Nihnih chung ah Hakha council ralkap 20 CNA/CDF nih an thah hna

Nihnih chung ah Hakha council ralkap 20 CNA/CDF nih an thah hna
=====
Myanmar ram uknak hramhram in a chuttu Hakha i Min Aung Hlaing ralkap (Council ralkap) hna cu CNA/CDF hna kut in minung 20 an nunnak a liam tiah kan theih.

Hakha ah CNA le CDF bawm in 2021 November 7 chun le November 9 zinglei sang ah an kah hna hi a si. November 7 an kah hna tan ah a hmun ah minung 11 an nunnak a liam i minung 4 fak tak in hliam an tuar. November 7 an kah tan hna kong he pehtlai in, “November 7 ahkhan minung 11 an thah hna. Minung pali hliamhma an pu.

Minung pali cu Hakha sii-inn pi ah an kalpi hna. Sii-inn an phak ni ah minung 2 an thi. A taang mi pahnih hi Hakha nih an damh khawh ti lo ca ah 2021 November 9 ah Helicopter in an laak hna i hmundang ah an kalpi hna,” tiah The Hakha Post nih thawng kan hlatnak ah kan theih.

2021 November 9 zinglei sang i kahnak zong ah CNA/CDF lei nih Hakha Palek sakhan i a ummi hna an hmai an i phiah lio ah an kah hna. Hi an kah hna nak ah minung 7 council ralkap lei in an nunnak a liam tiah kan theih.

Hakha GTI pawng Kahdohnak ah SAC Palik 7 Thi tiah CNF nih Chim. Nihin (Nov. 9) zinglei sml. 6:00 ah Hakha GTI pawng ah hmun a khuarmi SAC ralhrang palik pawl cu CNA le CDF nih an kah hna i, palik 7 an thi, tiah CNF chimnak nawlngei Salai Htet Ni nih a chim.

“Minung 7 an thi. Naitan Falam in a rak kaimi SAC ralhrang lak ah aa telmi palik pawl an si. CDF le CNA nih zinglei sml. 6:00, an hmai an i phiah lio ah kan kah hna,” tiah Salai Htet Ni nih People’s Spring sin ah a chim.

A hmai aa phiah liomi SAC ralhrang palik pawl an kah dih hna hnu ah CDF le CNA ralkap pawl cu an umnak hmun lei ah him tein an kir kho tthan, tiah a chim chap.

Ralkap nih Thantlang khuachung Inn an khangh than. Thantlang khuachung sang pakhat simi Lungtial sang le Seipiozi sang aa rit nak, A-la-ka sianginn (middle school) pawngkam hrawng ah ummi Inn ralhrang nih an khangh than.

Atu zaan, November 9 zan suimilam 8 pm tluk ah a kangh hi a si. Inn 3 hrawng cu a kang lai tiah ruahdamh a si. Zan suimilam 8:45 pm tiangah mei alh a tha ngai rih tiah a lang in a hmumi nih the Chinland Post ah an chim. Hi kong he pehtlai in, deilei ah thawngpang thar thanh khawh kan i zuam lai.

Avoi hnihnak Ralhrang Helicopter Thantlang ah A Tum Than. Zanlei slm 2:00 ah ralkap sakhan thlang ah minute 10 tluk Ralhrang Ralkap Helicopter a tum i 2:15pm ah Tlangrua lei kap tlang a niamnak in a kir than rih.

Zeithil dah a phorh timi fiangin theih a si lo nain ralhrang minung thazaang a chap men hna lai tiah ruahdamh a si. Chun slm 12:20 zongah avoi khat nak a tum i 12:35pm ah a kir than.

Ralhrang Helicopter Thantlang ah A Tum. Chun slm 12:20 ah ralkap sakhan thlang ah minute 10 tluk Ralhrang Ralkap Helicopter a tum. 12:35pm ah Tlangrua lei kap tlang aniamnak in a kir than. Zeithil dah a phorh timi fiangin theih a si lo.