Dr. Lian Hmung Sakhong; Camp Victoria An Tuk Lai An Phan Deng Cang!

Camp Victoria An Tuk Lai An Phan Deng Cang.
==============
Vaurawng zunthil nih Dr. Lian Hmung Sakhong biaruahnak an ngeih mi ah a chimmi cu Min Aung Hlaing ralhrang phu nih Victoria Camp a tuk ding an a ra lio a ti, tiah a chim. A luan cangmi caan zeizet ah khan Camp Victoria kan tuk lai an timi biathli cu National Unity Government (NUG) nih kan theih cang a ti.

Atu hi mawtaw ngan pipi 52 in minung 700 hrawng cu kawlrawn lei in a rak phorh hna i, Zahan zan ah Kalaymyo an phan. Chinram an tak panh thluahmah cang. Kalay ah atu hi an um lio si. Camp Victoria tuk a timh caah Laitlang lei a rak kai cawlh lai a ti. Kan tei hriam hna lai, a ruang cu Lai mi cu Jesuh kha kan bawi ah kan chiah i a nungmi Pathian he ral kan tu a ti. Hihi Min Aung Hliang nih a thei loh a ti.

Min Aung Hlaing nih Chin mi a kan nek tuk caah fawi tein ka tei lai tiah a ruah. A ruah bantuk kan si lai lo. Rak ra tuah seh a theih lai a nungmi Pathian nih a kan dohpi lai. Kan tih naisai hna lo tiah a ti. A nawlh rih mi cu nu vialte le mino vialte nih MAH ralhrang an si khawh tawk cio in an doh mi hi a tih bik mi a si tiah a ti.

A bia donghnak ah a tu hi Victoria Camp laak ding ah an rak kai cuahmah cang Kalay an phan. Lampi thluangthluan ah kan kah hna lai kan doh hna lai, lung kan hrilh hnawh hna lai i kan tei hrimhrim hna lai.

Kan bochan tukmi kan ralkap CDF/CNA pasalṭha, nusalṭha hna, ṭihphannak le lungzurnak thinlung zeihmanh ngei hrimhrim hlah u mu… Bawipa nih an dohpi hna lai ee, nan caah thla kan cam lengmang ko.

Oct 8 Nikhat Chung Thawngpang Biapi Deuh Thimmi-8. 1. Ralhrang Nih Kalay Peng Thayagone Khua Ah Inn An Khangh! Sagaing ramthen Kalay peng Thayagone (သာယာကုန်း) khua cu Oct 8, tuni zinglei ah ralhrang nih an luhhawh hna i facang rialnak seh inn, ar zuatnak inn le minung umnak inn pakhat mei in an khangh tiah khuami nih an chim. Thayagone khua hi Kalay-Gangaw lampi in nitlak lei kap ah a ummi a si. Ralhrang nih cun bomb an kawl caah an rak luhmi a si. Lampi zongah meithal an puah peng theih a si.

Khuami pakhat Van Cin cu ralhrang nih an tlaih tiah an chim fawn. Zanlei hnuah ralhran g nih khua an chuahtak ko nain thinphan le lungretheih ruangah cheukhat cu an zam hna i khuachungah mitlawmte lawng an taang tiah theih a si.
Oct 7 ah Thayagone khua pawngah ralhrang mawtaw bomb puahhnawh an ton caah tuni ah ralhrang mawtaw 50 renglo le ralhrang thazaang 150 nih an luhhnawh than hna hi a si tiah RFA nih a tial.

2. September Thla Chung Kahdohnak Ah Ralhrang 760 Leng An Thi Tiah NUG Nih A Thanh: September thla chung ah kahdohnak 690 a um i ralhrang lei 760 leng an thi tiah NUG nih nihin ah a thanh. Cathanh chungah september 1 in 30 tiang ah ralhrang lei in a tlawm bik( 768 )an thi i (220 )an i hliam. Mizapi lei in nunnak liam mi (164) le a hliam mi (109 ) an si tiah an thanh.

Mah kahdohnak chungah tlangcung hriamtlaibu he kahdohnak( 65 ), mipi ralkap he kahdohnak (132), ralhrang bawmtu chungkhar hna tlerhkhawnnak (125), Puahkehnak (192), Ralhrang minung hna cung i hremnak (174), ralhrang le ralhrang i kahnak (2) a um . NUG cozah cu mizapi himnak caah a zuam mi a sibantukin DDay thanh hnu ah mizapi lei fek tein dirmi ralkap CDM le Palek CDM hna nifatin in an tam chin tiah NUG cozah nih a langhter.

3. Min Theihlomi Hriamtlaibu Nih BGF Riahbuk An Kah, BGF 4 An Thi: Karen ramkulh, ပိုင်ကျုံမြို့၊ နောင်မြလွဲ (Pinekyo peng Nyaung Myiah Lwe) khua pawng ah a ummi ramri hngak talkap BGF riahbuk cu zeibantukin hriamtlai dah an si tiah hngalh lomi nih an kah i BGF lei 4 an thi.Nuang Myiah Lwe khua le Kawh Ing Sai khua ah a um mi BGF riahbuk cu October 7 zaan Suimilam 11 ah hngalhfian lo mi hriamtlai bu nih an rak kah hna i BGF lei in chungkhar he a si cang mi 2 tel in minung 4 an thi tiah khuami hna nih an chim.

