Bia Roling le Lawmhnak!
==========
July 19-23, 2023 karlak tuahmi A Voi 11nk CCDK Confernece le Tournament ah kai tel kho ve. Hlan ahcun celhzuamnak ah kai tel ve tawn, nain ka kum hi vei ve cang i, zuamnak ahcun kai tel kho ti lo. Nain ka aw zong ping viar in thapeknak hi ka tuah. Tuanbia ngaingai si. Zuamnak le lentecelhnak phunphun tuahmi cu zoh an nuam dih ko.
Cun, bia roling zong tampi ka theih i, sunglawi tuk khi si. Bia roling tlawmpal in van thawk usih: “Kan ral hi kan tei lo ahcun, tulio ka holhmi holh (Lai holh) hi tlau lai” (Dr. Lian H. Sakhong). Thisen in miphun humhak le thisen in tuanbia ttial herhnak pehtlai in chimmi cu Kawl nih Laimi cungah an tuahmi thil pathum ruangah si: 1) Kawl nih Lai miphun cihmih an duh. 2) Kawl nih Lai caholh cihmih an duh. 3) Kawl nih Laimi hi budist ah canter an duh. “Halleujah ti lomi cu hell tla ding ah kan ruah ko hna” (Rev. Ngun Awi).
“Kristian si sawhsawh hi za lo, hrintthan (born-again) lomi cu vanram, nan phan lo hrimhrim” (Rev. Ngun Awi). “Hruaitu tthami le smartmi pa lawng nih nu hi pulpit an kan pek” (Rev. Bawi Cin).
“Mizoram Laimi hi holh ah, phun theihhngalhnak ah le pupa nuncan cinkennak ah saupi kan tlau i, rak kir cang uh timi kan si” (Rev. B. Zazawma).
Bia roling an chimmi hna hi tuaktan le kherhhlai dingmi an tam ngaingai. Lulin ngai in miphun le zumhnak pehtlai ah ruah ding lawngte an si. Nain, kan van khehhlai hna lai lo…Kahin tutan C&T pehtlai ah, pumpak in kai lawmhnak tlawmpal, ka van ttial in langhter ve lai.
1nk cu, ka ttialmi cauk “Lai Miphun: Khualtlawng Laimi” cu A Ttial, A Fom, Jenny le Dr. Lian H. Sakhong laksawng ah ka pek ve hna. Ka van lau tukmi cu a cauk ka rel le kai cherhchan ttheumi Dr. Lian H. Sakhong nih, “na min ka thutpiak ta a ka ti i, a ze tiah lau ngai in ka hei thutpiak ve”. July 22, 2023 zan ka caah zan sunglawi, cinken dingmi van si. Kai lawmhmi cu relpiaknak caan a ngeih lo zong ah, ka cauk laksawng in pek khawhnak caan ka ngeihmi kha si.
2nk cu, ka phu lo nain, “mintarmi panga chungah kai tel ve”. CCDK Person of the Year thim dingmi mintar ah kum 2016 ah siseh; kum 2019 ah siseh; kum 2023 ah siseh – mintarpiak ka simi hi laksawng nganpi si. Tutan ah CCDK Person of the Year hmumi Pu Za Awi Thang zong ka van lawmhpi – a nih hi lam kip in miphun rian ah siseh; kohhran rian ah siseh lutlai le hruaitu dirhmun in rethei pengmi si i, a tinco awk si ko. Ka caah tuanbia le laksawng simi mintarnak ah ka min chuahpitu le thimfung a ka petu vialte cungah lawmhnak tampi ka ngei.
3nk cu, Pu Hrang Nawl nih dohthlennak rak tuah lioah, hrampi rak si vemi Rev. Ngun Awi le Pu Hrang Nawl fanu Rev. Bawi Cin ka tonmi le hmuhmi hi si. Ka nu hna nihcun Pu Hrang Nawl tuanbia le cauk hi rel huam ngaimi si. Lai tuanbia, nunphung, phunglam, caholh le sinak tbk kong hi ka ttial huam lio caan ah, milian zeimawzat ka ton hna i, kai lunghmuih.
4nk cu, CCDK Phunghram pehtlai in fiantertu ah an ka fial ve i, CCDK GM ah voihnih-thum cu metting hruaitu nih a ka dirter ve. Ka tuahvo le rian ah tlamtling in kai ruah i, kai lawm ko – miphun lungput dirpi le dinnak ttanh hi thawk lioah a har, nain a theipar ttha an ti. Mah vial khan van si rih seh.
Note: “Lai Tuanbia – Thawhkehnak le Pipu Nunpimi” timi cauk thar ka van tawlrel pah cuahmah lio si i, kum dongh lei cun tlamtling te kho men. Nain, a poi pahmi cu: pumpak projek in cauk tawlrel bal hi – samparnak rak si. Credit: Van Nun Lian