Donald Trump nih US sovereignty pi hmang in Israel hi ziah hi tluk in a ttanh hnga?

VAWLEI CALENDAR A SIMI ISRAEL TUANBIA IN VAWLEI KHUACAAN TUAKNAK
=======================
Donald Trump cu zahan ah Israel pawl i Second Temple Rededication (Temple pahnihnak Ap thannak) philhlonak puai a simi Hanukkah Puai cu Whitehouse ah a tuah pi hna. Cuka ah “Fimnak le ralthatnak a ngeimi minung kha kan herhmi a si ko. An um cun Election hi kan tei khawh lai” tiah a chim. Election kong hitluk in buaipi ding tam lakah Trump cu Israel le Morocco remnak a ser piak khawh hoi.

2020 August 13 ni in a tu tiang thlali chung ah Israel cu ram ramli (UAE, Bahrain, Sudan le Morocco) he ABRAHAM ACCORDS timi remnak a ser piak cang. Hi ram hna hi Middle East ram Muslim lakah a tthawng ngai mi Sovereignty a ngei taktak mi an si. Israel nih Independence a ngah kum 1948 in 2020 August tiang kum 72 chung ah Egypt (1979) le Jordan (1994) ramhnih te lawng he remnak ser khawh a rak si. (Israel le US hi hohmanh nih mahte i hruainak (Independence) an pe lo, anmah te an laak, mah tein declare/claim a tuahmi ram an si)

RUAH AWK THIL; 1. Donald Trump nih US sovereignty pi hmang in Israel hi ziah hi tluk in a ttanh hnga? A buaipi hnga? 2. Ram tampi he remnak Cachuk ser hi Daniel 9:27 “Cu a tthawngmipa nih cun mi tampi he zarh khat chung a fekmi biakamnak a tuah lai” timi Antichrist nih kum 7 harnak ah a tuah hnga mi he pehtlaihnak a ngei hnga maw? 3. Israel luatternak biakam Balfour Declaration (1917) kum 100 tlinak 2017 ah Trump nih Jerusalem cu Israel ta a si a timi hi Antichrist nih a thurhnawmh te dingmi (Dan 9:27; Mtt 24:15) The Third Temple saknak ca lam onh chung a si hnga maw? 4. Jared Corey Kushner (Trump fanu Ivanka i vapa) hi Donald Trump i senior advisor a si. Cun Trump a kai kum (2016) in Digital Media strategy lei tuanvo la tu le a bikin Middle East lei he Peace Process timi Israel he remternak rian ah cungcuang ngai mi a si. Amah hi tah Israel caah zeitluk tiang rian a tuan te hnga?

TIMHLAMNAK A HERHMI; Atu chandonghnak cu a nai cuahmah cang ko. Khrih na ngei cang maw? A ngeimi nih cun “Ka ngei cang” timi hi fiangtein an i hngal. Cuti kan i hngalh khawh dingah Pathian nih cu Biatak cu kan sin ah a phuan cang (1 Johan 5:13). “Mi vialte caah Mi Pakhat (Khrih) a thi. (Khrih) a thihnak ah mivialte an thi ve (2 Korin 5:14). Khrih i a cross le a thihnak ah misual ka sinak cu a thi, vui in a um i Khrih a thawhthannak ah Mithar sinak in kan tho ve caah atu cu keimah (mihlun kha) si ti loin Khrih i pekmi nunnak in ka nung cang (Galati 2:19,20) ti a hngal fiang i a zummi paohpaoh cu Khrih a comi/a ngeimi kan si. Credit: Jacob Lian

Hi thawngpang relchap lo cu a pam tuk hrignhran, 𝐅𝐚𝐜𝐞𝐛𝐨𝐨𝐤 𝐓𝐡𝐞𝐧𝐡𝐦𝐚𝐥 𝐇𝐫𝐢𝐦𝐡𝐫𝐢𝐦 𝐝𝐢𝐧𝐠𝐢𝐧 𝐔𝐒 𝐂𝐨𝐳𝐚𝐡 𝐧𝐢𝐡 𝐁𝐢𝐚𝐭𝐚𝐤𝐭𝐡𝐥𝐚𝐤 𝐭𝐞𝐢𝐧 𝐓𝐚𝐳𝐚 𝐚 𝐂𝐮𝐚𝐢. Digital marketplace cung i nawl a ngeihnak Facebook nih zohdawhlo in a kalpi i, midang zuam awk tha lo dingin khua a sa, tiin US chungum state 12 nak tam le federal cozah kawpin Wednesday ah khan Facebook taza an cuai. Ai hman chinmi Instagram le WhatsApp telhchih in a dang apps pawl ai hmanmi pawl hi vun hrawk dih hna seh. Kan theih cio bangin, hi pawl ko nih hin Facebook hi a chiahchuah dih cang, tiah, a hleice in, Federal Trade Commission nih federal court ah tazacuainak a tuah. A herh a si ah cun, Facebook hi hrawh dih lawlaw ah a tha ko, ti tiangin states pawl nih an duhnak an langhter.

