Even Tluang Lian; Thantlang Khuami Hna Sin Biacah!

THANTLANG KHUA MI HNA SIN BIACAH
==========
Dawtmi, Thantlang khuami vialte hna mithli he Thantlang khua nan chuah taak ko lai. Sihmanhselaw nan lungdong hrimhrim hlah u.

Thantlang khua hi BAWIPA nih a philh hrimhrim lai lo. Nan va um chungnak cio khan, BAWIPA Hmaikawl buin, thlacam cio u law, BAWIPA nih khua a ven i a himnak hnga le teinak he tuanah kir a si țhannak hnga, rawlulh pah lengmangin thla rak cam cio tuah u.

Hibantuk caan hi BAWIPA he i tonnak caanțha ngai a si i, PATHIAN Vel le Zaangfahnak hmuh a ol ngai caan zong a si. Zu le zuk hmuam te hna, kan ziaza țhalo le lungput țhalo te hna kan i țhinhnak caah caan țha ngai zong a si.
Thantlang khua caah a biapi cemin ka ruah mi cu, THIANG THLARAU nan rak lawmhter lonak um sual aikun, Thantlang khua PATHIAN rianțuantu vialte le khua aiawhtu vialte nih a hleiin lungțhumin sual rak phuan hna u.

Kannih zong nih rawlulh pah lengmangin thlacam kan thok ve cang. Chinmi/Laimi vialte hna kan khuapi hna le kan khua cio a himnak hnga, rawlulh lengmang in le kan sual phuangin thlacam ko hna usih. Tuah khawhmi kan ngei ko rih hna hih! Ahohmanh nan lungrawk in nan lungdong hrimhrim hlah u.

Zeizong vialte a tuah khotu, Zaangfahnak le Velngeihnak in a khat mi, a donglomi Dawtnak in a kan dawtu BAWIPA pei kan PATHIAN a si cu! Cutin kha tin, cuti kha ti tikah si selaw, tiin ruahnak chuah len caan a si ti lo, kan duh, duhlo a si ti lo, kan thinlung dihlak, kan sining dihlakin, kan PATHIAN au ko hna usih.

Cuticun pei, zeizong vialte a tuah khotu BAWIPA a țhawnnak cu a lang lai i BAWIPA zong nih Mințhatnak le Sunparnak zong a co ve lai. BAWIPA hi zuumin i bochan ko u, an caan a dih cangmi nih teinak hmuh phung a si lo. BAWIPA nih a kan halmi cu sining dihlak, Thinlung dihlak in kan hei auh te khi a si ko.

Rimnampa ruangah nan lungrawk in nan lungdong hrimhrim hlah u. Thlacam awk na theih lo tikah, BAWIPA sinah lawmhnak bia chim diam ko. Rimnampa a sungh caan a phak cang caah vantawngin sualnak tuah onh a si hih! Vanawngin a sualmi an dir kho bal lo. Amen. BAWIPA JESUH Vel cu nan dihlak cungah um ko seh. Daihnak nan cungah um ko seh. Lamkaltu, Tluang Lian ( Martar)

Thantlang kahdohnak ruang ah khua mi an zaam, khuahngak zong zaam dih ding in thawng an thanh. Chin Ramkulh, Thantlang khuapi chung ah hmunhma a laa i khuami hna ralphaw ah a hmangtu SAC ralkap le tangti unau CNA le CDF hna he September 7 hnu kahdohnak a chuak i, khuami 1 million leeng an zaam cang lawng si loin a taang mi zong khua chuah tak ding in nawl an chuah tiah thawng kan theih.

An zaamnak kong he pehtlai in khuami pakhat nih, “Kan zaam lai lo tiah kan rak I timh mi bak a si ko nain, kan dirhmun nih a pek ti lo ca ah kan zaam a hau cang ko. Meithal le bomb an duh ning poh in an kan hman hnawh tik ah hliam a tuar mi inn a rawk mi tampi a um. Kan dirhmun hi rak kan theihthiampiak ve hram uh.

Nunnak cu a sunglawi tuk mi a si, kan inn le lo tu cu a rawh than zong ah kawlhawl khawh than a si. Cu a si ca ah nunnak him nakding hmun ah kan zaam ve hi a si,” tiah The Hakha Post ah a chim. Cun, atu khuahngak ah a taang mi khuami cheukhat hna zong zaam dih ding in thawngthanhnak le tlangaunak an ngei tiah theih a si.

Zaam dih ding timi kong ah, “Nihin September 20 thok in Thantlang cu kan chuah tak dih ko cang lai e. A dam lomi le tarnu tarpa kan fimtawl khawh in kan zam ve cang lai. Thantlang khua mei niih a kangh lo nakding tu thla rak cam cio ko u tiah,” Thantlang khuanu khuapa Chairman Pu Lawm Bik nih a Facebook cahmai ah a langhter.

NUG nih D-Day a thanh September 7 hnu Thantlang khuapi chung ah kahdohnak le tlerhkhawnnak nifatin zaan fatin a chuak. SAC ralkap lei kut in khuami hliam a tuar mi le nunnak a liammi zong tampi an um cang.