Daw Suu le Min Aung Hlaing nih a tukum ah papek in an tuahdingmi thawng an hun kan thanhmi

2021 Kum Kawlram Politics Ka CuanhNing
============
Tu zing ka thawh leh cangka in Daw Aung San Suu Kyi le SG Min Aung Hlaing nih kumthar biacah an chimmi ka ngai hmasa, Hi hna 2 an bia ka ngai hmasa nak aruang cu; atukum 2021 ah hin zei hi dah abiapibik ah an tuah lai timi theih ka duh caah asi, Daw Suu nih a tukum cu a bikin remdainak hi papek in kan tuah/ser lai tiah achim, SG Min Aung Hlaing zong nih remdainak ser hi a tukum kan ihmaithlakbik mi cu asi tiah ahun chim ve,,Ramhruaitu hna nih kumthar biacah ah an chim tonmi khi kumkhat chungah abiapibik mi rian an ttuandingmi kha rammi hna sinah thawng an hun kan thanhmi asi caah, Atutan Daw Suu le Min Aung Hlaing nih a tukum ah papek in an tuahdingmi thawng an hun kan thanhmi hi thawng ttha pakhat asi, Sihmanswhlaw an chimning tein an tuah taktak lai maw? ti bel te cu; acaan nih bia achim teh ko lai.

Remdainak an sernak hi kum asau cang nain, hmai akal khawh lo i, hnu lei zong aathawn loh, Datsi rawn lomi Car/ Mawtaw bantukin adirnak ah adir peng rih, Cucu atulio remdainak adirhmun cu asi, Remdainak hmai akal khawhlonak hi aruang tampi aum l, ‘cu chungah aruang nganbik asimi cu; hriamtlai cheukhat he kahngolnak atuah khawh lomi hi asi, Khelkhat in kan chim ahcun atutiang remdainak hmai akal khawhlonak aruang bik hi hriamtlai cheukhat he kah ngolnak atuah khawh lo caah asi, Cucaah atukum Cozah nih remdainak akalpi tikah hin kahngolnak atuah lomi hna he ichawnhbiak khawh hi abiapi bik mi cu asi.

Zei asi zongah 2021 kum hi remdainak hmai akal taktak lai maw? timi hi Nortthern allliance hna abikin FPNCC he zeitluk indah an ichawnh khawh timi nihhin bia tampi achim teh lai, Nortthern alliance pawl le Cozah an ichawnhmi zohtikah kum dongh lei khan’ duhsa tein hma ahun kal cuahmah, Hi tihin hma ahun kalnak aruang hi Japan palai asimi Sasakawa hmalak nak hi aruang ngan ngai asi ve tih ning law ka palh lai lo dah, Cozah le Northern alliance ichawnh khawhnak ding ahhin China nih remdainak palai akal pah ton nain, Kawl ralkap nih Northern alliance pawl hi an hnulei in na bomh hna tiah a zumh lo caah,ei chuak lo bar chuak lo ah ai cang ton, Khatleiah India Cozah zong hi palai ah kal ve sehlaw Northern alliance pawl nih an zumh ve lailoh, Aruangcu; India ralkap le Kawl ralkap hi hlanlio tein nihin nitiang aibomh zungzalmi an si caah Northern hriamtlaibu nih hin Kawl ralkap leiin na ttang tiin an zumh ve lai lo i, eibar ngaingai anchuak ve lailoh, ka chimduhmi cu; Japan Cozah hi Kawl Cozah zongah attang lo i, Ramtang hriamtlaibu zongah attang loh, Hiruang ahhin Japan palai Sasakawa hi Cozah le ramtang hriamtlaibu kar ah hlawh atlingmi palai ttha ahun sikhawhnak hi asi,

Acunglei ka chimbang khan, Kumhlun adih lai hrawng ah abikin Election dih hnu khan politics boruak ttha ahun chuahnak tete aum len, Cu hna chungin alangsar deuhmi hna cu; AA le Kawl ralkap an ikap ti loh, Min Aung Hlaing kha UWSA hmunhma ah avakal i anhhruai tu hna he bia ttha tein an iruah khawh, UWSA hi FPNCC ah haotu an si caah, Northern alliance pawl he ichawnh khawhnak ahcun an biapi tuk, Ka chin ramah Min Aung Hlaing avakal i Kachin baptist convention upa hna sinah Kachin ralzam hi kir cang hna seh, KIO/A an hmunpi hi kakap lailoh ava ti hna, Arakan army AA nih NLD palai antlaihmi hna le kawlralkap an tlaihmi 3 hna cu tuzing kumthar ni bakah ahun thlah hna, Adang chimding zong an um len rih, Ka langhter duhmi cu; Kawlram politics asosang ngaimi kha duhsa in ahun daipah thluahmah, Atu ning tein thil ahun kal ahcun 2021 kum hi remdainak innka kau deuhin aa awn hrim hrim teh lai ti hi ka zumhning asi,

Khatlei ah politics kan timi hi kapkhat lawngin zoh awk attha ton lo i, aphenah zeidah aum timi hi zohchih khawh hi abiapi ngai ton, 2020 thimnak adih hnu khan Min Aung Hlaing hi ahun nem deuh ngai, Daw Suu zong tlangcungmi cungah apolicies aa hun idannak tete aum ve, Atubantukin an thinlung le an ruahnak aa hun idangnak hi anmah pahnih kar izuamcawhnak ruangah ahung chuakmi zong asi khawhmen tiah aruat mi zong an um, thahchunnak ah politics ah credit lak an duh veve caah aho nihdah remdainak aser kho deuh tiin an izuamnak ruangah atubantuk in politics boruak ahun dai deuhnak hi asi khawh men ko. Zeipaoh va si sehlaw anmah pahnih politics credit an icuh ruangah Tlangcungmi kan lampi akau deuh asi ahcun kan ilawm chin tuding khi asi.

Snow/hawhra tam deuh atlak kum ahcun kum avui deuh ve an tibang, Kum hlun dongh lai ah Kawlram politics boruak ttha ahun chuakmi hna nihhin aluanciami kum nak cun remdainak lampi hi akau ter deuh teh lai ti hi ka zumhning asi, Atawinakin chim ahcun kum hlun nak in atukum hi kan kum avui deuh teh lai. Credit: Van Neih Thang