Dalan Ngan Taktak Pakhat An Thah!

Tih Nung Dalan Pa Cu PSDA (MUSE) Nih An Thah!
===========
Shan ramkulh Lashoe khuapi ah tih nung dalan pa pakhat cu PSDA (MUSE) nih kan thah khawh cang tiah Febuary 18 ah mipi theih dingin cathanh an chuah.

PSDA (MUSE) nih Lashoe khuapi, Sanchaung sang Hmaing Yaw lam inn numbat 20/237 in a zaammi pa tih nung dalan U San Htu cu Muse khuapi ah a rak phan caah kan thah tiah cathanh an chuah hi a si.

Ralhrang Kuttang Physawthi Phu Nih Inn 400 Leng An Khang! Pale Ah Pyusawthii Hna Nih Mei An Khangh Caah Minung Umnak Inn 400 Leng A Kaang! Sagaing ramthen Pale peng Chaung U khua cu SAC ralhrang ralkap rual nih minung umnak inn 400 leng cu Febuary 18 zinglei sml 9:00 hrawngah mei in an khangh. Khuami hna cu himnak hmunah an zaam lioah SAC ralhrang ralkap rual le Buesawtyi 40 tluk nih luhhnawh in mei an khangh tiah pawngkam ummi nih The 74 Media ah a chim.

Khua chung inn cu Htan Kung a hnah in cihmi deuh a si pinah inn pakhat le pakhat an i naih tuk fawn ruangah a dihlak in a kaang dih hi a si. Atu cu SAC ralhrang ralkap lawng siloin Buesawtyi hna zong an i tel ruangah cuka hmunhma thil sining kong an theih khunnak a si. Minung um loin ralzaam lio ah atu bantukin mei in an khangh hramhrammi a si tiah amah nih a chim.

SAC ralhrang cu Chaung U khua inn 400 lengkai cu minute 20 chung mei an khangh hnuah Yi Phyu Kung an umnak sakhan ah an kir than tiah amah nih a chim. Sagaing ramthen Pale peng Chaung U khua cu inn 400 lengkai an um i, minung 2000 lengkai umnak khua a si.

SAC ralhrang nih Sagaing ramthen ah a thazaang a chap chin lengmang i, minung umnak inn tibantuk cu mei an khangh cuahmah. Nizan zongah khan Yinmabin peng Ung Tung Pin khua le Gyi Sa Ciah khua karlak ah Patein-Monywa lampi hnulei ummi inn pahnih cu SAC ralhrang ralkap nih mei an khangh.

Hriamnam Aa Thlau Tuk Ruangah Khin U Khahdohnak Ah PDF 12 Nunnak Liam! Sagaing ramthen Khin U peng chung Kan Gyi Kung khua pawngah SAC ralhrang ralkap le mipi vengtu karlak ah kahdohnak a chuak i, hriamnam aa thlau tuk ruangah mipi vengtu leikap ah (12) nunnak a liam tiah khuami nih an chim. Febuary 17 chun hnu sml 2:00 hrawngah Khin U-Yi U kalnak motor lampi, Myo Thit khua le Kan Gyi Kung khua karlak ah leikuang chungah SAC ralhrang ralkap le mipi vengtu karlak ah kahdohnak a chuak.

Kahdohnak a chuahnak hmun hi leikuang chung a si tikah i thuhnak ding hmunhna zong a um bak lo pinah mipi vengtu lei nih hriamhme tete in an kahdoh tikah hriamnam aa thlau tuk ruangah atu bantukin an nunnak a liam hi a si. Khin U peng chungah mipi umnak khua chungah luhhnawh hratin hramhram in thil laak a hmangtu le thahnawnnak a tuahtu SAC ralhrang ralkap 200 tluk phu cu mipi vengtu hna nih an kahdoh hi a si.

