SAC Cozah Lutlai Thlenremhnak An Tuah; Chungtel Ah Dr Hmuh Thang Aa Tel
=========
State Administration Council (SAC) cozah lutlai tu hna hruaitu thlenremhnak an tuah nak kong 2023 August thla 2 ah SAC cozah nih an langhter. An thlenremh mi chung ah SAC cozah chungtel a rak si mi U Maung Ko le Dr Aung Kyaw Min hna cu an dinh ter hna i minung 18 in hruaitu pawl thlenremhnak an tuah hi a si.
Thlenremhnak an tuah mi chung ah Min Aung Hlaing cu lutlai bik a si i a chang ah Soe Win le chungtuan tu ah Aung Lin Dwe le a bawmtu ah Ye Win Oo an si. Chungtel ah Dr Hmuh Thang telh in minung 14 an si hna. July 31 ah tuah mi SAC cozah nih uknak thla 6 chung an pehsoh hnu in lutlai tu chungtel minung 2 telh in ramkomh vuanci le lutlai dangdang minung 10 zong an rian in an phuah hna.
Tonzaang Khua Kahdohnak Ah CDF Pakhat A Nunnak Liam; Chin Ralkap 2 Hliam An Tuar. 2023 August 1 Chin ramkulh Tonzaang khua chung ah SAC ralhrang le Chin ralkap ṭangṭi phu kar kahdohnak a chuak i CDF-Hualngoram ralkap Lalramchuana (kum 30) a nunnak a liam tiah CDF-Hualngoram in ṭuanvo ngeitu pakhat nih Lungmili Post ah a chim.
“Hi kahdohnak ah SAC ralhrang lei a thi mi le hliamtuar an um nain, a zat kan hngal kho rih hna lo, Mipi lei in hliam tuar le a thi mi an um le um lo kan hlat lio a si. Mah ni kahdohnak lio ah CDF-Hualngoram ralkap in pakhat le CNA ralkap pakhat hliam an tuar. August 2 zinglei zongah kahdohnak a chuak rih” tiah a cunglei upa nih a chimchap.
Hi kahdohnak ruang ah Tonzaang peng Mualpi khua mi Pa Mang Sian Cing (kum27) a thi i ngakchia kum 8 mi le kum 12 telh in minung 3 hliam an tuar tiah Tedim Times nih a langh ter. Hi kahdohnak cu CNA, PDA, CDF-KKG, CDF- Hualngoram le CDF- Tonzang hna an i tel tiah kan theih.
Chin Ram Chuak Thingbawnbok Cu Kawlrawn Ah A Man Tha. Chin ramkulh khuati nih a duh i a tha ngai mi Thingbawnbok cu Kawlrawn lei ah a man tha i Thingbawnbok cing tu hna tangka luh a tha tiah kan theih.
Kawlrawn lei Thingbawnbok zuarmi cu Chin ramchung in kuat mi deuh a si caah Kawlrawn ah cun Chin Thingbawnbok tiin mitam deuh nih an kawh auh. Thingbawnbok cu a kheu zong in cin khawh a si i a nge zong in cinkhawh mi phun a si. An cin thokka kum khat in kum hnih kar ah a thei tlai i thla 3 tiang a thei tlai kho mi phun a si.
Falam peng ah cindeuh mi Thingbawnbok cu kum fatin in Hakha, Kalaymyo le Mandalay lei tiang an kuat hna i kum khat ah a tlawmbik sing 5 tluk tangka a lut tiah Thingbawnbok kung 3000 leng a cingmi pakhat nih a chim.
SAC Nih Kyats 20,000 Ca An Chuah Hnu In Hakha Thil Man Cheukhat Dirhmun. SAC nih kyats 20,000 ca an chuah hnu in Hakha ah thil man a kaimi zong an um i amah kel in zuarmi zong an um ve, tualchung mi hna sinin theih a si.
