaw nih Pathian bia hi zeitin rel ahdah a hlawk bik tiah a ka hal ahcun; hitin ruahnak ka cheuh hnga:
1.Thil dang vialte nakin na thinlung ne ah Pathian lawng taan ter izuam, Thiangthlarau lawng nih a ka cawnpiak khawh ti kha na rel hlan le na rel lio cuahmah zongah thei law Pathian thluachuah kha kawl peng. 2. Hi zong hi na thinlung ne ah um peng awk a si: Thiangthlarau cu a tha cemmi le a tling cemmi cawnpiaktu a si ko nain, kanmah duh tik caan paohah khulrang in cawnpiak a hmang lem lo. Cu caah Baibal bia fianter dingah a tu le tu lungdong loin nawlpat peng a hau. Thlacam bu le lungsau tein Bawipa sunparnak caah kan nawl peng ahcun a donghnak ahcun deoh loin a kan cawnpiak hrimhrim tawn. Credit: Lalbat Cinzah