Dr Sasa thluak ah Thiang Thlarau a khat lo, a khahter lawng ah Myanmar ram a tthangcho lai ti khi

‘A muipi he a hnachuah’ ti lawng cu bia a si lo. A muisam le a lungput in va cheh cu, bia-alnak dik a si lo (kan i palh tawn ciomi a si). A palhnak zawn theih le cu zawn cun a palhnak langhter tu kha bia-alnak dik a si.
David nih Sasa ramkhelnak i a luh kong le ramdang lei pehtlainak cozah thar rian i a luhnak kong in, “… ramkhel thluak a tthial dih in, Thiang Thlarau kha a thluak hmun a rolhter ahcun, ram thluachuah ah a cang lai… Cauk rel hnu ah ram caah ruahnak pe hlah. Zeihmanh aa hlei loh. Khika ram, hi ram ah cawnmi degree in ram caah ruahnak pe hlah. Zeihmanh aa hlei loh… Babylon Empire a tthanchonak na thei maw? Babylon nih Thiang Thlarau in a khatmi Daniel, Shadrach, Meshach, le Abednego kha vuanci rian a khinh hna ruangah a si,” a ti.

Hi a bia ah aa palhnak pawl cu, vawlei lei cawnnak cu ram tthanchonak ah zeihmanh a si lo, Thiang Thlarau in a khatmi vuanci nih Thiang Thlarau hmang lawng in ram an tthochoter ti khi a si. A bia-am ah Dr Sasa thluak ah Thiang Thlarau a khat lo, a khahter lawng ah Myanmar ram a tthangcho lai ti khi si dawh a si. Thiang Thlarau in khah cu, zei tahfung dah a hman hnga ti kha a biapi. Hihi cu, uitlak cho cuh in, ‘piangthar deuh’ va cuh phun kha a lo ko. Zawtnak tahnak bang Thiang Thlarau tahfung cu, aho nih an ser kho bal loh. Baibal tu nih cun, Thiang Thlarau theipar kha a chim hna. Hihi, ka subject a si lem lo le ka langhter lai loh.

‘Cawnnak’ zeihmanh lo ah a hun chim khi ‘extreme rhetoric’ chirhchan fek a ngei lomi a si. A bia ah Daniel, Shadrach, Meshach, le Abednego khi Thiang Thlarau lawng in a khatmi ah a rel hna i, aa palh bak. Daniel le a hawile 3 hi Chaldean holh le literature a cawngmi an si, kha lio chan i Babylon siangpahrang inn i rian luh khawhnak a herhmi cawnnak a si in an chim.

Izipt ram i Faro siangpahrang changtu i a cangmi pa Joseph kha micathiam le great manager a si. Thiang Thlarau zong cun, a khat an ti lio ah, Pathian pekmi cathiamnak a ngeih (management a thiam tuk) caah kha dirhmun ah khan rian a lim khomi pa a si.

Cucaah David bia cu, a palh hrimhrim. Ramthanchonak caah cawnnak le Thiang Thlaurau a ngeimi minung an tthathnem zia kha aa fiang lomi phungchimtu a si. Hi bantuk phungchimtu hi, a ‘extreme’ mi an si i, Baibal ah an kir lo ahcun, ‘cult’ ah i can a fawi. ‘Cult’ si hnu cun, ‘sualpi le sualte’ tuah lengmang a si tawn ko. Credit: Salai B Chan Khar