CNF kong hi lar duh sawh ruangah a chungthil thei setsai lo in aupi le mualphoh hi

Chin miphun hna,
=============
Naihrawng Chinmi kan News rel cu Kawl Ralkap uknak ruangah kan Miphun ning pi in kan lungfak dih! kan caṭial mi le comment, kan tuahmi pawl relnuamlo mi zong a tam ngai. CNF thangchiat le Nautatnak kan hmuh tawn mi pawl hi van ruat ṭhan tuah hna usih:

February 12, 1947 kum ah Kawlkomh uknak hin, nan lungtlin lo ah cun, nan chuak ṭhan kho tiah minsen a thumi le anung Pathian nih mah te in aum dingah, nunphung, Biaknak le Hmunram a pek mi kansi. Asinan, kawl ralkap nih kan miphun le biaknak kha hrawh, kamram kha chuh i hramhram in uk le tleihkhih le thah kansi. Anmah kawl lila hmanhnih Ralkap uknak chia celhlo in an doh i nunnak tampi a liam. CNF zongnih cu uknak ṭhalo, doh le kan miphun, kan biaknak le kanram humhim kha ai tinhmi asi. Kawl nih an kan chuhmi kan nuhrin covo kha kan sin a phak ṭhan ni cu CNF nih a rian a lim ni asi lai, kan nuhrin covo kan sin aum hlan chung poh cu vawlei dongh tiangin a doh zungzal fawn lai tihi kan miphun pi ningin i fiang hna usih.

CNF nih cun Chinmi vialte kha thleidannak neilo in, zalong te le nuam te in kan umṭi khawhnak kha ai zuami le ai tinhmi cu asi. CNF chungah pumpak in miṭha tampi an um lio ah, misual zong an um ve. Cu bantuk misual nih mipi cungah lungfahnak an tuahmi khi CNF nih a fialmi le a policy asiloh. Kawl Ralkap uknak ṭha ko sehlaw CNF hi aum hnga lo. CNF ah na lungfahnak a hrampi le a Muru cu Kawl Ralkap uknak ṭhatlo ruangah asi ti, na pemh hlan poh cu Mihut thluak neilo nasi rih tinak asi ko. CNF cu pengtlang le holh ca silo in kawl ralkap nih hramhram in an kan chuhmi Chinmi kan Covo lak long kha ai hmaithlak.

CNF nih hin miphun dang le ramdang sinin bawmhnak a neiloh, ai bochan cemmi Chinland Club nih le a chuahpi khawhmi a tlawm tuk! CNF nih Ralkap zong a nei, chungkhar zong anei, zung zong anei, bill zong anei, zawfak mi zong a nei tawn, eidin zong ahau, chim ding a tamtuk! Zeitin dah cak seh tiah na ruah khawh? CNF ṭhawnnak ah hin mohphurhnak le ṭuanbo a neimi nasi ve kha i fiang tuah. Kan pekchanh mi cupei a tlawm tuk rumro cu! zeiti cun hme, a ṭhawn khoh lai. Ram le miphun caah cun kan siang fam lo cuteh. Neih ko bu zongah a siang lo mi kan tamtuk! Ram le miphun dawtnak ah kan i fiang loh, chambaunak kawl belte te ah cun kan fim tuk hoi! Meithal puahin thisen chuah sehlaw mipi nih van tuar lebang usihlaw zei bantuk bia chiakha khi dah ka hei chim hnga mu, ka ruat ngam loh.

CNF kong hi lar duh sawh ruangah a chungthil thei setsai lo in aupi le mualphoh hi mah le mah i Pamh asi kha i fiang hna usih. CNF ṭhawn lo cu nangmah le keimah nih ramdawtnak kan neihlo ruangah le kan pekchanhmi a tlawm tuk le pei siko cu. CNF upa pawl cu an rum tuk ko na in, kan ti hna, CHINMI nih kan thawh mi phaisa hi minung pakhat rumnak tlak hmanh asi rih loh.

Na ram le na miphun na dawt taktak ko ah cun na kã te longin, au lengmang hlah, na sianlo bikmi phaisa asi lo le thazãng in na tuahser nak kha langh ter deuh, mahcu pasal rian asi. Mah longah CNF cu a ralṭha kho lai, a thazãng zong a ṭhawng kho lai. Kawl Ralkap uknak ṭha lo mi chung zongin an kan luatpi khawh lai i kan miphun, kanram, nunphung le biaknak tiangin kan him lai. Na lung i fim law na thluak cawl ter tuah uh Chin pasal ṭha hna.
Nguntling.