Even Tluang Lian; Dawh Chinchin In Sak Than An Si Lai!

DAWH CHINCHIN IN SAK ȚHAN AN SI LAI
==========
Thantlang sianginn sang ah inn 19 hrawng le Hakha Chinoosi sang ah in 4 hrawng a kaang! Bomh nih inn a hrawhmi an um len rih. Mandalay ah in 200 leng a rak kaang bal! Inn a kanghnak hrawng vialte cu, kha hlannak țha chinchin in sak țhan dih an si i Mandalay khua a dawhter khuntu an si!

2015, Hakha cimh lio ahkhan, Pu Chum Ling ( Lai Ram Thang/ Ram Thang pa) inn țhapi cu a rak puur ruang mang ve. Sihmanhselaw a tu ahcun kha inn a cimhnak ahkhan, a rak cim minak let țha in inn hnih bak a sak țhan cang!
Mandalay inn a kangh lio le Pu Chum Ling inn a rak cimh lio ahkhan, lungrawk ngaiin um cio a si. Sihmanhselaw, dawh chinchin le țha chinchinin sak țhan an hun sitikah khuapi a dawhter chinchintu an si!

Nihin kan khuapi hna cu kaangin rawk len rih ko hna hmanh selaw, dawh chinchin le țha chinchin in sak țhan an si dih țhan lai i kan khuapi a dawhter khuntu an si te lai. Mizo phungthlukbia/thufing ah, “Inn kangh a tamnak khua cu a țhangcho,” an ti.

Atu kan caan hi țheh caanah kan um rih caah, intuar khawhnak thazaang nan ngeih cio nak hnga, BAWIPA bomh hal cio u law, nan lungdong hrimhrim hlah u. Țheh caan hi BAWIPA nih acaan a tawiternak hnga thlacam cio u. Cun, sak caan a ra zau lai i, BAWIPA kan PATHIAN nih kan ngaihchiatnak le kan intuarnak lonhin Thluachuah le lunglawmhnak a kan peek țhan lai. BAWIPA Vel cu nan dihlak cungah um ko seh. Thazaang petu, Tluang Lian (Martar)

Thantlang ah Inn 19 a Kaang, Pastor Pakhat Nunnak Liam. Nihin zaanlei ah Thantlang SAC ralhrang nih bomb le meithal in khuachung an kah ruang ah inn 19 an kaang i, pastor pakhat a nunnak a liam, tiah Thantlang upate sin in thawngpang kan theih.

“Inn a kaangmi zapi hi inn 19 a si. Bokyok lam lei hi kan hmih khawh. Thlanglei Bangla lei a kaangmi zong a dang inn a tlai ti lo,” tiah pastor pakhat nih The Chin Journal ah a chim. Thantlang khuachung ah inn 19 a kangh pin ah meithah ding in aa thawhmi TCBC pastor Cung Biak Hum cu lampi ah SAC ralhrang nih an kah i a nunnak a liam.

Pastor Cung Biak Hum cu motorcycle in a kal lio ah SAC ralhrang nih a ttang le a baan ah an kah hi a si. “A ruak cu kan lak i an inn ah kan phakpi cang,” tiah a cunglei pastor nih a chim chap.

Thantlang SAC Ralhrang nih Pastor Cung Biak Hum an Kah. Thantlang innkaang meiphalh ding in aa thawhmi TCBC pastor Cung Biak Hum cu Sianginn sang lampi ah SAC ralhrang nih an kah i a nunnak a liam, tiah Thantlang upa sin in thawng kan theih.

Meithal kuan nih a ttang le a baan ah an khen i a hmun ah a nunnak a liam. Pastor Cung Biak Hum hi awttha Sui Tha Par vapa a si. Fa pahnih an ngei i, a nupi hi pumlawnglo in a um lio zong a si.

A ruak cu Thantlang pastorte hruainak in an lak i an inn ah an kalpi cang, tiah ttuanvo ngeitu pastor pakhat nih The Chin Journal ah a chim.

Thantlang Inn 15 Leng a Kaang Cang Lai tiah an Ruahdamh. SAC ralhrang nih an kahmi bomb le meithal ruang ah nihin zaanlei sml. 3:30 hrawng in Thantlang khuachung Bangla sang ah inn an kaang i atu tiang ah inn 15 leng a kaang cang lai, tiah an ruahdamh.

Thantlang pastor pakhat nih, “Atu hi a kangh cuahmah lio a si. Sianginn sang First Line lei hi inn pakhat kan tthehpiak i, hnangam deuh a si. Bangla lei hi a kaang cuahmah i khika lei cu zoh awk a ttha hrim lo, a kaang cuah mah ko,” tiah The Chin Journal ah a chim.

“Inn 15 leng a kang cang lai. Cu lak ah cun Bangla sang i a ummi Pyidaungsu Yeihta (ပြည်ထောင်စုရိပ်သာ) zong a kaang cuahmah ko,” tiah a chim chap. Inn zeizah dah a kangh ngaingai timi The Chin Journal nih fehternak kan tuah kho rih lo. Inn a kangh biknak Bangla sang lei hi funhpanh ngam a si rih lo. Credit: The Chin Journal