Even Mang Cung Nung: Mupi Bang Nun Cawn Lio Caan A Si!

“Mupi bang nun cawn lio caan a si”
==========
Deuteronomi 32:11 “Mupi nih a bu a hninh, a tla mi a fa le kha a zuanhnawh hna, a thla cungah a futter hnu ah a zuanpi. Cu bantuk in Bawipa nih a mi kha a hruai hna”. Tu lio kan ram ah kan tonmi harnak hi “Kan sualnak ruang ah Bawipa nih a kan hrem” timi nak in “Bawipa nih mupi bantuk in nun a kan cawnpiak lio a si” ti hi ka duh deuh.

Mupi nih lungpang sang cungah bu a ser. Laimi zong Lairam tlang sang ah khua kan ser ve. A dang tein kan ummi le sifak bik kan rak simi zong hi Bawipa thluachuah asi. Mi phundang le biaknak dang nih an kan cawhpawlh lo dingah Bawipa nih a kan thuh. Bawipa nih ramdang in siangbawi te a hun thlah hna. Kan siangbawi luruh nih Halkha khua ah a kan umpi ko. Jesuh zumtu kan hun si tikah Bawipa nih a lam kip in thluachuah a kan pek. Zu le sa, bawi le laam, sik le vuak, Lawkih biaknak phunghlun an tlau dih ngawt cang.

A min cun Khrihfa zumtu kan si dih ngawt ko nain Khrih nun ah kan cham bau ngaingai. Bu le bu kar ah, peng le peng kar ah, dawtnak le lungrualnak a bau. Uktu thalo tangah kan rak um tikah ziaza tha lo tamtuk kan rak icawn sual.
Cucaah Bawipa nih Khrih nun kan thiamnak dingah mupi bantuk in atu hi a kan cawnpiak lio a si.

1. Mupi nih a fa le kha zuan an thiamnak ca dingah a bu a hninh. Kan ram aa hninh ve caah inn le lo kan chuahtak ve. 2. Mupi fano le tangah an tla. Kan nungak tlangval hna inn(bu) an hlum ti lo. Tang tlak lio cu an lau tuk, an tap an hram. Kan nungak tlangval hna harnak phunkip an tuar ve.

3. Mupi nih a hun zuanhnawh hna i a thla cungah futter in a zuanpi than hna. Bawipa nih a kut chungah a kan chiah caah bawmtu tampi a kan pek ve. 4. Mupi fano le nih cawnpiak hnu ah anmah tein cung sang pi ah zuan an thiam. Laimi zong dawt le lungrual kan thiam chin lengmang ve cang. Ram kip um, Laimi vialte zong kan lung aa rual. Thla kan cam, phaisa kan thawh, miphun ral kan iveng.

5. Atu lio harnak kan tonmi hmang in Bawipa nih comfort zone in a kan chuahter cang. Mah chungkhat le mah khua, mah peng, lawng kan dawtmi lungput in a kan chuahter i Chin miphun le Chin ram dawtnak lei ah mit a kan au ter.

CDM, CDF, CNF le ralzam caah sian lo um loin pekchanh lio a si. Vaurawng tlangau phu hmang in tam taktak an van thawh cang. Vanzang le Hriangkhan nih dollar sing khat renglo an thawh cang. Zohchunh tlak an si. Khua dang cio zong nih sing khat cio tal chuah dingah an i ceih lio pi a si. Ram a daih hlan lo kan pekchanh peng ko rih lai.

Nun cawn lio ah nunnak a liammi hna upatnak kan in pek hna. Nun cawn lio ah nu le pa inn le lo kaltak in ramtang ah training kai mi hna zong upatnak kan in pek hna. Nun cawn lio ah khua chuahtak in ralzam hna zong, van ihnek deuh ko u. Mupi nih hmur thar le thla thar a corh i thazang thar a lak bantuk in Chinland ram nuam le uknak thar tang ah lawmhnak mitthli he Bawipa kan thangthat te hna lai.

Nun cawn lio caan ah———(Kan i-hnek lai)2 Ram le miphun caah———-(Kan pekchanh lai)2. Satan rulhreu pennak ——–(Bawipa thawng in kan tei lai)2.