Dear Dr. Suikhar, Col. Solomon le an hawi vialte,

Dear Dr. Suikhar, Col. Solomon le an hawi vialte,
==================
An Hrut Hnga maw? Thluak an ngei hnga lo maw? Thih an ngamh tak hnga maw? tiin duh paoh biachim a um tawn.
Nihin zing cu Israel tuanbia le Ral an dohnak kong Bible ah fak ngai in ka rel i khua ka tuaktan ve. Israel miphun cu Pathian zumtu an si- Pathian nih a umpi hna. Sal an sinak Egypt Ram in an chuah le cangka Ral an tu (do) i an tlangbawi (pastors)hna le an hruaitu (leaders)vialte nih an Miphun an veng.

Dr. Sui Khar, Col. Solomon le an hawi le dang vialte hna nan kong ruah ah upat le ttihzah lo awk nan ttha lo.
Hringtu Nulepa thiruak hmanh a hum kho lo dirhmun phan in Ram caah nan i pek ko cu “an hrut ko hnga maw ti a fawi te.” Nan miphun hawi nan kan dawt caah a si mu! Ramdang phanh i Motor ttha le inn ttha tang um nan theih tuk ve. Nan fanu/fapa mifim le cathiam si hna seh ti nan ruah tuk ve. Chungkhar nuam tein hmunkhat um le rawl ei tti nan duh tuk ve. Aircon le khuadai tangah um nan theih tuk ve. Puanlum le meilum tangah nuamte um nan duh tuk ve.

Kan Miphun le Ram nan dawt tuk caah kum 30 leng nunnak thap in Ram tangah Rawlttam le Tihal tuar in khua nan sa. Ram le Miphun dawt cu thingkung ramhnah va dawt khi a si lo. Misingpi le khual va dawt khi a si lo. Nan miphun hawi Kanmah nan kan dawt hi a rak si. Ramleng (US, Canada, Europe le Australia etc) ah CNF/A chungtel tampi kan phan hna. Nihin tiang CNF/A a dir pitu le bawmtu tampi um a si. Ramleng kan phanh hnu ahcun kan khuasak a nuam- din le ei a thaw, Motor ttha le inn lo ttha kan ngei. Kan tha a dam i chungkhar he kan um hna. Kan i nuam deuh tuk cang tinak a si.

Nain, nannih cu Ramchung ah Tio tiva kap le Tipi va kap hrawngah ihnak le einak reptak hmanh ngei loin fikfa le cangvat lakah nihin tiang Ram le Miphun ca i rian nan ttuan ciahmah ko mi cu upat le ttihzah lo awk nan ttha lo. Ramttha kan phanh khawhnak hnga UN ah innkaa nan kan on piak. Kawl Ralkap nih an kan tuknak le velhnak – hremnak le thahnak vialte vawlei cung miphun sinah nan kan chim piak. Nihin tiangin Pathian pekmi kan Chinram kawl Ralkap kut in luatnak le tthanchonak caah nunnak thap in rian nan kan ttuan piak. Nanmah pumpak le chungkhar zawn lawng aa ruatmi rak si ulaw Vawlei cung Ram ttha bik ah tuanpi khan nan rak kal diam cang hnga i nuam tukin chungkhar he khua nan sa cio ko hnga mu.

CNF/A kan Nulepa, Nau le vialte upatnak kan pek hna. Ahleice in RAM chungah harnak vialte tuar in chunglei le Lenglei RAL a do cuahmah mi CNF/A chungtel vialte upatnak kan pek hna. Nan rianttuannak le nan herhnak ah Pathian sin thlacamnak he an bawmtu hna si ka zuam lai. Ka fimnak, thiamnak le chawva tiangin bawmtu ttha si ka zuam zungzal lai.

Sawmnak: Pathian nung zumtu kan si caah Pathian tthawnnak le Amah rian ttuannak bochan buin Thlacamnak he MIPHUN le RAM caah nan sampar tiang le nan nunnak a dih tiang in dir zungzal ko ulaw. SALM 33:12, An Pathian ah Bawipa a simi miphun cu lunglawmmi miphun an si, Bawipa nih a mi ah a thimmi hna cu lunglawmmi an si. Teinak cu Bawipa ta asi. Amen! Bawipa nih thluachuah in pe ko hna seh.
Mang Bik Cung
Australia