DDOS Nih A Phuan Mi Khuaruahhar Kawl Ralkap Firtleinak

Distributed Denial of Secrets Nih A Chungril A Hlai Mi Khuaruahhar Kawl Ralkap Firtleinak
========================
DICA na hngal bal maw? Kawlram ah phaisa hramphumnak le Company pawl riantawlrelnak phu (Directorate of Investment and Company Administration) a si. Naihrawng internet an thah kar ah DICA chungril vialte a zut dih i, hackers nih an thlok dih cang. Hi phu chung ahhin Kawlram ah phaisa tonghthamnak chungril dikthliar a um dih. Cucu nihin ah a puanghlang ciammam i ralkap nih an ngeih mi asiloah an control mi le an pawlkom a simi Company pawl i an FILE vialte a puanghlang dih cang ai. Ralkap bawizik pawl le bawipawl, an sahlawh le miṭhi lalang pawl an hakauhnak, firtlei le ziknawh in an eihmuarnak vialte a hmulno zong phawi viar khawh an si cang. A tanglei link ahhin cu vialte file cu a um i, File Size 330 GB rori bak a si. Na Computer nih file size 330 GB a tlum ahcun rak download ve te. Ramchung um na si ahcun VPN hmang in download na hau lai.

Ralkap chawlehnak MEHL (Myanma Economic Holdings Limited) timi hi kawl ralkap nih an firtleinak kengruangruh a si. Atu ah a rak chuak mi chungril, catlap le file zapi hna nih hin MEHL ah ralkap le an miṭhi lalang pawl nih shares an cawk mi dihlak man le MEHL mipi i a manpi karlak ah i dannak siseh, rank niam ralkap pawl sin ah an bawi le nih an thisen an dawp hna ning zong ai tel dih.

Kawl ralkap chung ahhin ralkap sawhsawh pawl ca ah tiah MEHL nih a miak tlawmte (siloah) a miak umlo tluk in shares a hal hna. An lahkhah tlawmte chung khin a miak hmanh maw miak lo hmanh maw tiah shares cu an cawk ve ko nain ralbawi firtlei pawl nih cun ralkap sawhsawh tete an lahkhah tlawmte chung khin hramhram in an hal hna. Hihi a tulio ah kawl mipi zong siseh, ralkap sawhsawh zong nih MEHL sinah biahalnak an tuah awk te khi a si cang. Ralkap sawhsawh tete, an lahkhah hmanh tlawmte chung khin an duh i tel loin MEHL ṭhannak le ralbawi zik pawl miakmai nak ah phaisa an chuh hna tikhawh a si.

Ralkap chawlehnak MEHL pawl hi 1000 MMK in ret an khiah. Mipi ngeih mi thilri hna an firtlei hlei ah rampi ah rank sang an co hnu in MEHL chawlehnak cu a ngan chin lengmang ko nain Shares pakhat man cu MEHL an rak thawk ka 1990 lio i a man ning peng an siter. A miakmai i ṭhenphawtnak zong ah shares a ngeitu zatuak (%) in an tuakpiak hna i, a miak zat in tuak a si fawn lo. Hiti an tuah ruang ahhin a miak tampi a hmu cang mi Company pi pakhat nih a ngeih cang phaisa, hrambunhnak le market price kha timh ciammam tein thuh kanh ah a cang. Cu ca ah shares a miak an ṭhen tikah shares cawtu hna ca ah tlawmte lawng an tinco nak cu a si. Ralkap nih an ngeih mi MEHL chawlehnak chung ahhin a thlithup tuk in miakmai nak le cawlcanghnak a um ca ah cazin zong um huaha lo, ruahdamh khawh zong a si lomi khur thukpi bang a mui dep.

