Dam in Mang Ttha law Ka Far!

Dam in Mang Ttha law Ka Far!
===============
Ka dawt tuk mi ka far (Nunu Ciacia), Maw dar bang na kuai fah hi, tuar a har tuk ko e! Nitlak caan cut hlan i NINU a tlak ko cu ka far, khua muih a zat hlan i khua muih ko cu e ka far, Zei tin hen kan tuar khawh lai? Kan lung a fak ko. kan celh hrim lo, tuar a har ko.. kan in siang hrimhrim lo e, ka far dawt te.

Kan tta far in…miphundang hna hmun le ram a si mi America ram ah… na dam nak ding duh tuk ruangah, khua kan khang, hmun dang le khuadang kan panh, Zei hlei lo e ka far, Sahrang nih seh bang… nangmah palh nak um lo, na zawtfah nak ruangah..na ai na hram… na ngan fah na celh lo tuk tawn kha, maw ka thin. kan zoh kho tawn lo e, na tuar a har hring hran e Nunu, Na dam ka duh tuk ah biatak te in khua ka ruat …zei dah ka duh bik hnga a tu caan ah hin ka ti i …a ho nih duh thim nak pek mi bang, duh thim ding ka tuak.. ka caah duh thim ding a rak fawi dah, Kaa thim hnga ding mi cu kan chim cang lai mu ka far, Vawleicung chawva vial te ngeih nak in dakaw nangmah na dam nak ding laksawng tu ka thim hnga ka ti cu ka far, Na tta nih hin kan dawt tuk hi na ka theih piak ti hnga maw? Mi dang caah san ka tlaih khawh lo zong ah ka chung khar hna nan caah cun nan ngeih chiat ter tu si cu ka duh lo dakaw,
Na liam sia a herh hringhran ko mu, a herh tuk ka theih e ka far… na chim leng mang, na lung duh bia, Zei dang si lo in.. Pathian thluachuah sang bik na hmuh i na co ve mi le naa uan thlar tuk mi na fanu fangkhat, ka tu nu Angela Dawt Tha Hlei par caah asi. “dam tthan ta ka duh, nun rih ka duh ko e..Maw Pathian…ka zangfah rih ko sawh, KA SIA A HERH MI A UM… tiah na chim tawn, naa ceih leng mang.

“Ka fanu ngeih chunh, Angela Par… kum 8 lawng a si rih.. a no tuk rih.. ka sia herh ko e na ti tawn kha”, Na nganfah celh lo in Sizung na kal lai poah ah, na fanu hmuh tak lo le chawnh tak lo in na kal sia a herh tawn kha, maw ka far…

Dam duh tuk ah na panh tawn mi… sizung chung in… na ai na hram bu ah… ka fanu ka zoh ter ta uh… na kan ti tawn i.. na fanu hmuh ta lo in phone chiah zong na duh tawn lo kha maw ka far.. Nangmah ban tuk in fa le a daw i a zawnruat mi Nucaan na si nak hi na fanu nih a cut zat tik le a theih thiam tik ah aa lung hmuih tuk tawn te lai dakaw… Angela a lung fim in na dawt mi na va nih a chimh te lai.. A pi le pu hna nih kan rak chimh tawn te lai… Na fanu nih na dawt nak le na siaherh nak hi kan rak theih ter hrimhrim lai mu ka far..

Na fanu nih sizung ah rak in zoh a duh tuk tawn ko… vawleicung pi nih buai pi mi zawt nak ttha lo ruang ah an zoh kho tawn lo e… Phone tu in nan i chawn tawn i… Zei dang chim awk theih tawn lo in, na dawt na hrin hniang nih,“ Nunu, zei tik dah inn lei na ttin lai” an ti tawn i… Ka fa ka rak ttin deng na ti tawn kha… Maw ka thin, Dam nak he a sin na kir tthan ding kha dakaw a duh mi le a rak tuak khawh mi cu a si cu… Dam nak he si lo in Thih ttian in maw na tthen kun na hrin hniang te cu… Maw ka thin..

Ka far, a dongh nak ni ahcun… Naa uan tuk ve mi na hrin hniang nih a siaherh bia an chimh ve dakaw… Promise dakaw an pek ve cu… “ Nunu, kan dawt tuk… na ka chimh mi bia ka rak ngai lai.. na siaherh hlah… I LOVE YOU an ti i an hnamh kha ka far”… I lung hmuih ko mu.

Aizelaw duhtlin lo nak vawlei.. ka far mi hmurka ttha te aw.. midang zawn a ruat tuk mi te.. dawtu tam tuk na ngei.. Na dawt mi na pasal le na hrin hniang he dawtnak thluachuah nan rel tti nak nan Run Inn te in dakaw na kan dinh tak cu…Na thawngpang a thei mi na hawikom le na chungkhar hna nih nan run inn nih a tlumh lo tiang in dakaw an rak in ttah, dam te in tiah an rak in thlah i.. na caah thla an rak cam cu.

Ka far, a tta le zawn a kan ruat tuk tu.. Na nun caan tawi ko hmanh seh.. Chungkhar unau le cingla rualchan caah na kan dawt nak le na kan zawn ruah nak na nunzia dawh vial te hi kan chan tlung tiang in kan rak chim lai.. kan rak ceih len tawn lai e.

Maw ka thin… A tu zan cu.. na ka kal tak ka lung len le ka lilen ka celh lo ah na kong ka ruat.. Kan sem ka in kan i dawt ning vial te ka tuak tthan (I celebrate my precious times with you). Ka celh lo ah ca in ka ttial.. Ka ttial ding a tam tuk.. Rel cawk a si lai lo.. I love you so much ka far…I care so much about you my Beloved SISTER…. Na lung kan tlinh lo mi um ai kun.. ka ngai thiam ve mu.

Nang cu kan biak i kan zumh mi kan Pathian a biathiang a duh tuk mi na si kha ka far… Na zumh i na biak mi, vawlei i na taksa a thih tiang in naa tleih i na zumh mi na Pathian sin tu ah vaa din ko kun law. Na nganfah vial te an lak piak i a mah sin ah hnangam daih nak he um cang seh tiah na nun nak an la i an zawnruat tu na Pathian sin tu ah nuam te le lawm te in va um cang kun mu… Nangmah tu nih rak kan dong te mu ka dawt tuk mi ka FAR..
An daw tu Na Tta. Za Ceu Lian