Cozah rian țuan hna nih kan har zong ah kan hmailei cuan in kan rian kal tak ko hna usih

Cozah rian țuan nih nan rian chuah tak uh ti chim khi a fawi tuk nain chungkhar a cawm mi hna caah cun an rian chuah tak hi a har tuk hringhran. Zeitik tiang dinh ding ai fiang lo mi rian a kal tak mi hna hi upat tlak hrimhrim an si. Ram caah an thisen a luang lo nain an lu an thap a si. Ramchung, ramleng um mi zong a tu na țuan mi rian kha kumkhat chung i din tiah in ti hna sehlaw kan dam ko ahcun a duh mi kan um lai lo.

Rian an kal tak ruang ah micheu cu harnak an tong kho. An ton ding mi harnak ah mipi nih kan dirpi hna i kan zuan hnawh colh hna a herh. Rian an kal tak ngamnak ding zong in mipi nan hnu ah kan um ko ti hi an i theih ding tiang in kan cawlcanghpi hna a herh. Mah thlahlawh te ei in a pum ai cawm i mah kutke te a ei mi nih bawmh herh dirhmun in dir khi zeitluk in a har lai ti kan theih piak hna a hau. Cu an i harh tuk mi an tuah khawhnak ding ahcun mipi nih nan hnu in kan in dirpi ko hna tiah CDM an tuah khawhnak ding caah tha kan pek hna a hau. Mipi pek mi thazaang lak in cozah rian țuan zong nih kan lu kan thap ngam a hau. Mipi nih cawm mi kan si i philh hlah usih. Ramthlennak caah herh bik mi kan si caah a kan cawmtu mipi hna lei ah kan dir hrimhrim a hau. Kan i harh tuk mi zong kan tuah ngam a hau.

Cozah rian țuan hna nih kan har zong ah kan hmailei cuan in kan rian kal tak ko hna usih. Kan dihlak kan țanrual cun kan tei hrimhrim ko lai. Hruaimi um loin hruaitu lawng an cawl kho lo. Uknak țha loin a kan hruaitu hna an cawl khawh lonak ding ahcun kan rian chia ta ko hna usih. Harnak tuar ți ta ko hna usih. Mipi thazaang i bochan in nung chung ko hna usih. Kan lu thap ko hna usih. Bochan mi kan si i philh hlah usih.

Mipi he fek tein i dirkamh hna usih. Mipi nih an lu hlinh in lam an zawh lio ah kan nih zung kai hna hlah usih. Kan si khawhnak cio in i bawm hna usih. Kan khap tawk cio in cawl hna usih. Kan pawng ah zung a kai rih mi hna i din rih ko uh. Nan hnu ah mipi nih kan in dirpi ko hna tiah chim cio hna usih. Credit; Mercy Meng