CNF Headquarters Camp Victoria Ah 2020 Christmas Tuahnak Caah Phaisa An Bawmh Hna

CNF Headquarters ah CNF upa pawl le CNF bawmh ding ah timhlamhnak a ngei mi Cacawnglio Chin Mino pawl hmanthlak.
CNF Headquarters Camp Victoria ah 2020 Christmas tuahnak caah USA in phaisa a kua tu Pu Pau Lam Piang (Indianapolis, IN), Pu Sui Bik Thang (Jacksonville, FL) le Jacksonville Chin Baptist Church (JCBC) mino pawl nan cung ah kan ni lawm. Hnulei Kumdang ah a rak kua tawn mi hawi le pawl nan cung zong ah kan ni lawm ti a thar in vun chim tthan rih kan duh. Nan rak kan bawmhnak vialte kan philh lo.

Hmaikum le a raa lai mi caan pawl zong ah a tu bantuk in kan hawi le pawl nih thilttha an tuah nak hi kan miphun vialte nih i cawn cio awk tlak tak tak a si. CNF Headquarters theng te ah Christmas tuah piak cu Pathian Vanbawi fa kan caah a chuahnak kan lawmh lawng si loin, Chin Miphun caah a ttuan mi CNF nan cung ah kan ni lawm, kan nin upat hna i nan sin ah kan ttang ko ti a langhternak a si i a hlei in lawmh a um, sullam a ngei.

Camp Victoria UCCF Biakinn ah thawhlawm a pee mi ramdang a um mi kan miphun hawi pawl nan cung zong ah kan ni lawm ti vun langhter tthan kan duh. A tu lio kan miphun dirhmun zoh tik ah CNF Camp UCCF Biakinn ah kan thawhlawm le kan mission phaisa a phanh hi a herhnak bik hmun ah mission kan ttuan tiah ka ruah. Kan miphun vialte nan hnu zulh kan ni zuam ve lai. FB hawi le vialte nan cung ah Khristmas lunglawmhnak a thar in tlung ko seh!

2019 Kum USA ramchung in UCCF ah Mission rian rak ttuannak Report kan rak langhter tthan. 2020 Kum ca zong ah Mission nan ttuannak phaisa pawl hmuh cuahmah a si i, kan ni lawm. A rak kan kua kho rih lo mi Church pawl zong zarh(2)/ ni 14 lawng a tan cang caah ah tuandeuh in nan rak ka khan piak, nan rak kan kuat nak lai kan nin nawl hna. UCCF hi cu kum fatin in nan Church budget cio in one percent in mission rian ttuan tti ding ah sawmnak phaisa a si. Inn saknak ca i $2,500 cio hal mi he khan aa dang. Mi tampi nih aa khat rua tiah ruah a si caah kan vun fianter tthan bia a si.

Khrihfa bu lawng si loin pumpak cio zong in UCCF ah mission rian nan rak ttuan cio nak lai, Chin miphun kan unau dih lak kan in sawm hna. Camp Victoria i UCCF kan Biakinn ah nan cheuhra cheukhat a chia mi zong nan vun um pah ngai ti kan hmuh i kan ni lawm. Miphun hawi vialte zong nih nan rak chiahpah ve nak lai kan nin sawm hna. Credit: Daniel Sakhong