“Pumpaak social networking hi American mipi million tampi i an nunnak ah a biapi ngaimi thil pakhat a si. Facebook nih hin a nawlngeihnak dirh (establish) le kilven a duh ruangah hehtiah a cawlcang i, cu a tuahsernak nih cun Facebook a hmangtu hna an i zuamnak thawngin an hmuh hnga dingmi a miak (benefit) pawl hmu kho lo dingin a tuah hna. Cucaah, kan i timhmi cu, midang nih an vun zuam lai hi a duh lo caah, cu a lungput cu hrawhpiak i, thanchonnak le zalongtein i zuamkhawhnak lam a um khawh than nak lai, midang zuam khawhmi si kho dingin kan siamremh than lai,” tiin FTC’s Bureu of Competition an director Ian Conner nih a chim. Silicon Valley ah a thawngbikmi corporations pakhat zong faak taktakin taza an cuai ve bal. Facebook nih Instagram le WhatsApp a uk le a pen mi ko hi an tazacuaitu nih an huat khunmi a si. Hi apps pahnih hi Facebook nih ai hmanbikmi services an si. 2012 ah khan Facebook nih Instagram hi $1 billion in a cawk i, kum 2 hnu ah WhatsApp hi $19 billions in a cawk.

Facebook nih hin midang zuam duh lo phunphai in ai cawlcanghter mi a lo, tiin New York Attorney General Letitia James nih a lung a hrin caah, attorney general group a thithtuai hna i Facebook cungah hlathlainak an tuah. Cu ti hlathlainak an tuah thla 14 hnu ah a tu bantukin tazacuainak an tuah hi a si. Wednesday tazacuainak capar i min a thutu attorney generals hi minung 40 lengkai an si. 2019 June tein khan FTC belte nih cun amahtein Facebook a zumh ti lo nak kongah hlathlainak a tuah cang. “Amah a dironh, asiloah a zuam khotu dawh dang in a hmuhmi paoh rialdit, asiloah hrawh a duh ruangah Facebook nih a nawlngeihnak le mi a pennak a thazaang hi a hman. Cu ti a hmannak hi kum 10 deng a rau cang. Tor le cheng data chiah khawhnak thazaang ai ngeihmi le a phaisa thazaang i hman riangmang in, amah dironh khotu ah rauhmi paoh cu a rialdit asiloah kham duahmah hna,” tiin Wednesday press conferece ah James nih a chim.

Hmeilei ah cun, Facebook nih $10 million asiloah cu nak tamdeuh in thil cawk ai timh ah cun, state officials sinah thawng thanh dingin nawl pek ah a tha, tiin tazacuaitu states pawl nih biaceihzung ah an duhnak an langhter.
“The Commission nih tazacuainak capar tlap 53 chungah an telh lo nain, hi ka zawnte i a biapitaktak mi thil pakhat a ummi cu, cu bantuk thil a cawkmi cazin a hlohnak hi kum tampi a rau cang. A tu cu a thar in vun tuah than dingin cozah lei nih kan duh. Cu in cun, thil zawr khawh vial lawng hi a donghnak a si lo zia hi American business paoh nih ralrin zia vun thiam ve hna seh, ti kan duh,” tiah Facebook ah VP and General Counsel a si mi Jennifer Newstead nih a chim.

Mipi le business hmetuai pawl nih hin Facebook i a free service le a chawngia (advertise) hi hman an duh ruangah an hman hi a si lo, an hman a hauh caah an hman bia a si. Kan apps le kan service nih hin a thabikmi a pek khawh caah an hmannak hi a si. Cucaah, mipi nih duhthimnak an i ngeih khawh nakhnga biataktein kan runven hna lai,” tiah Newstead nih a chim. A tutiang rih ah cun WhatsApp le Instagram he deal an tuahmi cungah regulartors nih dohdalnak an tuah rih lo nain, competition watchdogs pawl hi tehte thar pakhat khat a ummi zulh in lung i thlennak nawl a ngeimi an si, tiah FTC ah chairman hlun William Kovacic nih a chim.

Deal tuah an timhmi challenge tuah lo dingin zeibantuk agency hmanh nih biachahnak hei tuah ko hmanh sehlaw, US union law tangah cun, deal an tuahmi zohpiak thannak tuah kho lo dingin cu bantuk biachahnak nih cu a kham kho hrimhrim lo, tiin a chim. Facebook nih apps pawl a cawknak a ruang hi minung tampi pumhkhomh khawh a duh caah a si i, nihin i a cawkmi apps a hmangtu hi 3 billion hrawng an si cang, tiah Facebook financial statement nih a chim. Cu bantuk i nawl a ngeihnak (dominion) cu legal expert le US lawmakers pawl nih an ceihcum ngai cang. Cu bantuk apps pawl vun lemh/dolh viar dingah Facebook CEO Mark Zuckerberg nih hin midang nih vun zuam khawh lo ding ai khamkanh le a si men lai, tiin an chim.

