Dr.SaSa Bantuk Zohchunh Tlak

Dr.SaSa Bantuk Zohchunh Tlak
========================
Pathian nih a cawi cang mi hna cu minung nih thlak khawh an si ti lo. Kan CHIN Miphun chungin bochan mi mifim, Miphun le Ram caah upattlak an tampi. Cu chungin Dr.SaSa a lungput hi ka lung a ka suk ngai mi asi. Dr.SaSa hi popular timi a uar mi a rak asi lo, Hruaitu lutlai sinak le riansang kha a tlaihchan mi a rak si lo. Mi zapi lak ah cu bantuk ka rak si tiah min langh a uar mi a rak si lo. A tuah mi hi zapi hngalh ding in pholanghter a hmang mi asi lo. Mi nih ka fimnak ka si cannak an hngal sual lai lo tiin a cung kalang in a cawlcang mi a rak si lo. Cucu a tuahserhnak nih bia a chim i a donghnak ah mi vialte hmuh in cawithlir a hung si ko cang.

Kawlram cu chim hlah Vawlei pi nih upat mi pakhat ah a vun i chuah ko cang. Khua le ram Miphun caah rian a tuan mi hi a chung muru in a cawl, nain a tuahtuan mi nih thang piin bia a chim than lengmang. Mifim catang sang asi nain ai uah lo, nichir a ruah mi cu zeitindah mi vialte caah ka thathnem lai i ka bawmh khawh hna lai, khua le ram ka sersiam lai minung nunning ka tunmer lai, zeitindah dawtnak ka langhter lai ti hi a rak si deuh peng. Minung tampi cu a lu an duh i riansang an duh, minlangh an duh, milar si an duh , upat mi si an duh cucu atha ko, nain cu sinak ding caah aherh mi pekchanhnak cu an tuah duh ti lo.

Cu caah organization tampi le Biaknak Bu tampi ah a lu an i cuh ruangah an buai hna, Rampi zong ah luzik sinak an i cuh an buai hna minung thisen a luang. Cu bantuk pawl nih cun daihnak le dawtnak tak kha an chuahpi lem lo. Cu caah Chin Miphun thangthar Mino hna nih Dr. SaSa hi thlalang bantukin i zohchunh hna uh si.A nun dan le a rak i zuamnak a riantuan ning hi zohchih in a keneh zulh i zuam ding asi. Dr. SaSa Upatnak kan in pek. Kai lawm. Thawng Bawi Zathang