Covid-19 Vaccine a Tingco Hmasabiktu lakah American minung 34 Million an i Tel awk a si

Covid-19 vaccine an serchuah khawh dengmang cangnak thawngpang an thanhmi hi zarh hnihthum a liam ve cang. BioNTech he an serti mi vaccine 90% tiang hmual a ngei cang, tiin Pfizer nih thawng a thanhnak hi zarh hnih a liam ve cang. Hnehsaknak Avoithumnak data chirhchan in 95% tiangin hmual kan ngeihter khawh cang, tiin kan hnung zarh ah khan an thanh than. Tutan zarh Monday in khan cun, punghmangtein sii an ronhmi pakhat deuh ah hin 90% tiang hmantlak a si cang i, a pahnihnak an ronhmi ah cun 62% hrawnglawng hmual a ngei. Cucaah, buaktlakin a hmualngeihnak an laakmi cu 70% a si.
Cu bantuk thawngpang thatha he cun Covid-19 dohnak hi biataktein an hnawh cang. Zeitik phawt khawh a si te lai, timi hi a biapituk lo. Kan hnung zarh chung lawng i sizung a phanmi American minung hi 70,000 lenglo an si manh cang. Hman awk tha le hmual a ngeimi vaccine hi mipi sinah phaakter a va si ko hmanh ah khin, challenge nganpi nih a kan hngah ko rih: American minung pakhat hmanh bau lo in phawt ding vaccine zaa lakain a um colh kho ding a si lo. Cu tikah, mizei bantuk hi dah savo cuanter (priority) pek an si ne kun lai, timi kongah biahalnak faakpiin a um.
Kan ram i Covid-19 nih a tlunh sual hna lai, ti kan phanmi, zunthlum zawtnak (diabetes) a ngeimi hi minung 34 millions an um i, hi hna hi savo cuanter (priority) hmasa an hau.
Covid-19 nih a kan hnursuan cio dih ko hna. Asinain, zunthlun a ngeimi hna caah cun hi virus hi tih a nung khun. America i virus in a zawmi lakah hin, zawtnak tihnung (chronic) asiloah zunthlum ai ngeih lo mi nakin, cu zawtnak phunhnih ai ngeihmi hi an zaw deuh i, a let 6 in an tamdeuh, ti a si. Zunthlum ai ngeimi Covid-19 mizaw 10 lakah 1 hi sizung an phaak a zarhkhatnak ah an thi, tiah Diabetologia journal ah an tial. US pumpi i Covid in a zaw i a zualhma ngaimi vialte lakah zumthlum a ngeimi hi 40% tiang an phan.
Cucaah, zunthlun a ngeimi hna vaccine a hmasabik ah vaccine tincoter hi kan ram i a zualhmabikmi kan community savo kan cuanter bantuk a si ko. Cun, vunrang umnak nakin vun dang pawl khuasaknak hmun ah hin virus in a zawmi an tam khun – African American, Hispanics, le Native Americans pawl hi US pumpi i a thimi miluzat nakin a lut 3 hrawng in an thi deuh, tiah theih a si. Hi miphun lak ko ah hin zuntlum a ngeimi an tambik. African Americans le Hispanics milu lakah 50% nih zuntlum an ngei i, Native Americans lakah vunrang nakin a let 2 tluk tam in zunthlum an ngei ve, ti a si. Covid a zualter chintu zawtnak tihnung pawl an chek tikah, vungrang American pakhat an chek ah cun vundang ai ngeih mi pawl hi cu 2 hrawng chek hau an si peng, tinak a si.
Cu ti zawtnak thalo a um khunnak a ruangbik cu sifah ruangah a si tawn. Vundang ai ngeihmi American minung 4 lakah 3 tluk hi a sifaakmi an si i, zunthlum zawtnak hi an income he pehtlaihnak a ngeih ngaingai. Cucaah, US i zunthlum a ngei deuh mi hna hi lahkhah niam le rian thitha a ngei lo mi an si tikah, health insurance zong cu a ngei lo an tam deuh tawn i, an nifatin nun ah vuris tlunh a fawi khunmi zong an si fawn. Cu bantuk i tihnung dirhmun a phanbikmi pawl ko cu amah le mah i kilvennak thil le ri tlawmte taktak lawng ai hmuh khomi a si fawn. A cunglei langhtermi, cop le cilh in vaccine an sin phaakter hmasabik a haumi hi an tam tikah, virus hi hmunkip ah ai chok manh te ding khi a si. Cu tikah, zumthlum a ngei mi hna lawng i hmaithlak hi a si thiam te lai lo i, a mikip i hmaithlaak hau dirhmun kan phan te lai.
America i zapi nih health care ca i dollar 1 ah 25 cents an hman peng lio ah, zunthlum in a zawmi hna nih cun a let 2 le cheu tluk tam in an phaisa an hman a hau. Zunthlum a ngeimi lakin virus in a zawmi an tamdeuhdeuh le, emergency rooms le ICUS ah hmunhma an rolh deuhdeuh ve te lai i, an ngandamnak caah health system an i ngeihmi tamtuk hman hau an si te lai. Man deng nawntein vaccine hi phawt khawh an i zuam. Virus nih a denbik mi communities i hmaithlak a herhnak kong hi policymakers pawl nih an tuaktaan hrimhrim a hau lai.
A hmasabik ah, vaccine zohkhenhnak le phawtzamhnak le vaccine a herh khunmi phu pawl kawlhawlnak tuanvo a latu dingin phu pakhat Biden transition team nih rian a khinh hmasa a hau. Cu hna lakah cun virus nih a teibikmi zunthlum mizaw pawl hi an si te lai. Zohkhenhtu phu nih cun Covid-19 karhsonak hi a zorter deuh lai i, health care system a thilrit zong a zaangchanh deuh ngai cang lai. A pahnihnak ah, zunthlum a tambik nak hmun, miphun a tlawmmi hna le income niamte ai ngeimi communities ah rian a tuan cuahmah lio mi community organizations pawl fund (chawva bomhnak) an pekmi kongah Congress nih ningcangtein an tuaktanpiak hna a hau.
Community health centers le nonprofit organizations nih an halmi (an i phaakzawh ti lo caah) mizaw tlopnak inn le lo damhkhaan ding ca i an tukmi phaisa he cun a caan a chuah tikah, a vaccine an herhnak bik hmun ah an phaak khawh a hau. Kum hramthok tein khan, siai thitha a tingco kho lo mi communities pawl ah kadang i Covod test an tuah bantuk tein tuah kho ve dingin, House le Senate nih biasu an luhpi bal cang caah, cu pawl hmunhma i vaccine phawtzamhnak kongah thatein timhlamhnak ngeih khawh a si cang lai.
A himmi le hmual a ngeimi vaccine cu hihnu caan raulo te chungah market tiang phaakpi kho dingin din lo tein thazaang nan kan chuahpiak mi cungah Science, industry le cozah riantuantu nan zate chungah kan i lawm hringhran ko. A muimi tipeep a donghnak ah khin cun ceu a um te ko lai e. Asinain, hi vial lawng hi kan i za rih lo. Ruahchannak he, a himmi le hmual a ngeimi vaccine kan i ngeih khawh hnu zongah khin, a thabik dirhmun in khuazei ka ah dah vaccine hi rian kan tuanter lai, timi kongah tlimhlamhnak (plan) kan i ngeih hrimhrim a hau. Credit: Chelsea Bawi