CNF/A Facebook Page Deu in Tangka Tlawmkawlnak Tibantuk a Umnak ca ah Ralrin Peknak an Chuah

CNF/A Facebook Page Deu in Tangka Tlawmkawlnak Tibantuk a Umnak ca ah Ralrin Peknak an Chuah
——
Atulio Facebook cahmai cung ah CNF/A min in Page a tlawm bik pathum hrawng a um i, adik takmi Page cu pakhat lawng a si. CNF/CNA nih an hman taktakmi Official Page cu “Chin National Front-Headquarters” timi Facebook Page hi a si. (A tang ah LINK zong kan chiah). Page deu dangdang pawl nih CNF/A he pehtlai in hmanthlak an tar i thawngpang diklo thlah a um lengmang pin ah chawkawlnak zong an tuahmi a hun um.

Cucaah, “Chin National Front-Headquarters” timi lawng hi adikmi a si i, a dang Page pawl nih an tarmi kong ah pehtlaihnak kan ngei lo, tiah Offical Page a simi “Chin National Front-Headquarters” nih thawng a thanh.
A tanglei hmanthlak i Page pahnih hi CNF/A min in tuahmi Page Deu an si. The Chin Journal, March 26, Yangon.

Relchap, Sermontawi: NIHIN HI A CAAN LIO TE A SI KO. Ulenau chungkhar hna, Phungchimtu nih cun zeizong vialte caah caan a um cio i van rangtang i a ummi thil vialte nih hin caan an ngeih dih, a ti (Phungchimtu 3:1-9 relchap)
Cu caah caan zohthiam hi kan nun chung ah a biapi taktak mi a si.

Napoleon nih England pawl a tei dengmang hna nain tlawmpal te kai hngilh ta lai a ti caah ral an sung tiah kan hmuh. Hitler nih Russia a tei dengmang nain zarhhnih chung a herhtuk lo mi thildang a tuahpi hna caah an sung ti kan hmuh. Cu bantuk in vawlei thil tuahnak ah siseh, vanlei thil tuahnak ah siseh A CAAN LIO TE AH tuah le ttuan le hmanthiam hi a rak biapi ngaingai ko. Kan nun ah a caan lio te ah tuah dingmi thil kan tlolh sualmi an um hnga maw ti a ka ruah termi an um len. Cu chung in a tanglei pawl hi ruah cio ding ah kan sawm hna.

1. Jesuh Khirh cu Khamhtu le Bawi ah na sawm cang maw? Nunnak muru bik cu Jesuh Khrih khamhnak co a si caah na sawm rihlo ahcun, NIHIN HI A CAAN LIO TE A SI KO. 2. Jesuh a co cangmi nih Bawipa Jesuh min in midang dawt caan a si. Midang chung ah nule va, fale, innpa in mi vialte aitel. NIHIN HI A CAAN LIO TE A SI KO. 3. Jesuh thisen man mi vialte caah a lamkip in cawlcangh caan a si. Pakhat tal ah nai telnak a um lo ahcun NIHIN HI A CAAN LIO TE A SI KO.
4. Khrifabu caah zeital zeital in kan i tel maw? Area tampi caah Pathian nih pahrang (talent) le laksawng, thluachuah phunkip a kan pek cio. Cu vialte hmang in Pathian Khrifabu caah peknak kan ngei kho ve maw? NIHIN HI ACAAN LIO TE A SI KO. 5. Kan tuanbia zohtthan caan a si. Khoika in dah kan rat, zeiruang ah dah kan rat, zeidah Pathian nih a kan duhpiak timi zoh tthan. Tulio hi kan kaltak mi kan miphun fak tuk in an hrum-ai lio a si. A lamkip in kan cawlcangh a herh.NIHIN HI A CAAN LIO TE A SI KO.

Marka 10:46-52 chung ah mitcaw Bartimu cu Bawipa Jesuh a kalnak lamkam bak ah a rak um. Jesuh a si a hngalh bak in bawmhnak a hal colh. A pawngkam ummi nih DAI KO tiah an thlohlen. Minung hi vialte lak ah nang aunak aw hna cu a thei lai lo, au len duh hlah, ti khi a si. Asi nain NIHIN HI A CAAN LIO TE A SI KO TIAI FIAN CAAH THANG CHINCHIN IN A AU. Bawipa Jesuh nih a aunak aw a theihpiak i damnak tlamtling a pek. Haleluia!

Mi tam lak ah mahle mah khi i philh a fawi te. Midang nih an tuah ko lai, an pek ko lai, an ttuan ko lai, an chim ko lai, KEI TE HNA TEL a hau lai lo. An ka thei lem lo, an ka hngal lem lo, tiin phetchem a fawi te. Cucu a si lo, BAWIPA NIH PAKHAT CIO HI A KAN NGALH DIH. Nikhat khat a hmai i kan chuah tik ah a bupi in chim a si lai lo, pakhat tete in kan i chim cio te lai (Heb 4:13 relchap). Unau chungkhar hna, Kan nunnak i chek cio tuah u sih. Biapi deuh zeithil kan tlolhmi a um sual maw? Tlolh sualmi a um ahcun rak tuah colh ve ko tiah kan sawm. NIHIN HI A CAAN LIO TE A SI KO. Bawipa nih kan dihlak caah thluachuahnak kan pek piak ko seh. Amen. Khrih ah nan hawi, Thawngling Mualhlun, CEBC Indianapolis, March 26, 2021.