Dawtmi Myanmar mi dihlak

Dawtmi Myanmar mi dihlak
================
Kan ram thawngpang cu a daih lei cu panh rih hlei lo. Kei cu FB zong ka kau ngam ti lo, thawngpang zong ka ngai ngam ti lo. Nain ka sia le herh ve i ka kau thio i ka zoh thio. A nunnak a liam mi zong an tam Chin len ko e. An luan bak ko cang.

Ram pakhat nih Ralkap le palik a ngei mi hna cu ram le miphun kilveng tu an si tawn. Cu ram le mipi ralven nak ding ah cun mipi le ramnih meithal tha tha, vanlawng, tilawng, helekopter cawkpiak hna hlei ah lahkhah le pensen pek hna. Kan nih kan ram Ralkap le palik tu cu tu tiang ah cun ramhrawk tu le mipi nunnak la tu ah an i cang. Ralkap ti ti lo in mipikap ti ding an si cang.

Tang 3 ka rak cawn lio ah Boyoke Aung San nih Ralkap pawl ralram an kal lai i bia a cah tawn mi hna ka rak ciah mi ka thei tuk. Mah တပ်ထွက် မိန်ခွန် cu « Ralkap hna ralram nan kal lai i nan ti a hal lai, nan rawl a ttam lai, nan si a fak lai , harnak phunphun nan tawng lai. Burma ral le a nai bik mi ral kha kawl hna uh law doh hna uh» a rak ti hna i mah ti cun Kolone uk nak in an rak luat. A tu hi ka Lung chung ah a chuak mi cu Aung San Ralkap le a tu Ralkap cu LU le KE bak in an i dang ko. Mah ram le mipi ralven can ah mah kapthat tu an si leh lam. Ram le mipi nih a cawm cia a ken cia mi hna nih mah le mipi tu nunnak dih tiang in kah le har nak pek hi cu Vawlei cung ralkap ah an um bal lo. Tapung long ah si. A poi tuk an luan khawh ning hi meithal i put riangmang in zei hmanh a put lo mi mah fa le nau le tthi a kap ngam ko mi hi cu minung hrim an si lo. An i thawh lai ah zei dik an ei ta mi le an din ta mi um ko lai ti hna ka ruat. Hi tluk in a sual lo mi kan mifim, kan mithiam hmai lei hrinhchan awk a tlak ding mi an nunnak an lak hna, an Hliamh hna hin cun hriamnam i i put ve cang ko uh ka ti. Zei caan hi dah a va tlai rih lai mu.

Tulio fanu le fapa, nu le pa, nupi le va an nunnak a sung mi vialte chungkhar dih lak nan mah tluk tein kan intuar pi bak ve hna. Pathian nih nan sunghnak a lakka si ter bak lai lo. Kan i ruahchan mi a tlin bak in Pathian nih nan mah kha a hlei in thluachuah in pe ko hna seh. Cun CDM a lutmi zong ther le phang in khua nan saa lai dah Bawipa nih himnak in pe ve ko hna seh law.

Cun tu lio cu a ho hmanh i thangchiat le cawngawih lo a tha bik. Kan doh mi cu Ralkap uk nak long a si awk a si e. Myanmar ah miphun Pa 2 long kan um: Ralkap uknak a duh mi le Ralkap duhnak a duh mi kan si. Kan mah le kan thil ti khawh nak cio tein kan ralpa Sentan uk nak in kan luat nak hnga tu ding ah ttang tti deuh hna uh sih mu. Mah Vial hin ka siaherh mi le kan ngeihchia pi nak hna ka langhter ve e. Ka ca na rel caah kalawm tuk mu. Bawipa nih himnak in pe ko seh. Credit: Elizabeth Ly Ly