Kahdohnak ahcun thir in tuahmi meithal thawng hrolh 25 le hriamnam dangdang tampi kan chuh khawh tiah SAC ralhrang ralkap nih hrokhrol in thawng an chuah. Febuary 21 zongah khan Yi U peng chungah SAC ralhrang ralkap nih kharkhumh in kahdoh a tongtu mipi vengtu hna cu hriamnam thazaang aa thlau tuk ruangah minung 7 nunnak a liam.

SAC ralhrang ralkap nih a thazaang hleihluat tukin kahdohnak an tuah pinah kahdohnak leikap an kalnak lamtluan ah a ummi mipi umnak inn an hrawh, thilri an laakpiak, hramhram in mi an thah ruangah mipi nih an ngeihmi hriamnam i tlaih hratin an kahdohnak a si.

Mu Be peng chung zongah kahdohnak a fak ngaingai i, SAC ralhrang ralkap nih vanlawng hmangin bomb a thlak caah mipi vengtu leikap ah harsa taktakin kahdohnak an tuah. Cu caah hriamnam le kuanfang thazaang herhmi hi mipi nih rianrang taktakin bawmchannak pe dingin KNDF nih nawlnak cathanh zong an chuah cang.

Pale Ah SAC Ralhrang Ralkap Rual Cu PDF Fonhmi Phu Nih An Kah Caah Ralhrang (15) Tluk An Thi! Pale khuapi in a chuakmi SAC ralhrang ralkap cu Pukpar khua le Tamarpin khua karlak ah Febuary 17 chun sml 1:00 hrawngah Saya San-PDF fonhmi phu nih an kah hna caah SAC ralhrang ralkap (15) tluk an thi tiah theih a si. Ralhrang ralkap (60) hrawng umnak hmun cu kan va kahdoh hna tiah Saya San-PDF phu ah tuanvo ngeitu pakhat nih The 74 Media ah a chim.

Panga lawng an um tiah kan kal hnawh hna nain ruahlo piin (60) lengkai kan hmuh hna tikah hnulei kir loin kutin chehmi bomb in kan puah hnawh hna tikah SAC ralhrang ralkap rual cu a khenh hna tiah amah nih a chim. Cu SAC ralhrang ralkap rual cu PDF fonhmi phu nih nihnih chung ngiathlainak an tuah hnuah an va kahdoh tiah theih a si.

Kahdohnak caan chungah SAC ralhrang nih Puk Par khua in kum 20 tluk simi Mg Hein Zaw Lat cu a lu ah meithal in an kah that tiah amah nih a chim. Motorcycle a laak nakah SAC ralhrang ralkap he an i tong sual i, a lu ah an kah that, a thluak zong a chuak dih tiah amah nih a chim.

SAC ralhrang ralkap le Saya San-PDF fonhmi phu karlak ah Sml 3:00 chung fak taktakin an i kap hna hnuah Saya San-PDF fonhmi phu leikap ah hliam tuarmi umloin an i zukphiak kho tiah theih a si. Sagaing ramthen Pale peng chung Yi Phyu Kung khua ah a ummi SAC ralhrang ralkap le Buesawtyi phu raltuk cawnnak sakhan zong Febuary 14 ah khan mipi vengtu PDF nih luhhnawh in an kah hna caah kahdohnak a fak ngai tiah theih a si.

Mu Mauh Ah SAC Ralhrang Le KIA An I Kap! Ralkap thazaang a chap chinnak Mu Mauh khuapi hrambunh SAC ralhrang ke ralkap ခမရ ၄၃၇ le KIA karlak ah chun sml 12:00 hrawngah Wah Wam khua pawngah an i kap tiah theih a si.

Ralhrang ralkap 100 tluk simi SAC ralhrang ralkap le KIA karlak ah kaphnih kahdohnak thawng kan thei tiah Wah Wam khua ah a ummi pakhat nih The 74 Media ah a chim. Hriamngan puah thawng cu kan thei lo, meithal le bomb puah thawng lawng a si. Sein Paung puah thawng zong theih a si i, zanlei sml 1:00 tiang an i kap tiah amah nih a chim.

