Even. Mang Cung Nung: Mikip Tel Khawhmi Thlacamnak!

“Mikip tel khawhmi thlacamnak” (October 12, 2021)
==============
Camp Victoria lei in Pastor le Ralbawi nih miphun dihlak thlacam an kan sawm. Jacob cu amah thah ding ah Esau le ralkap 400 an ra lio ti a theih tikah Bawipa sinah thla a cam (Genesis 32:9). Laihritannak kan ram lei ah ralhrang rual cu hriamnam phuntling le motor tampi he an kal lio, timi thawngpang le hmanthlak nih media hmai a cul dih. Hi thawng kan theihmi nih Jacob bantuk in Bawipa hmai ah thlacam lo kho lo dirhmun a kan phakter.

Jacob cu amah thah ding ah Esau le ralkap 400 an ra lio ti a theih tikah Bawipa sinah thla a cam (Genesis 32:9).
Laihritannak kan ram lei ah ralhrang rual cu hriamnam phuntling le motor tampi he an kal lio, timi thawngpang le hmanthlak nih media hmai a cul dih. Hi thawng kan theihmi nih Jacob bantuk in Bawipa hmai ah thlacam lo kho lo dirhmun a kan phakter.

Thlacam tikah hin a camtu minung cu kan thawng lo nain kan hei chonhmi Bawipa hi a thawngmi lakah a thawng bikmi a si. Haleluijah!. Thlacam cu a camtu lei kap zoh loin Bawipa ah kan zumhnak hei chiah khi a si. Jacob nih amah lei aa zoh tikah, a nupi Leah le Rachel, salnu Zilpah le Bilhah, a fa le hngakchia tete hleikhat a hmuh hna. A fa le cu puak le cawi hau mi, an ban in hruai chom hau mi, an tam deuh. Raldoh cu chim lo, thinphan thlalau in a thi colh ding phun an si. Cucaah cun pei Bawipa cu a fuh fam cu.

Ralhrang doh tikah i-tel khawhnak phunphun a um. Cu lakah kan zapi hmunkhat te ah tel khawhmi cu thlacam hi a si. Hriam tlai kho lo zong nih, chawva pe kho ve lo zong nih, thlacamnak ah kan i-tel kho dih. A ngaingai ti ahcun thlacam hi dah kaw a thawng bik mi a si cu. Teinak cu Bawipa kut chungah a um.

Miphun dihlak in thla kan cam lai. Thlacam kan thiam lo zongah Thlarau nih Bawipa sinah a kan chimh piak lai, Haleluijah!. Thla kan cam lo ahcun chimpiak kan si ve lai lo. Thla kan cam dih hna lai. Thlarau nih Bawipa sinah a kan chimpiak lai. Bawipa nih teinak a kan pek lai.

Rom 8:26 “Cu bantuk thiamthiam cun, a der ngaingaimi kan si caah, Thlarau zong cu kanmah bawmh awk ah khan a ra. Zeitindah thla kan cam awk a si ti hmanh kan hngalh lo lio ah bia in chim khawh lomi hram-ainak in Thlarau nih Pathian cu a kan nawlpiak”.

Rawl-Ulh Thlacam Sawmnak; Kan Miphun nih a biapi tukmi dirhmun kan phan cang, cu caah Chinram hrinfa vialte “Rawl-ulh Thlacamnak” ngei ți dingin kan sawm hna. Phungthlukbia 21:31., Raltuknak ni caah rangtum cu timh a si, Sihmanhsehlaw teinak cu (Bawipa) sinin a rami a si.

A Ni Caan … 2021 October 13, (6:00 am – 6:00 pm). Relchih ding …. Esther 4:15-16.,Salm 91:1-16. Rak ka share piak cio uh. Bawipa kan lei ah ttang ko sawhseh thlacam nak in kan can doh pi lai hna. Kan hawi Pastor pakhat nih zing a thawh kain zanlei pathum tiang sivang ngai le thinhung ngaiin thla a cam i, “Nan kut chungah pek an si cang” ti hi ka thinlung ah a ra tuk ee a ti.

Rawlulh Thlacam Sawmnak; Thaizing October 13 ni cu hmun kip ah a ummi Chin mi vialte nih kan umnak hmun cio ah zing suimilam 6 in zan 6 tiang rawlulh in ram le miphun ca ah thlacam cio ding a si lai. Kan dihlak in rian dang kaltak cio in thla kan cam hna lai.

Bawipa kut ah TEINAK a um i HIMNAK zong a um. Anih cu a nungmi Pathian, khuaruahhar thil a tuah khotu a si. Milem bantuk si loin a mi hna aunak aw a theitu a si. Thinlung dihlak in kan auh ahcun kan ram a damter ko lai. Psalm 33:12 “An Pathian ah Bawipa a simi miphun cu lunglawmmi miphun an si, Bawipa nih a mi ah a thimmi hna cu lunglawmmi an si.”

Psalm 33:17-20 Ral teinak caah ral tuknak rang hi san an tlai lo. A nganmi an ṭhawnnak nih a khamh kho hna lo. Bawipa nih amah a ṭihmi cu a zohkhenh hna i a fekmi a dawtnak aa bochanmi cu him tein a umter hna. Thihnak chungin a khamh hna i mangṭam tlun caan ah a nunter hna. “Bawipa cu kan i bochan, amah cu a kan bawmtu le kan phaw a si.”