Covid-19 zawtnak USA ah a karh ngai tiin theih asi. Laimi chung zongah a vun karh than i kan kiangkam ah a zawmi zong an vun karh

Atulio hi Covid-19 zawtnak USA ah a karh ngai tiin theih asi. Laimi chung zongah a vun karh than i kan kiangkam ah a zawmi zong an vun karh tiin theih asi ve . Nai zongah DFW um Laimi chungin Covid-19 zawtnak ruangah pakhat nih a kan thih tak cang. Cucaah iralrin taktak kan hau. A herh tuk lo ahcun i lengkai lo hi aho ca paoh ah a thahnem kho.
Aho pawl dah Covid-19 zawtnak a chek awk kan si? Covid-19 zawtnak phun pakhat khat kan ngeih ahcun ichek ding kan si hna. Mah zawtnak phun pawl cu khuh khuh, thawtnak le rim theih lo, hromfak, chungtlik , thawchuah harh, taklinh 100.00 dikkari ( degrees fahreneit), kihnak (khuasik), khuasik ther than lengmang, taksa fak le lufak hi an si.Atu tialmi zawtnak pakhat khat kan cungah a langh ahcun pelh lo tein ichek cio hna usih!
Cun hi zawtnak phun kan cungah a langh lo zongah ichek kan herh caan um tawn. Mah hna cu kan inn ah maw siloah kan riantuannak ah maw Covid-19 zawtnak phun pawl a ngeimi an um ti kan theih ahcun kan ichek awk asi. Cun hi zawtnak in a zawmi hawikom he aluancia zarhhnih chungah neihniam tein kan um ahcun ichek awk kan si fawn. Dallas zong , cun hmun tampi ah free cheknak an um ko hna.
Cucaah vai chek cio hna usih. Zawtnak kan ngei ti kan theih ahcun kan iralrin thiam deuh lai, mi zong zeimawzat kan humhimter khawh lai caah ichek hi daitlang hna hlah usih. Zeiruangah dah kan i chek a herh? Zeiruangah ti ahcun kan ichek lo ahcun kan thei kho lo. Cun, kan itheih lo tikah kan dawtmi hna le midang kan kiangkam ah um pawl sinah zawtnak chawnh khawhnak lam a tam.
Tulio cu ahopoah kan caah a har dih. Zawtnak nih lungretheihnak le pakhat le pakhat a kan hlatter. Thin tawi ngai cio dingin kan um. Pakhat le pakhat zong a mah ruang, keimah ruang tiin thanghiat le sual ipuh ding phun hna in um fawi te. Sihmanhsehlaw, hi Covid-19 zawtnak kongah pakhat le pakhat cungah hohmanh palh le sual ipuh hna hlah usih. Hopalh hmanh asi lo. Kan si khawh tawk cio in iralrin tu hi kan rian asi. Credit: Salai Z T Lian

Leave a Reply

Your email address will not be published. Required fields are marked *