Sml 1:00 chung an i kap hnuah atu ahcun hriamnam puah thawng a dai cang tiah amah nih a chim. Mu Mauh peng chungah kum 2021 Dec 15 zongah khan ခမရ ၄၃၇ sakhan pawngah SAC ralhrang ralkap motor bomb puah hnawh a tong.

Kachin ramkulh cheukhat peng chung ahcun SAC ralhrang ralkap le KIA karlak ah kahdohnak a fak ngaingai i, Ban Maw pengkomh Mu Mauh peng chung zongah zaan ah meithal puah thawng an theih pah lengmang.

Mube Kahdohnak Ah SAC Ralhrang Tamtuk An Thih Pinah Tank Pakhat A Rawk Tiah Cathanh An Chuah! Bube kahdohnak ah SAC ralhrang ralkap tamtuk an thih pinah tank pakhat a rawk dih tiah anmahlei mipi vengtu phu chungtel pakhat simi Demosu-PDF nih cathanh an chuah.

Shan le Kaya ramri Phe Khung peng chung Mube le Wa Yi Su Pa Laing khua karlak ah tank pahnih telh in thazaang tam taktakin kahdohnak tuahtu SAC ralhrang ralkap hna cu DMO-PDF, PK-PDF, MB-PDF, LK-PDF, KNDF, KGZ, KA telh in muchuahlei sangah a ummi phu fonhmi he an i kap.

Kahdohnak ahcun SAC ralhrang ralkap an sungh tuk ruangah zanlei sangah raltuknak vanlawng pahnih bakin vawi (nak tam bomb an kan puah hnawh tiah cathanh an chuahmi ahcun an langhter.

Cu kahdohnak ahcun mipi ralkap fonhmi phu leikap zongah nunnak a liammi an um i, kahdohnak caan chungah SAC ralhrang ralkap kahmi hriamngan puah nakin Wa Yi Su Pa Laing khuami inn cheukhat cu mei nih a kang pinah khuami minung (6) nak tlawm lo nih hliam an tuar tiah DMO-PDF nih an langhter. Nihnih chung kahdohnak ruangah pawngkam khuami mipi a thong in himnak hmunah an zaam tiah an langhter chih.

Patein-Monywa Lampi Ah SAC Ralhrang Ralkap Bomb Puah Hnawh An Ton Caah A Thimi An Tam Tuk Lai! Sagaing ramthen Yinmabin peng chung Patein-Monywa kalnak motor lampi cungah SAC ralhrang ralkap rual kalmi cu PDF fonhmi phu nih bomb an puah hnawh hna caah a thimi an tam tuk lai tiah Reginal Friend Frighter nih cathanh an chuah.

Febuary 17 chun hnu leiah Patein-Minywa lampi ah meithal puah pah in kahdohnak tuah dingah a kalmi SAC ralhrang ralkap rual cu Reginal Friend Frighter le an hawile phu nih bomb 7 hmangin an rak puah hnawh hna hi a si.

Patein-Monywa lampi, 28 uico zuatnak dum le Myauh Ya Ma hlei karlak ah meithal puah hratin motor lampi in a kalmi SAC ralhrang ke ralkap hna cu RFF phu nih rak bawh hratin bomb 7 bakin an rak puah hnawh hna. A thimi uico rual cu lamkam in an thiar hna, an hruai lenmi zong hmuh an si i, mipi vengtu leikap ah himdam in kan i zukphiak kho tiah Reginal Friend Frighter phu nih an chim.

Bomb puah hnawh an ton hnuin SAC ralhrang ralkap hna nih pawngkam ah a ummi khua chungah lut hratin ningcang loin thilsual an tuah i, Ung Tung Pin khua le Gyi Sa Ciah khua karlak ah a ummi minung umnak inn cheumhat cu mei an khanghpiak tiah theih a si. Credit: The Federal Times