Federal Army le Tatmadaw Kah Hnuah, Civil ralkap cu meithal puah te uh!

Federal Army le Tatmadaw Kah Hnuah, Civil ralkap cu meithal puah te uh!
===========================
Kum 1988 ah lamzawh rak si i, Kawl ralkap (KR) nih minung 3000 leng an rak kah in thah hna. Kum 2007 ah lamzawh tthan si i, phungphung he zaran he minung 200 hrawng cu kah le thah an rak si. Kum 2021 ah lamzawh ruangah minung 500 leng an thi cang.

Feb. 1, 2021 i, KR nih uknak an lak in zapi nih kan theih ciami cu: lamzawh le CDM ah kai tel ahcun “ka nunnak liam kho” tihi si. Cun, KR nih “thongthlak, tlaih le hrem ka si kho” tihi si. Nain, KR uknak hrawhnak le ram thlennak ah tiah “nunnak le thisen thap” in lamzawh le CDM ah i-tel cio si. Minung zeimawzet nunnak a liam taktak cang. Cun, minung tampi zam si cang. Kan ton dingmi thil hngalh cia khin, lamzawh le CDM kan tuah. Ttihnak um loin KR cu kan doh. CDM lengmang cu kum 2022 Nobel Peace Prize caah mintar si.

Keimah lawng lulin ngai ka ruahmi: 1) Federal Army kong kan phuan tuan deuh ko. 2) Mah-runvennak (self-defense) kong kan chim tuan deuh ko. 3) Civil Armed Force nih meithal kan puah tuan deuh ko. 4) Emotion lawngte deuh in biachahnak kan tuah deuh ko.

Tuni hoih in lamzawh thla hnih leng kan van kal. CDM thla khat leng kan van kal. Kum 50 leng uknak ngeimi kha, vikvak tiah rawk seh tiah lungrang in kan kal. Zapi nih defense kan tuah bang KR lila zong nih an tuah ve lai. A rau rih kho men. KR nih lamzawh le CDM ai telmi hehchet a dum in kawl hna. Minung 3000 leng ai hren cang hna. Cun, KR nih lamzawhmi thinhunter ding in thil a tuah peng – a ruang cu civil nih meithal puah hmasa in “ramchung raltuknak – civil war” um seh tihi a duh. Hodah terrorist cazin ah min um te lai? Tlangcung ralkap (TR) hna hi Tatmadaw caah terrorist an si i, KR hi TR caah terrorist an si ve. Vawlei pumpi caah hodah terrorist si lai?

Note: Federal Army nih Tatmadaw ka kah lai ti cun, zapi himnak le zamnak ding information tuah hmasa ttha lai.
Note: Civil Armed Force nih Tatmadaw a kah ahcun, zapi himnak le dornak ding a tuaktan hmasa ttha lai. Ramchung raltuk hi van um taktak dawh si ko cang. Ningcang lo deuh in ramchung raltuknak um sual cun “zaran thongza in an thi kho i, million in ralzam an um kho”. Syria le Yemen dirhmun phak lo ding timhlamhnak tuah khawh cun, ttha tuk hna. Credit: Van Nun Lian