“Zaan suimilam 11:00 ah an rak kah. Zeibnatuk hriamtlai dah an si ti kan thei lo. Minung 4 an thi ti kan theih. Nu ralkap pakhat zong a tel. Fiang tein cun kan thei kho rih lo.Atu hi BGF pawl nih an rak hlat ” tiah khuami hna nih an chim. Tuzing ah Nuang Myiah Lwe le Kaw Ing Sai khuachung cu BGF ralkap mawtaw 9 in an rak lut i chekhlatnak an tuah i khuami hna cu thinpang thlalau in an um tiah theih a si. An kah mi BGF riahbuk cu No (1019 ) Battalion kut tang riahbuk pakhat a si i Nuang Myiah Lwe khua le Kaw Ing Sai khua ah an um nak hi a sau rih lo tiah Than Lwin Times nih a tial.

4. Putaoo ah ralhrang nih PDF le CDM tuahmi an kawl hna: Kachin ramkulh Putaoo peng Lungsuait sangah October 7, zinglei suimilam 9:00 in ralhrang hna nih sangkip inn ah luhhnawh in mizapi vengtu ralkap PDF hna le CDM tuahmi cozah riantuan hna cu an kawl hna tiah theih a si. Khuami pakhat nih “Hramhram nawlngeihnak la tu ralhrang kuttang um ralkap minung 5 hrawng, cun palik le sang uktu khuabawi hna le cazi riantlai, an dihlak minung 14 hrawng nih checkhlatnak an tuah hna. Innkhat hnu innkhat ah an lut, PDF a tuah tu an um maw, CDM tuahmi nan um maw tiah an hal hna” tiah a chim. Ralhrang hna le khuabawi hna nih Lungsuait sang checkhlatnak an tuah lengah, vanlawng tumnak pawng sang li ah zaanlei suimilam 3:00 tiang checkhlatnak an tuah tiah theih a si.

5. Myanmar ram chungah thatlonak vialte a rannak in ngol dingah Amnesty International-AI) nih a nawl: Myanmar ram chungah hramhram cawlcanghnak le riantuannak vialte a rannak in ngol dingah Amnesty International-AI nih UN chungtel ram hna sinah ca a kuat hna. Cu cakuat cu ram 161 in mipi 70000 leng nih lungtlinpi nak minthut zong a tel tiah AI nih a langhter. Cu cakuat ah cun Myanmar ram ralhrang nih nuhrin covo a buarnak ngol dingah ramkip nih nawrnak tuah ding, sualpalhnak a tuahtu hna cu dantat ding le ralhrangbu cungah a fak deuhmi dantat phihkharnak tuah cio ding, ti bantuk an i tel. Cun ralhrangbu nih ASEAN hnatlaknak 5 hna cu kha upat in zulh dingah AI nih halnak a tuah fawn tiah The Irrawddy News nih a tial.

6. Rakhine Ramkulh Chief Minister Hlun U Nyi Puh Cu Rianhrang Tuan He Kumhnih Thongdan An Pek: Rakhine ramkulh Chief Minister hlun U Nyi Puh (ဦးညီပု) cu pohmah 505 (b) in tazacuai a si. Oct 8, tuni ah Sittwe (စစ်တွေ) peng biaceihzung ah bia an ceih i rianhrang tuan le kumhnih thongdan an pek tiah theih a si. Ralhrang nih hramhram in nawlngeihnak an lak thok in NLD hruaitu minlang deuh hna cu pakhat hnu pakhat in an tlaih hna i pohmah 505 (b) in taza an cuai hna. Hi pohmah in biaceih piak le thongthlak a tongmi cu Magway ramthen Chief Minister U Aung Moe Nyo (ဦးအောင်မိုးညို) le Rakhine ramthenရ Chief Minister U Nyi Puh hna an si tiah BBC nih a tial.

7. Myanmar Ti Ralkap Palai Hna Cu Ramchung Luhnak Nawl Pek Lo Dingin Ukraine Cozah Sinah Justice For Myanmar Nih A Nawl: Nai ah khan Myanmar ti ralkap palai mining 18 hna cu Ukraine ah an kal nain Airport in an kirter than hna. Cu hna cu Ukraine nih ramchung luhnak nawl pek dingmi hngak in Malaysia ah an um ko tiah theih a si.

Hi hna hi ralhrangbu nih raldohnak tilawng Free Gate saknak project kongah Ukraine a kalmi an si nain Ukraine nih ramchung luhnak nawl a pe rih hna lo. Myanmar ralhrangbu ta a di dingmi Free Gate raldohnak tilawng sehnak hi Ukraine ram raldohnak hriamnam sertu company Ukroboronservice le Zorya-Mashproyekt nih tuanvo an lak lai. Hramhram in nawlngeihnak a latu ralhrangbu nih cun ramkip huap zulhphung hna le nuhrin covo hna cu zei a rel lo i a buar lengmang hna. Cucaah Ukraine nih ramkip zulhphung kha upat in Myanmar ralhrangbu sualnak le thatlonak donghternak ah i tel ve dingin Justice For Myanmar nih nawlnak cathanh a chuah.

8. Ralhrang minung pathum nih CDM an tuah i Pyituh Yinkhun nih a himnak hmun ah an chiah hna: Sagaing ramthen, Wetlet pengah SAC ralkap pathum hna cu CDM ah an lut i Pyituh Yinkhun( ပြည်သူ့ရင်ခွင်) nih a himnak hmun ah tluangtein an chiah cang hna tiah Oct 8, tuni ah Pyituh Yinkhun (ပြည်သူ့ရင်ခွင်)-Wetlet cathanh an chuah. Pyituh Yinkhun ah i dor dingin pehtlaihnak tuahmi tampi an um, cazin lak in riantuan cuahmah a si. Wetlet pengah ralhrang kuttang um riantuanmi ralhrang le palek hna cu a rauh hlan ah a sung ding an si cang caah a caan um lio te ah ralhrang kuttang in chuah ding le a himnak zam dingin Pyituh Yinkhun nih a kuancia Sept 25 ah sawmnak cathanh a rak chuah cang, tiah Khit Thit Media nih a tial. Credit: The Chin Post