Tualchung mi pakhat nih The Chin Post chimh ning ah, SAC nih kyats 20,000 ca an chuah hlan in Hakha ah facang man le chiti man cu a kai ngai cang. Facang dawr a tuahtu hna zong an zuar ning aa khat cio lo. Dawr pakhat nih facang tun khat ah kyats 90,000 in a zuar lio ah 95,000 – 100,000 kar in a zuarmi zong an um.
SAC nih kyat 20,000 ca an chuah hnu in atu lio Hakha facang man cheukhat cu Pawsan hmui(ပေါ်ဆန်မွှေး) tun khat ah kyat 150,000, Lungtuai hmui(လုံးသွယ်မွှေး) tun khat kyats 140,000 le Kanan Ayarmin(ကာနန်ဧရာမင်း) hi tun khat ah kyats 110,000 a si, tiah theih a si.
“T.S.O.(Sunflower Oil) chiti pung hme pakhat ah kyats 40,000 a phan i pung ngan pungkhat ah kyats 150,000 a phan. Hakha facang man le chiti man hi SAC nih kyats 20,000 ca an chuah hlan zong in a kaimi an um i an chuah hnu zong in a kaimi an um ve,” tiah Hakha ummi pakhat nih The Chin Post ah a chim.
Cu ṭhiamṭhiam in Hakha thil man cheukhat lakah a man a ṭum lei a panh lomi ah datsi hi aa tel ve. Datsi thawl khat ah kyats 2,500 – 3,000 kar a si i Gollon khat ah kyats 13,000 – 14,000 kar a phan. Nain cheukhat datsi dawr ah cun Gallon khat ah kyats 11,000 man zong a um, tiah theih a si.
Hakha thil man cheukhat lakah a herh bik tiin langhter mi facang, chiti le datsi man hna hi Hakha khuachung ah an zuarning aa khat cio lo caah hihi a dik bik, tiah The Chin Post nih kan fehter mi a um lo, buaktlak in kan ṭialmi a si. SAC ralbawizik Min Aung Hlaing nih Sagaing ramṭhen, Magway ramṭhen, Chin ramkulh le Karen ramkulh hna hi tlaih khih an har ngaingai tiin July 31 meeting ah a rak chim.
Cu ruangah Chin ramkulh hi zeitindah an hruai te lai, lam le sul phihkhamnak asilole thil man faak tuk in kaiter tibantuk ngian maw an hman te lai ti cu tualchung mi cheukhat nih an ceihphai mi a si. Hakha ummi cheukhat cu datsi le thil man a kai ṭhan lai ti thawng an theih caah an ngeihchun tangka in eidin tete a cawmi zong an um, tiah theih a si.
Chak Lei Tlangcung Hriamtlai Phu 4 in Ralkap Chungtel 22 Cu SAC Nih An Sual An Ngaihthiam Hna. August 1 ah SAC nih thongtla an luatter mi hna chung in chak lei tlangcung hriamtlai phu 4 in ralkap 22 zong an sual an ngaihthiam hna i an luatter hna, tiah theih a si.
“Luatnak kan pekmi hna chung in Ta’ang National Liberation Army(TNLA), Shan State Progressive Party/Shan State Army(SSPP/SSA), Myanmar National Democratic Alliance Army(MNDAA) le Arakan Army(AA) chungtel hna an i tel,” tiah SAC nih an langhter.
TNLA chungtel ralkap 16, MNDAA in ralkap 2, SSPP/SSA in ralkap 3 le AA ralkap 1 cu nizan August 1 ah SAC nih thonginn in an chuah hna, tiah theih a si. Chak lei tlangcung hriamtlai phu chungtel ralkap 22 an thlahmi hna cu hi hnu ah sualnak nan tuah rih ahcun a hlan i a tangmi nan sualnak case relchih in thong thlak ṭhan nan si lai tiah SAC nih an chuah hna. Credit: The Chin Post, Lungmili Media