Matupi-Hakha Lam A Cimh Caah Khualtlawn Rih Lo Ding In CDF-Matupi Nih An Thanh!
==========
Chin ramkulh, Matupi peng ah cat lo in ruah a sur i Matupi-Hakha lampi cu a cimh caah mipi hna nih khuatlawn rih lo ding in CDF-Matupi nih ralrinnak a thanh. August thla chung ah Matupi peng ah cat lo in ruah a sur caah Matupi-Hakha lam ah a um mi Lunghlaw-Zakam lam a cim i lam a rawh ngai caah mawṭaw, cycle hna a kal kho ding a si lo caah CDF-Matupi nih atu bantuk in thawng an thanh hi a si.
Matupi peng mipi hna cu vawlei cimh ruang le ti lianh ruang ah umkalnak lam a har caah harnak an tong i nifatin eidin luhchuahnak a har tiah theih a si. Matupi khua kalnak ah Matupi-Hakha le Matupi-Mindat lam lawng hman a si cang i Mindat-Matupi lam hi SAC ralkap pawl atu le atu an luh caah an hmang tuk lo. August 14 in August 20 tiang Chin ramkulh hmun kip ah ruah a tam lai tiah NUG Khuacaan lei zung nih an thanh.
Matupi Peng Hmun Cheukhat Vawlei Minh Ruang Ah Khualtlawng Harnak An Tong. August thla chung ah pehtlai in ruahpi a sur ruang ah Matupi peng hmun cheukhat hna ah ti lianh le mincimh nak a chuah caah khualtlawng mi harnak an tong. Matupi-Hakha lam, Lunghlawng-Zakaan khua kar hna ah vawlei an min i khualtlawng motor le motor cycle tibantuk in umkal rih lo ding kong CDF-Matupi nih mipi sin ah ralrin peknak thawng an thanh.
Mincimh Le Tilian A Tam Ruangah Matupi Peng Tualchung Mi Har An Tong. August thla chung ah cat loin ruah a sur ruangah Chin ramkulh, Matupi peng ah min a cim i ti a lianh caah khualtlawng mi hna harnak an tong, tiah theih a si.
Matupi peng ah faak tuk in mincimh le tilian a umnak hmun ah khualtlawn lo dingin CDF-Matupi nih nihin August 15 ah ralrin peknak an tuah. Matupi peng, Lunghlaw-Zakam kar motor lam cu a cim i motor le cycle he khualtlawng rih lo ding in CDF-Matupi nih mizapi sin theihternak an tuah.
PyinKhungGyi Hakha Le Matupi Kalnak Lampi Ah Bomb Tarhmi An Hmuh. August 15, ah Sagaing ramṭhen Kalay Myo PyinKhungGyi khua signbord pawngah ho theihlo nih an rak tarhmi bomb an hmuh tiah theih asi. Hi bomh tarhmi hi mipi ralkap nih an theih bak in an buaipi colh. Motor lampi sir le lamṭhennak hmunhma ah bomb tarh a um tawn ruangah tualchung mipi i ralring dingah mipi hriamtlai phu nih theihternak an tuah.
Chin ramkulh Matupi Myo motor lampi cu ruahsurnak nih leiminhnak a chuahter caah Hakha le Matupi khualtlawng luhchuahnak motor lampi siamṭhat a si hlan paoh cu khualtlawng mipi lut chuak rih lo ding in CDF Matupi nih theihternak an tuah hna.
Hpakanh Khua Vawlei Cimhnak In Minung 30 Leng A Tlau Mi Chung Ah Ruak 18 An Char. Kachin ramkulh, Hpakanh khua lungmansung cawhnak hmun tlang cimh nak in minung 30 leng a tlau mi hna chung ah minung 18 ruak an hmuh cang tiah theih a si.
“Vawlei cimh hnawh nak in minung 37 a tlau mi hna chungah minung 18 ruak char mi hna hi August 15 zanlei suimilam 2 tiang kawl mi an si i zanlei suimilam 5 tiang pehzulh in kawlhawlnak tuah a si lai” tiah Hpakanh khua mibawmtu phu nih an chim. August 12 ni ah lungman sung a kawl mi hna cu tlang nih a cimh hnawh hna caah minung 30 leng cu ti chung cerh lak ah an rak tlau.