Council ralhraang hna he kahdohnak ah Tualchung PDF phu komh!

Demoso ah nizaan chun nitlak kahdohnak ah ralhraang 35 an thi
========
Kaya, Demoso ah SAC Ralhrang 30 Leng an Thi, a Nung zong in an Tlaih Hna. Kaya/Karenni ramkulh, Demoso peng ah nizaan March 5 ah PDF, Karenni Army le KNDF nih SAC ralhrang pawl an kah hna i ralhrang 30 leng an thi, tiah nihin ah thawng an chuah. A nung in ralhrang 2 zong an tlaih hna i meithal an lakmi zong a um len.

Karenni ramkulh, Demoso peng, Thaysule khua le Dawhnawko khua kar hmun hnih in hmai a rak nawr mi council ralhraang hna cu Demoso PDF le KDZ phukomh hna he kahdohnak a chuak i ralhraang 35 an thi tiah DMO Local PDF nih an thanh.

Council ralhraang hna he kahdohnak ah Tualchung PDF phu komh, CTU နည်းပညာလက်ရုံးတပ် le PDF phu komh dang hna an tangti tiah kan theih. Demoso peng Hpayarngoketo khua Kyauksekan ah ralhraang nih hmai nawr in an rak luh than ca ah PDF phukomh hna he kahdohnak a chuak than tiah kan theih.

Nizaan March 5 ni chun nitlak kahdohnak ah council ralhraang 35 nak tlawm lo an thi i Demoso PDF in 4 hliamtuar (fak lo)an um. CTU နည်းပညာတပ် i Drone pakhat a rawk dih. Council ralhraang hna nih khuami inn hna cu hriamngan in an kah tiah kan theih.

Cap. Naga hruaimi sakhaan laknak ah ralhrang nih vanlawng an hman! Sagaing ramṭhen, Pale peng ah a ummi Pyusawhtee pawl le ralhrang pawl nih hmunhma an khuarnak Zeephyugone khua pawng sakhaan pakhat cu PDF phu nih lakdingin an kah lioah ralhrang nih vanlawng hmangin a bawmh tiah theih a si.

Zeephyugone khua pawng ah a ummi ralhrang sakhaan pakhat cu March 3 ah Cap. Naga hruaimi MRDA le mipi hriamtlai phufonh nih an kah hna hi a si. Zaan sml 10:00pm tiang hrawng kahdohnak a chuak i sakhaan an lakkhawh deng bak ah ralhrang nih Zeephyugone pawngkam cu vanlawng in a kah tiah Cap. Naga nih a chim.

Vanlawng nih a bawmh ko hna nain a thimi le hliamhma a pumi an um tiah theih a si. Cap. Naga nih “ Sakhaan tiang kan kah hna caah a thimi an tam. Sakhaan kan lakkhawh deng bak ah van lei bawmhnak an hal caah Mi 35 pahnih le a dang vanlawng 4 nih an kan kah” tiah Irrawady thawngzamh ah a chim.

Ralhrang nih vanlawng a hman ruangah Zeephyugone pawng Mintaipin, Thayet, Myaynigone, Ngaungyoe, Chaungoo, Ngaungpinkauk khua 9 i mipi hna cu zaan bak ah an zaam colh tiah theih a si. Mintaipin khuami pakhat nih “Kan zapi tein tlik dih a si ko. Vanlawng an hman caah hohmanh khua chungah kan um ngam lo” tiah Irrawaddy thawngzamh ah a chim.

A tlizaam mi khuami pawl hi khua chung lut ngam ti loin a naihnak ram tangah an zaam. Nikhua a linh tuk ruang ah eidin lei harnak an tong tiah a zaammi hna sin in theih a si. Ralhrang le Pyusawhtee pawl nih an zaamtakmi khua chung dawr hna cu an bauh i an thilri an fir tiah theih a si.

PDF pawl nih mah ralhrang sakhaan lak dingin an kah hi a tu cun a voithumnak a si cang. Mah sakhaan lakdingin February 15 zingah PDF thazang 300 hrawng nih an kah hna i ralhrang 40 leng an thi tiah PDF nih an chim. Pale peng, pyusawhtee pawl an tamnak Zeephyugone le Inmahtee khua hna cu Pale peng PDF pawl nih an kah lengmang hna tiah theih a si.

Pale pengah ralhrang le pyusawhtee pawl nih khua chungah lut in inn khanghpiak, mipi thah le an ngeihmi thilri an chuh lengmang hna tiah theih a si. January 31 ah Mweton khua inn 300, February 4 ah Kaingdwin khua inn 200, February 5 ah Hlawkar khua in 300 leng ralhrang nih mei an khangh tiah Irrawaddy thawngzamh nih a langter.

NUG Ministers pawl telh in minung 11 cu rammi sinak in dinhter an si tiah SAC nih a thanh. Dr. Zaw Wai Soe, U Ye Mon, Ko Min Ko Naing, Dr. Sasa hna telh in minung 11 cu rammi sinak in dinhter an si tiah SAC nih March 4 ah a thanh.

Rammi sinak in dinhter a tongmi NUG ah Minister of International Cooperation a ṭuan liomi Dr. Sasa SAC nih a thanhmi hi phung lut lo a si tiah a leh. “Myanmar rampi a hrawkmi hi mi tlawmte ralbawi pawl an si timi cu mipi theih a si, Vawlei pi theih a si, an nawl chuahmi zeihmanh kan relpiak hna lo, phung lut zong a si lo. Myanmar rammi kan sinak cu kan i chuahpi mi a si. An mah nih biakhiahnak nawl an ngei lo.

Chin miphun kan si timi cu Min Aung Hlaing nih bia a khiahding si lo, biakhiahnak nawl zong a ngei lo” tiah Dr. Sasa nih a chim. Rammi sinak in dinhter a simi hna cu: NUG cozah i Minister of Health and Education Dr. Zaw Wai Soe, Minister of Defense U Ye Mon, 88 siahngakchia hruaitu Ko Min Ko Naing, Minister of Home Affairs and Social Affairs U Lwin Ko Latt, Minister of Human Rights U Aung Myo Min, Minister of International Cooperation Dr. Sasa, Deputy Minister of Women, Youth and Children Daw Ei Thuzar Maung, Minister of Communications, Information and Technology U Htin Lin Aung, Minister of Foreign Affairs Daw Zin Mar Aung, ramkhel lei a cawlcangtu Pann Ei Sal Lo le U Myo Yan Naung Thein hna an si.

Myanmar ram upadi kha buar in ramdang ah phungning loin a kalmi an si tiah SAC cathanhnak ah aa tel chih. Cun, Myanmar ram miaknak a hrawktu an si tiah 1982 Kawlram mi updi ningin rammi sinak in dinhter an si tiah SAC nih a thanh. Credit: The Chinland Post