Fale caah nule hnuk haang maw a ṭha deuh cawhnuk haang (infant formula)?

Fale caah nule hnuk haang maw a ṭha deuh cawhnuk haang (infant formula)?
==========
Nule cheukhat cu an hnuk haang chuah lo ruang asilole pakhat khat ruang ah an fale hnuk an dinh kho hna lo i, cawhnuk (formula) haang in an fale an cawm hna. Nain a cheukhat nule cu an hnuk ṭha ko nain cawhnuk haang theng aa thimmi khi an rak um ve. Fale hnuk a dinh kho dingmi si ko nain cawhnuk haang deuh aa thimmi caah ruah a herh ngaimi tete hlethlainak nih a langhtermi ka hun ṭial hna lai.

Cawhnuk (formula) haang hi a ṭha tukmi a si ko, nain ngandamnak lei thiamsang hna nih cun nule hnuk haang tlukin a ṭha lo an ti. Ngandamnak lei rian ṭuantu bu asimi American Academy of Pediatrics (AAP), American Medical Association (AMA) le World Health Organization (WHO), etc… hna nih cun nule hnuk hi fale caah duhthim ding kan ngeihmi vialte lakah a ṭha bikmi a si, an ti.

Hlethlainak nih a langhtermi cu nule hnuk haang tampi a dingmi hna hi zawtfahnak an tong lo deuh i sizung an phanh zong a tlawm deuh ti a si. Nule hnuk haang nih hin bawhte caah hnakhaw hmatnak le chungtlik/sente tibantuk hi tampi a khampiak hna. Cun tirawl le thinghnah ramhnah tibantuk i ziak lonak (allergies) siseh, khuhhrin zawtnak (asthma) siseh, zunthlum zawtnak (diabetes) siseh, thau luannak (obesity) siseh, cun ruah lopi in thihnak (SIDS) tibantuk pawl hi nule hnuk nih a kham ti a si.

Cun hlethlainak nih a langhter rihmi cu nule hnuk haang tampi a dingmi hna hi a ding lomi nakin an thluak ṭha deuh (IQ a sang deuh) ti a si fawn. Cun nule nih an eidinmi tirawl kha an hnuk haang lei ah a kal caah nule nih an eidinmi tirawl hoih in an hnuk haang thawtnak zong aa thleng ve. Cucaah fale nih tirawl thawtnak phun tampi nule hnuk haang hmang in an teh cia cang caah nule hnuk a ding lomi nakin tirawl ei an hun i thawk ah khin an duk a ṭha deuh ti a si fawn.

Fale hnuk dinh hi fale ca lawng siloin nule ca hrim ah a ṭhatnak a tampi ti a si. Tahchunnak ah fale hnuk a dinhmi hna hi a dinh lomi hna nakin hnuk cancer an tong lo deuh, thi kai damlonak an tong lo deuh i, zunthlum zawtnak zong an tong lo deuh ti a si. Cu hlei ah tangka zong a tlo deuh tuk. Cawhnuk le cawhnuk dur caah tangka a dih theng ti lo. Cun fale an zawt tlawm deuh caah sizung kalpinak le si cawknak ca ah a dihmi a tlawm deuh fawn.

A cunglei i nule hnuk haang nih ṭhatnak a chuahpimi pawl le damlonak a khammi tete khi cawhnuk haang nih a kham khawh lomi a tam tuk. Cucaah a hnuk ṭha komi le fale hnuk a dinh khomi dirhmun ah a dir komi nih cun caw hnuk nakin nule hnuk tu hi kan dinh deuh hna awk a si. American Academy of Pediatrics nih cun fale hna hi 6 chung nule hnuk tampi in pek hna ding. Cun a tlawm bik ah kum 1 an si tiang tal hi cu nule hnuk in cawm hna ding, tiah an ti. Credit: Roro Fambawl