Dalaan Tiin Purdah Mi 400 Renglo An Thah Hna

Dalaan tiin purhdah mi 400 renglo an thah hna tiah SAC phu nih thanh
============
2021 February 1 in September 27 tiang ah Dalaan tiin purhdah mi minung 406 an thah cang hna i minung 285 an hliamh hna, tiah SAC phu nih October 2 ah an thanh. “Dalaan tiin minung 406, Peng 105 chung palek sakhaan 116, Yekin 46, Zung 28, Inn 58 an rawk. Hihi Hriamtlai Phu nih an tuah mi a si,” tiah an thanh.

Peng 372 chung ah kutcheh bomb/kutser bomb kahdohnak voi 2,460 a um, Peng 134 chung ah Thalpak in kahnak voi 340, Peng 26 ah hriamngan kahnak voi 34 tibantuk a cang i hlei hrawh, inn khangh tibantuk a cang tiah an thanh, tiah VOA nih a tial.

KNU/KNLA le SAC ralkap ni khat ah voi 6 an i kap, SAC lei 23 thi, 30 hliamh. KNU/KNLA Brigade No.5 hmunhma ah KNLA le SAC ralkap cu September 30 lio ni khat ah voi 6 an i kap i SAC lei 24 an thi, Battalion Commander pakhat tel in minung 30 hrawng an i hliam, tiah KNLA nih an thanh.

PDF nih Putao check-gate an kah, Min Aung Hlaing a rat ahcun fak deuh in kan kah rih lai tiah thanh than. October 3 zinglei 1:00 AM hrawng ah Putao-PDF nih Putao check-gate cu hriamngan he hriamhme he an kah i Min Aung Hlaing a rat ahcun hi nak fak kahdohnak kan tuah rih lai tiah PDF nih a thanh than.

Putao check-gate kahnak ah SAC ralkap a thi mi le aa hliam mi zat a fiang rih lo. Min Aung Hlaing a rat taktak ahcun fak deuh in kahdohnak kan tuah rih lai, tiah PDF-Putao nih an thanh.

Yangon le Mandalay Ramthen ah SAC khuabawi 4 kahthah. Yangon Ramthen Kwanchankone Peng Tawku khuabawi U Soe Min Aung le a hnuzultu cu October 1 ah United Democratic Federation (UDF) nih meithal in an kahthah hna i zohfel ding ah a ra mi SAC ralkap motor 2 cu UDF nih bomb an rak puahhnawh hna.

Cun, Mandalay Ramthen Madara Peng, Sakapin khuabawi U Myint Oo le Kyauksayittaung khuabawi U San Hla zong September 30 lio ah an kahthah hna tiah Khit Thit Media nih a langhter.

PDF a luh ruang ah hringtu anu nih rocotu fapa sinak in hlawt mi Ko Shine Htet Zaw. Bago Ramthen, Pyay Peng, Sandawyat um mi Ko Shine Htet Zaw cu PDF-TC sin a luh ruang ah hringtu anu nih fapa sinak in hlawtnak ca SAC phu media sin ah a thanh.

“Zeizongte ka sung dih lai ti hi ka hngalhcia ko, ka nu. Ka ngaithiam hrimhrim hlah! Nain, rammi mizapi caah adik mi lam ka zawh caah kaa chir ve hrimhrim lo. Kaa thim mi lam hi a dongh tiang ka zulh lai,” tiah Ko Shine Htet Zaw nih a facebook cahmai ah a tial.

Hringtu anu nih rocotu fapa sinak in hlawtnak ca a tial mi ah, “Keimah Daw San Nu fapa Shine Htet Zaw cu ka chimhcawnpiak mi zuul loin a chuak i fapa rocotu sinak in ka hlawt. Hmailei ah a cang ding mi akong he pehtlai in zeihmanh tuanvo ka la lai lo,” tiah a thanh.

Ko Shine Htet Zaw cu PDF sin a luh hnu ah Bawmhnak Kawltu Phu ah rian a tuan i PDF a luhnak thla 5 a si cang, tiah Mizzima nih a tial. Credit: The Hakha Times