Facebook duhlonak thawngpang cu Washington ah a tur in a tur chinchin cang caah, Facebook zong nih cun vun dironh ve dingin kum tamial timhlamhnak a ngei ve cang. A hmanmi apps pawl cu technical level tiang phan kho dingin a tuahtamh hna i, a chungthilri (apps pawl) thenhmalpiak dingin cawlcanghnak a um tikah dironh kho dingin ai timlaam le si lai, tiah critics pawl nih an chim. Tazacuainak le business controlnak kongah experience a ngeimi sihni pawl Facebook nih a hlan hna. Facebook nih hin sikhaan tuahpiak hi kan cohlanmi a si, tiin baika dawh ngaiin a chim ko nain, China hei ti bantuk amah a dironh khotu ram sinah amah vun zuam khawh dingin i thumh cu a ngamh ruam lo.
Midang nih zuam kho lo dingin i kilvennak (antitrust) kong he pehtlaiin, US le state cozah officials nih tu kum i taza an cuaimi global tech company 2 lakah Facebook ai tel ve cang. Google nih online search le search advertising ah hmunhma thabik ai ngeihmi kilven a duh caah midang company nih vun zuam khawh lo dingin ai tuah, tiin October ah khan Justice Department le state 11 nih taza an cuai. Taza an kan cuaimi hi a palh ngaingai mi a si. Kan customers pawl nih kan Google an hmah hi amah duhthim te a si, hneek chom in an hman a si lo, tiin Google nih an chim. 1999 le 2000 hrawng ah khan Microsoft zong US cozah nih taza an rak cuai ve bal cang.

Policemakers pawl nih an lungre a theihpi mi tech company pawl ah hin Facebook le Google lawng hi an si lo. US chungum tech company dihlak hi midang zuam awk tha lo dingin an i kilveng maw veng lo, tiin US offcials nih an ngait dih cang hna. A bikin, kan nunnak a kilkip a cuul cuahmah tu company 4 hi an i hmaithlak khun hna. Apple nih iOs app a control ning kong siseh, Amazon nih e-commerce platform ah independent sellers pawl a tuahto ning vialte zong an i nigat lio pi a si. Facebook kongah cun, a takin Facebook nih ningcanglo in a cawlcanghnak a um le um lo, cun Facebook a hmangtu asiloah Facebook he ai zuammi hna fahnak a pek hna le pek hna lo, biaceih zungah cozah officials pawl nih tehte an langhter khawh a hau lai, tiah Goerge Washington University’s Institude of Public Policy ah economist le antitrust expert Hal Singer nih a chim. “Hi kongah thil an cawkman hi ai tel awk a si lem lo. Cu bantuk cu pumpaak thil a si. Asinain, cu pawl cu na langhter hna a hau lai,” tiin a chim.

State nih tazacuainak an tuahmi ah cun, Facebook ningcanglo in an cawlcanghmi nih a hmangtu pawl fahnak a pek hna, ti a si. Social media platforms lakah le thitha in an hman khawh lo mi pawl kongah internet hmangtu pawl hi duhthim ding tlawmte lawng an i ngeih kho cang. Cu lio ah cun tech industry hi a cungah investment tuahtu a tong huaha ti lo.

Facebook nih third-party app developers caah platform pakhat a dirh chap i, Facebook riantuannak chungah khumh i, amah dirhonh kho a si cang, tiin a hmuh hnu ah a service chung in a thrilh te lai, tiah official pawl nih an chim.
Facebook nih hin phung buar ai timh tak ko ah cun, a chungthilri thenhmalpiak dingin a ton te lai mi tazacuainak dironh dingin a hlankan in timhlamhnak a tuah ve hnga i, ka service pawl hi ai tet, a khahtuk cang caah vun dorh awk an tha ti lo, tiin solhphelhnak lam a kawl te lai, tiah Singer nih a chim.

Asinain, cu bantuk solhphelhnak a chimmi bia cohlan awk a si le si lo cu biaceihzung kut ah a ummi a si. Microsoft tazacuai a tonmi kongah khan cun, midang zuamcawh awk tha lo in ai khamkahmi he pehtlaiin taza an cuai i, an tazacuai chung hi kum tampi a rau. Asinain, a donghnak ah cun hmulngei ngaiin an vun remhpiak khawh than ko. Microsoft taza an cuaimi kongah expert pawl an i lunghmuih ngai i, cu ti taza an cuai khawh thawngin cun Google zong thanchonak lam a panh phahnak hi a si. Cu ve bantukin cun, Facebook taza an cuaimi nih hin faakpiin thathmennak a chuahpimi a um ial te lai i, a hmangtu pawl nih marketplace i an hmuh te dingmi thilthar tampi a chuak te kho mi a si. Credit: Chelsea Bawi