Cozah zung le bank riantuannak ai hel kho ti lo ahcun ralkap uknak aa cawl kho ti lai lo

Yangon lam zawh kan i thawh hlan ah ‘covid zawtnak kan ngah kho, thong kan tla kho, meithal in kah kan tong kho, kan thi kho’ timi kan thei cia dih ko. Nain, cu vialte nakin ralkap uknak a letza in tih a nung deuh, kan techin fapar ca tiang ah tih a nung ti kan theih caah hmurka raldoh kan i thawh cio hi a si. Rammi dihlak caah tih a nungmi kan ral kan tei khawhnak ding caah cun cozah zung riantuantu le bank riantuantu vialte zong nih nan kan telpi cio a hau. Caan zeimawzat chung cu rian kal rih loin um hram ko uh, ralkap dohnak hriamnam tha bik nanmah kut ah a um.

Cozah zung le bank riantuannak ai hel kho ti lo ahcun ralkap uknak aa cawl kho ti lai lo, a tlu colh lai. Kan lung ai rual i pumpak cio kan i tel ko ahcun Min Aung Hlaing tham cu kan tei colh ko lai, atu hmanh khi ‘kai chuah sual cikcek cang hi ta’ tiin ai ther len cang ko lai. Kei kai tel ve lo zong ah a poi lo, midang an um ko timi lungput ngei hlah u sih. Democray nunter than ding ah pumpak cio tuanvo kan ngei. Thaizing zong Lai mino tampi kan chuak than lai, tuni kha Hledan ah Laiholh tampi ka theih i kai lunghmuih tuk.

Min Aung Hlaing uknak kan duh lo tiah Yangon lam zawhnak ah nihnih ka kal ve cang, zahan nakin tuni let zakhat minung kan tam deuh. Hmunkip ah ralkap uknak a duh lomi lawngte hmuh khawh an si. Tuni lam zawhtu pawl an lung ai rual ning ka zoh hna i kan ram caah ruahchannak thar ka ngei than, mizapi thazaang in ralkap uknak kan tei khawh lai ka zumh. Credit: Salai Lungthli Tum