1990 kum April 27 ahkhan MEHL ah phaisa hram an bunh mi shares man hi 10 billion MMK a si. 2013/14 ahkhan kumchuak meeting an tuah lio ah 150 billion MMK ah a ṭhang. 2016 kum ahkhan Shares cawtu hna phaisa kha a ṭhang i 300 billion MMK ($ 228 million) ah ai cang. 2016 ahkhan Shares ca ah phaisa hram an phum mi man hi Kirin Holdings he rian a ṭuan mi Myanmar Beer (MEHL tang um) shares hi MEHL shares zatceo a rak si. Hi lio ah MEHL nih a ngeih Myanmar Beer shares man hi $460 million hrawnghrang a rak si. Hi chung ah Kirin nih shares 55% ai ngeih i, a man cun $560 million man a si. Myanmar Beer kan ti lengmang mi hi ralkap chawlehnak MEHL nih a ṭengnge tam lengluang lakah pakhat te khi a sk. Cu ca ah MEHL i a man taktak dikthliar hi a cunglei ah langhter mi nakin a tam deuh lai tiah nan van ruahdamh khawh kolai.

A tu ah a rak puanghlang mi ca hna hi ralkap chung ah i ruan lonak fak tuk in a um mi kha a langhter. General Min Aung Hlaing bantuk hruaitu pawl hna hi an hruaimi minung pawl hna kha sifah khur ah an thlak cuahmah hna. MEHL cu ralkap le an chungkhar pawl khuasak tintuk nak ah dirh mi a si ti cu an bia meilah a si nain, ralkap sawhsawh le rank niam pawl nih MEHL ah sahres an ngeih taktak mi cu MEHL i 1.3% lawng a si tiah 2010-11 phaisa kum MEHL kumtin phaisa lutchuak report in chim khawh a si. Cu ca ah MEHL timi hi ralkap pawl a cawmtu hna a si lo timi a fiang. Sahrang bang mithah lainawnnak a tuahtu ralbawi zik hna cawmnak ca ah firkhut chawlehnak a si.

MEHL hruaitu upa hna nih an ralkao rank niam tete an hlenthawi hna le phaisa an thawhter hna kha commander of a military region (taing-hmu) pawl nih an hngalh ko nain anmah lila kha ralkap sinah phaisa thawh a hne tu an si tawn. 2019 February 6 ahkhan MEHL nih emergency meeting an auh hna A tanglei an meeting file khi relkhawh a si). Meeting donghnak biachim ah deputy general San Oo nih “Ralkap pawl tam-u nih MEHL ah phaisa thawh ding sawmrel an har ngai cang. A ruang cu hi an thawh mi hi kan sung tiah an i ruah. Nanmah pawl nih nan chim hna uh ti kan duh mi hna cu, hi phaisa hi kum thum chung ah kan in pek ṭhan hna lai ti hi a si. Ralkap pawl nih cucu an fian ahcun an thawh kolai. Ralkap pawk nih an cunglei bawi pawl eihmuar nak ruang ah an zum ti hna lo i an thawh lonak a si. Hihi nan hngah a hau mi a si. Nan tuah a herh. Kei zong nih thlachiar meeting ah commander pawl nawl ka pek cang hna. Ralkap nih shares an cawk khawh nakhnga a rannak in lam kawl uh” tiah a chim.

MEHL (ဦးပိုင်) hi Kawl ralkap a firkhut tertu chawlehnak a si. Ralbawi pawl nih an mah miakmainak le, nawlngeihnak, duhfah hakkauhnak hnu an zulh ruang ah Firtleinak cu an laifang ah a um. Cu nih cun ralkap sawhsawh pawl kha a hrawhhral hna. Hihi an ṭhinh hrimhrim a herh mi a hung si. Kawl ramkomh ah Federal Democracy le a fekfuan mi remdaihnak a un khawh nakhnga ralkap nih an chawlehnak hi an mak a hau cang. MEHL nih meeting an tuahnak meeting record pawl cu hika hin download khawh a si. Credit: Salai Tial Hram Ling