CNF Emergency Meeting hi tha tein rak tuah kho hlah uh sih law, CDF, CNA, CNF hi!

CNF Emergency Meeting hi tha tein rak tuah kho hlah uh sih law, CDF, CNA, CNF hi!
========
Kum 4 chung State dang kal cu chim lo, khua kiang kap hmanh ah ka kal kho lo. Kum 4 chung ka riantuan nak le Inn lawng ka hlat lengmang ko. Ka chung le unau zong ka tlawng kho hna lo.

February 1, 2021 Kawl Ralkap nih Uk nak an lak tik ah, Miphun dawtu hna le riantuan tii hawi hna nih, zeitin dah kan um lai zeitin dah riantuan a si lai tiah khua khan lairel nak a kan neih pi i thla 2 thla 3 chung zantim 2:00 am tiang hna biatuahnak kan nei tawn.

Kum 4 chung leng ka chuah bal ti lo mi cu duh zong ah duh lo zong ah, ka hne i ho fial chih bang in CNF Emergency meeting ah voihnih ka kal than. 2021 cu CNF Emergency Meeting ah Nithum lengmang caan pek in ka kal i ka tel kho.
Hi 2021 CNF Emergency Meeting hi tha tein rak tuah kho hlah uh sih law, CDF, CNA, CNF hi thazaang zeitluk in dah a der hnga.

CNA Camp pi hmanh hi Nihin tiang an humhak an humzual kho hnga maw ka ti. 2021 CNF Emergency Meeting hi Kum 34 chung CNF Emergency meeting vialte lak ah man nei bik le hlawhtlin bik in ka hmuh. Kum khat chung raltuk nak he hmai ah kan kal I thazaang chuah cio a si. Kan caan a taang rih mi chung ah zeitluk in dah thazaang kan chuah rih a herh ti hi pakhat cio nih kan i theih ding a si ko.

Mizapi nih thazaang kan chuah lo ahcun hi raltuk nak hi hmai ah a kal kho hrim hrim lai lo. CDF, CNA lawng nih zeitin hmanh in an mah lawng nih ral a tu kho hrim hrim lo. CDF, CNA hna hi Mizapi thazaang chuah nak thawng in Nihin tiang ral an tuk khawh nak hi a si.

Cu cu CDF si hna seh CNA si hna seh kan i theih dih a hau, CDF , CNA lawng hlah kan Miphun dihlak Mizapi hrim hrim nih kan mah thazaang tel lo in ral an tu kho lo ti hi kan i theih ahcun cu cu kan thazaang hmun khat ah kan chuah ti lai i hmai ah kan kal kho lai. Lungrual nak tel lo in teinak hi hmuh khawh a si hrim hrim lo. Hmunkhat ah thazaang chuah tii ko hna uh sih! Credit: Salai Ceu