CNF rianttuan tu caah thazang thar tak tak a si

CNF hnulei in tthawngngai in a dirkamh zungzal tu Hakha Khuahlun (Hakha Kek) kan u-nau hna i, an hruaitu pawl nizan (12/26/2020) ah CNF USA Regional Committee Chairman Pu Tial Hmung he kan va len hna. An Chairman Pu Tuan Ceu (Van Tha pa), an chungttuan Salai Sai Cung Lian, Chin Chritian Church (CCC) Pastor Rev. Sang Hre, Pu Run Hnin (Mang Dun Pa) le bochan upa dang pawl an ni tel kho. Pakhat sinak le ttanttinak lungthin he neihniam tein hmailei zeitin dah a tunak tthawng deuh in CNF rianttuannak ah kan ni bawmh cio lai ti i ruah ttinak caanttha kan ngei kho.

Hi bantuk sikho ding ah caanttha a kan awnh tu Hakha Khuahlun kan unau nan dih lak cung ah siseh, Biakinn hmun ah miphun kong khuakhan lairel ttinak a kan awnhtu CCC Khrihfa nan cung ah siseh CNF member vialte aiawh in chim tthan kan duh. Kan ni tawnmi upa pawl an mithmai nih CNF caah fek tak tak in a dir mi an si nak tthatuk in an langh ter. Caantawi te kan bia ruahttinak cu a si ko nain, CNF rianttuan tu caah thazang thar tak tak a si.

Relchap ding thawngpang dang, CNF Headquarters ah CNF upa pawl le CNF bawmh ding ah timhlamhnak a ngei mi Cacawnglio Chin Mino pawl hmanthlak. CNF Headquarters Camp Victoria ah 2020 Christmas tuahnak caah USA in phaisa a kua tu Pu Pau Lam Piang(Indianapolis, IN), Pu Sui Bik Thang (Jacksonville, FL) le Jacksonville Chin Baptist Church (JCBC) mino pawl nan cung ah kan ni lawm. Hnulei Kumdang ah a rak kua tawn mi hawi le pawl nan cung zong ah kan ni lawm ti a thar in vun chim tthan rih kan duh. Nan rak kan bawmhnak vialte kan philh lo.

Hmaikum le a raa lai mi caan pawl zong ah a tu bantuk in kan hawi le pawl nih thilttha an tuah nak hi kan miphun vialte nih i cawn cio awk tlak tak tak a si. CNF Headquarters theng te ah Christmas tuah piak cu Pathian Vanbawi fa kan caah a chuahnak kan lawmh lawng si loin, Chin Miphun caah a ttuan mi CNF nan cung ah kan ni lawm, kan nin upat hna i nan sin ah kan ttang ko ti a langhternak a si i a hlei in lawmh a um, sullam a ngei.

Camp Victoria UCCF Biakinn ah thawhlawm a pee mi ramdang a um mi kan miphun hawi pawl nan cung zong ah kan ni lawm ti vun langhter tthan kan duh. A tu lio kan miphun dirhmun zoh tik ah CNF Camp UCCF Biakinn ah kan thawhlawm le kan mission phaisa a phanh hi a herhnak bik hmun ah mission kan ttuan tiah ka ruah. Kan miphun vialte nan hnu zulh kan ni zuam ve lai. FB hawi le vialte nan cung ah Khristmas lunglawmhnak a thar in tlung ko seh! Credit: Daniel Sakhong