CNF/A pawl zeidah an tuah, khuaika dah an um tiah a au tawnmi pawl, CNF/A an holh ve cang mi nan theih dih cang

It’s A Time To Wake Up The Chin People
================
Kha! Kan Kawlram dirhmun cu nikhat hnu nikhat chiat lei a panh thluahmah. Daitein duhlonak a langhtermi minung zong hriamnam hmangin an vun thah thuahmah cang hna. Thil sining zoh tikah tlangcung ralkap pawl nih hriamnam he ready tein um hrimhrim a hau cang. CNF/A pawl zeidah an tuah, khuaika dah an um tiah a au tawnmi pawl, CNF/A an holh ve cang mi nan theih dih cang. Mipi lei ah an ttang, lamzawh in duhlonak langhternak le CDM cawlcangnak thazang an pek. A herhning in mipi kan dirkamh hna lai tiah an ti cang.

Kha! Cuti si cun nang le kei nih zeidah kan tuah khawh? Ramchung ummi nih pumpak in CNF/A ah luh. Ramleng ummi nih chawva pek/chuah in CNF/A thazang tthawnter. Cucu Chin miphun dihlak nih Chinmi phun ca le CNF/A caah kan tuah khawhmi a si. Kan hawi tlangcungmi hriamtlaibuu dang cu hriamnam le minung thazang tampi an ngei cang. Kanmah Chinmi tucu kan ka longin kan au tawn i, pumpak in CNA ah va lut siseh, ngeihchia chawva in siseh thazang kan chuah kho tuk lo.

Cucaah cun CNF/A a hlamtu, a soisel tawntu vialte tu lio hi miphun caah kanmah le tikhawhnak lam cio in thazang chuahnak caanttha kan ngeih lio caan a si. Kaa long in maw kan au peng rih ko lai. A takin miphun caah, pumpak, chawva in kan i tel caan a phan cang. Nang zeizat dah CNF/A caah na pek khawh? Kei zeizatdah ka pek khawh? Tutan hi Chinram ka daw a timi vialte, challenge kan i tuah caan a cu cang. Hika hin Chinram dawtu vialte CNF/A caah thazang vun chuah cio dingin ka vun in sawm hna.

Kan i hngilhnak in i tthang cang hna u sih. Miphun caah thazang chuah cang hna u sih. Kan hawi tlangcungmi bantukin kan ralkap tthawnter ve cang hna u sih. Cucu CNF/A ah ngeihchia chawva kan pekmi in langhter hna u sih. Cucu nangmah le keimah nih miphun kan dawtnak kan langhter khawhmi te le kan tuahkhawh mi te a si ve. Tutan ah miphun a dawtu kan si le silo langhter cio hna u sih. Credit: Salai Biak Tum Lian